2 SAMWELI 2
2
Daudi yakolwa mwami wi Ivuyuda
1Inyima wa yaga, Daudi yateeva Yahova, “Nyara kwirana kuzia mu lilala ku madaala gi Ivuyuda?”
Yahova yativura, “Yee.”
Daudi yateeva, “Ni liliha?”
Yahova yativura, “Heburoni.”
2Kunangwa Daudi yazia Heburoni harara na avakali veve vaviri, Ahinaamu, kutura Jezireeli na Abigaeli uwaali mukunzakali wa Nabali kutura Karimeli. 3Yavugula kandi avasaza vi liihi veve harara na avizinyumba ziavo, na vamenya mu madaala agakumbiriza Heburoni.
4Maku avasaza vi Ivuyuda vazia Heburoni nivavaka Daudi amaguta kuva mwami.
Lwa Daudi yahulira ndi avandu va Jabeshi mu Gileadi vaali kuyavira Saolo 5yatuma avasaza valala namakuva ndi, “Yahova avagasizi kigira limanyia uvusuuvirifu vwinyu ku Mwami winyu ku limuyavira. 6Na kalunu, Yahova ave wi zimbavasi kandi ave musuuvirifu ku munyi. Inzi kandi ndamukolera vulahi kigira icha mumali kokora. 7Muve nizinguru kandi avaluviriri! Saolo, mwami winyu umali kukuza, kandi avandu vi Ivuyuda vamali kumbaka amaguta kuva mwami wavo.”
Ishiboshezi yakolwa mwami wa Isiraeli
8Munene wi liihi lia Saolo, Abineri muyaayi wa Neri, yaali navuguyi Ishiboshezi, muyaayi wa Saolo niyaambuki engeleka wu mugera gwa Jorodani kuduuka Mahanaimu. 9Uwene yeyo, Abineri yaamihiza Ishiboshezi kuva mwami wa vivala via Gileadi na Asheri Jezireeli, Efuraimu na Benjamini; kandi ligali ku Isiraeli vosi. 10Ishiboshezi yaali ni mihiga arubaini lwa yakolwa mwami wa Isiraeli, kandi yamiha ku mihiga giviri. Navuzwa ihiiri ya Yuda vaali avasuuvirifu ku Daudi. 11Kandi yamiha mu Heburoni ku Ivuyuda ku mihiga saba ni mieli sita.
Uvulwani hagati ha Daudi na Ishiboshezi
12Abineri na avanene va Ishiboshezi vaatura Mahanaimu kuzia Gibeoni. 13Joabu, uwa mama weve yaali Zeruya, kandi avanene va Daudi vandi vavaganira ha lidavalia lia Gibeoni, aha vosi viikara hasi, muganda mulala ku lovega lulala lwa lidavalia, na umuganda gundi ku lovega lundi. 14Abineri yavolera Joabu, “Leka konyoole valala ku vasoleri kutura ku vuli lovega valwaane niviugi.”
Joabu yativura, “Vulahi vuzwa.”
15Kunangwa avasaza komi na mbiri avasingiyi mu vogono vwa Ishiboshezi na ihiiri ya Benjamini, valwaana avasaza 12 va Daudi. 16Musaza sa mulala yagumira mutwi gwu musigu weve nukutumita kivavi chiche mu zimbaru ziu musigu weve, kunangwa vosi 24 vaagwa hasi nivakuzi harara. Nandio havundu yaho mu Gibeoni halangwa, “Mulimi gwi vivavi.”
17Maku, uvulwani vululu vwatanga kandi Abineri harara na Avaisiraeli vaaguutwa na avasaza vi liihi lia Daudi. 18Avayaayi vavaga va Zeruya vaali ho: Joabu, Abishai kandi Asaheli. Asaheli uwaali anyala kunyagula kuli embongo yu mbulimu, 19yaatanga lilondelera Abineri naanyagulanga vulungi aduuki kuye. 20Abineri yikivuka navoora, “Asaheli ni ivi uyu?”
Asaheli yativura, “Yee, niinzi.”
21Abineri yavoola, “Leka kungunga! Kunga mulala ku avasikari vi liihi na uvuguli viosi via aveeye navio.” Navuzwa Asaheli yaazizagilira limulondelera. 22Abineri yamuvolera kandi, “Leka kungunga! Kigira ki unigi inzi ngwiti? Nyara ndi kohenza amwavo woovo Joabu?” 23Navuzwa Asaheli yasura koleka kumukunga. Kunangwa Abineri, yamutumita munda inyima ni litimu lilie vugira kwikivuka kuduuka litimu nilitulira imugongo. Asaheli yagwa hasi nakuza, kandi vosi sa mulala uwaza havundu ha yaali naagoni, yasingira ho mu ligenya.
24Navuzwa Joabu na Abishai vatanga lilondelera Abineri, na lwa liuva liali niliyeraa, vaduuka ha kiguru cha Ama, ichaali Ivugwi wa Gia kunzira izizaa mwigendanyama lia Gibeoni. 25Avasaza kutura mu ihiiri ya Benjamini vakumbiriza Abineri, na vasingira mu lietegekera uvulwani ku kiguru kilala. 26Abineri yalanga Joabu, “Kuzizagiliri kulwaana mihiga josi? Siunyala kolola ndi mu keheri vulava ho uvululu uvwere? Kalunu kunyi koveeye avasaza vikivala chicho. Ilava ng'inga ivi kulaga avasikari vovo valeke kukukunga kunyi?”
27Joabu yativura “Nzisuha ku Nyasaye oveeye mwoyo, ndi, ulavula komoloma, avandu vange vakazizagiliyi kukukunga kuduuka mugambazuri.” 28Ahene yaho, Joabu yakuba kisiriva kuli kimanyiru ku avandu veve valekele kukunga vandu va Isiraeli; nandio, lilwaana lialekela.
29Abineri na avasaza vi liihi veve vagenda kuvitira mu livona lia Jorodani uvudiku yivwo vwosi; vaambuka mugera gwa Jorodani kandi inyima wo kogenda mugamba gwalonda ku gwosi, vaduuka ha Mahanaimu.
30Lwa Joabu yalekera kukunga, yavungiza harara avasaza vi liihi veve vosi, nanyoora ndi komi na tisa kuvo sivali ho mba, komeeda ku Asaheli. 31Avasaza vi liihi va Daudi vaali ni viiti 360 va Abineri kutura mu ihiiri ya Benjamini. 32Joabu na avandu veve vaavugura muviri gwa Asaheli, nivaguyavira mu kilindwa cha avinyumba yeeye mu Bezelehemu. Maku vagenda uvudiku vwosi, kandi vaduuka ha Heburoni mu mavwevwe.
©Bible Society of Kenya, 2019