2 SAMWELI 1
1
Daudi ahuliraa amakuva gi likuza lia Saolo
1Inyima wi likuza lia Saolo, Daudi yirana kutura mu liguuta lilie ku vandu va Maleki kandi namenya mu lidaala lia Zikilaga ku madiku gaviri. 2Lidiku lialonda ku, umusoleri mulala yaduuka kutura mu hokososa ha Saolo. Kumanyia ovovereri vwivwe, yaali naatanduyi zinguvu kandi naviiki marova ku mutwi gwigwe. Yazia ku Daudi nasigama hasi kumuha uluyali lonene. 3Daudi yamuteeva, “Utura hayi?”
Yativura, “Inzi nduraa hokososa ha avandu va Isiraeli.”
4Daudi yamuvolera, “Mbolera ichekoleki.”
Yativura, “Liihi lietu liali kwiruka kutura mu vulwani, kandi avanyingi ku avasikari vi liihi liitu vaali kwitwa. Saolo nu muyaayi weve Jonazani vaali kwitwa kandi.”
5Daudi yamuteeva, “Ivi umanyi ndi Saolo nu muyaayi weve vaakuzi?”
6Musoleri oyo yativura, “Ndaali nimbeeye ku Kiguru cha Giliboa, kandi nindora Saolo naasedemi ku litimu lilie kandi amagare na avasaza vanina ku zibarasi zia avasigu vaali nivisundaa ahimbi ligali kuye. 7Ahene yaho, yagirung'ana naandora, kandi yananga. Ndaahugila ‘Yee, mwami!’ 8Yandeva, ‘Ivi nivwaha?’ Na inzi ndaativura, ‘Inzi mbeeye umumaleki.’ 9Ahene yaho yavoola, ‘Hamba hano unziti! Saliriziywi vudamanu ligali, kandi mbeeye ahimbi kukuza.’ 10Kunangwa ndaazia kuye nimwiita, kigira ndamanya alakuza lwayagwa hasi. Maku ndaavugura itaji yikivia iyaali ku mutwi gwigwe, nikisambo chaali ku mukono, maku mali kuvileeta imbiri woovo, mwami wange.”
11Daudi yatandula zinguvu zizie mu vovereri kandi vasaza vi liihi vosi avaari naye vakora malala mere. 12Vaavereraa, nukusiomera nokohonga lilia kuduuka hamugorova, Saolo, Jonazani kandi Isiraeli, avandu va Yahova, kigira avanyingi avaari nivitiiywi mu vulwani.
13Daudi yateeva musoleri waali naamuleeteye amakuva, “Uturaa hayi?”
Yativura, “Inzi mbeeye Umumaleki, navuzwa menyi mu kivala chiinyu.”
14Daudi yamuteeva, “Ivi uluviliyi ndi ukwita umwami mutovole wa Yahova?” 15Daudi yalanga mulala ku avasaza vi liihi veve navoora, “Mwiti!” Musaza oyo yaduya umumaleki kandi naamusaliriza vudamanu ligali. 16Daudi yavolera umumaleki zana oyo, “Ivi weleeteye yaga ivi mwene. Waali kwiikalagira umwene lwa uvugiliyi ndi waali kwita oyo wa Yahova yatovola kuva mwami.”
Daudi Asiomeraa Saolo na Jonazani
17Daudi yimba lisioma yili kigira Saolo numuyaayi weve Jonazani, 18kandi yalaga ulwimbu lwi lisioma yilu lwigizi avandu vi Ivuyuda. Lwang'odwa mu kitabu cha Yasharu.
19“Ku vigulu via Isiraeli, Aviimiliri viitu vaakuzi!
Avaluviriri kuvita vosi va avasikari viitu vagwiyi!
20Utalandiza makuva yaga mu Gazi
anoho mu zinzira zia Ashikeloni,
gase avakali va vandu va Filisitia valasangala,
gase avakaana va avandu vatamanyi Nyasaye valasangala.
Avakaana avandu vatamanyi Nyasaye valasangala.
21“Imbura anoho iliime vitakuba ku vigulu via Giliboa mba,
Milimi javio jive vugira viamo kazozo
kigira zinguva zia avaluviriri ziigoni yo hasi mu zisoni,
inguva ya Saolo si ivakiywi na maguta kandi mba.
22Uvuta vwa Jonazani vwali vwukwita ligali,
kivavi cha Saolo chaali vugira livererera
nivuduyaa avizingulu nukwita umusigu.
23“Saolo na Jonazani, vaali avalahi kandi avayaanzwa ligali.
Mulivamwoyo, kandi mu likuza; sivaavukana mba.
Vaali avizimbiru kuvita zindizu.
Vaali avizingulu kuvita zisimba.
24“Munyi avakali va Isiraeli, musiomere Saolo!
Yamuvika zinguvu zinzakanyu ziuvutugi,
kandi yavika izahabu ku zinguvu,
kandi yaasiaha zinguvu zienyu ni
vindu vie zahabu kandi magina guvuguli.
25“Avasikari avaluviriri vagwiyi,
viitirwa mu vulwani.
Jonazani agoni hasi umukuzu mu vigulu.
26“Inzi mbereraa kigira ivi,
amwavo wange Jonazani Ivi oveeye wukuyaanziza ku inzi!
Uvuyanzi vuvwo ku inzi vwali vwokogenyia;
uvulahi ligali kuvita uvuyanzi vwa vakali.
27“Avasikari avaluliri vamali kugwa,
viuma viavo ving'aliywi kandi siviveeye novokonyi mba.”
©Bible Society of Kenya, 2019