2 SAMWELI 18
18
Abisolomu Yaguutiywi kandi Witiiywi
1Mwami Daudi yaleeta avasaza vi liihi veve vosi harara, naavagavulanyia mu miganda ji zielefu ni jizimia, kandi ja mia, kandi naviika vimiliri vava igulu wavo. 2Maku yavatuma ichova mu viduma vivaga; Joabu, na amwavo Joabu amwavo weve Abishai na Atai kutura Gazi, sa mulala ukulinda vuli kiduma cha avasikari. Mwami Daudi yavolera avandu veve kandi, “Ndazia nimunyi inzi mwene.”
3Vaamutivulira, “Utazia mu vulwani nikunyi mba. Sikilava kindu ku musigu niiva kunyi kulagirung'ana nukwiruka mba, anoho kali niiva inusu ku kunyi nikukuza, sivalaganagana kunyi kuva kindu kuvo mba. Navuzwa ivi oveeye mulahi kukunyi kuvita avasaza elefu ndala; kunangwa nivulahi ligali kuvita niiva ivi utigala mu lidaala linene, na ukutumiri ovokonyi.”
4Mwami munene yavavolera, “Choosi cha munyi muloraa kuva kilahi ligali, inzi ndakekola.” Kunangwa mwami yasingira handulu hi kirivwa, lwa avasaza vi liihi vosi vavita imbiri weve mu viduma vie zimia ni zielefu. 5Mwami Daudi yahaana malago ku Joabu na Abishai, na Itai: “Kigira inzi mutasaliriza musoleri Abisolomu mba.” Amahi goosi gaahulira mwami Daudi nahaana lilago yili ku vimiliri veve.
6Kunangwa liihi liatura ichova kulwaana Isiraeli mu mulitu gwa Efuraimu. 7Avandu va Isiraeli vaguutwa na avatumikiri va Daudi; kandi liguutwa linene ligali, avasaza zielefu sirini viitwa lidiku yilio. 8Uvulwani vwalanda mu kivala choosi, avasaza vakuzira mu mulitu vaali avanyingi kuvita yavo aviitirwa mu vulwani.
9Nonoho Abisolomu yagana na valala ku avatumikiri viliihi va Daudi. Abisolomu yaali naniini ku isukiri yeeye, kandi lwi isukiri yazia kuvitira isi wi zisia ziadindana ziu musaala munene gulangwa mwaloni, liisu lia Abisolomu liagumirwa mu zisia yizio. Isukiri zana yeyo yaazizagilira kunyagula na Abisolomu yalekwa niyeleraa. 10Mulala ku vasaza va Daudi yamulola ma navolera Joabu, “Munene wange, ndoli Abisolomu niyeereyaa musaala gwa mwaloni.”
11Joabu yamuteeva, “Niiva ivi wamulola, kigira ki nuvula kumwita ahene nahene yaho? Inzi mwene ngano ndakakoheye vidonye viefeza likomi numusibi.”
12Navuzwa musaza oyo yativura, “Kali niiva ulamba vidonye viefeza elefu ndala, sindaali nyiiri mukono gwange nukwita muyaayi wu mwami mba. Kunyi kwosi kuhuliyi lilago liu mwami ku ivi, Abishai na Itai ndi, ‘Kigira inzi, utasaliriza musoleri Abisolomu mba.’ 13Navuzwa ndava utinguhi mwami nukwita Abisolomu, mwami yaali ahuliri amakuva yaga. Ahuliraa amakuva goosi na ivi siwali unyala osoore mba.”
14Joabu yavoola, “Sinzizaa kogotiza ing'inga yindi inyingi ku ivi mba.” Yavugula amatimu gavaga kandi nagatoza mu kiritu cha Abisolomu nakikiri mwoyo niyeereye mu musaala. 15Maku avasikari likomi va Joabu vakumbiriza Abisolomu ma nivamaliriza limwita.
16Joabu yalaga kisiriva kikubwi kusingiriza vulwani, kandi mahi geege girana kutura mu lilondelera vandu va Isiraeli. 17Vaavugura muviri gwa Abisolomu, nivagusiuva mu liliina liveeye musi ligali mu mulitu, nivalikunika na magina. Avaisiraeli vosi viiruka, mundu sa mulala nazia yengo weve mwene.
18Ing'inga yi livamwoyo lilie, Abisolomu yaali niyiyumbakaira munara, mu livona liu mwami; kigira siyaali nu muyaayi kuzizagiliriza lieta lilie mu Isiraeli mba. Kunangwa yagugulika lieta lilie mwene, kandi kuduuka lidiku lia lero, gwamanyikana kuli munara gwa Abisolomu.
Daudi Yavolerwa likuza lia Abisolomu
19Maku, Ahimaazi, muyaayi wa Zadoku yavolera Joabu, “Leka nyaguli ku mwami; na makuva malahi ndi Yahova umali kumuhonyia kutura ku vasigu veve.”
20Joabu yamutivulira, “Awa kalunu siulahila amakuva malahi ku mwami mba. Lidiku lindi waza, okole ndio, navuzwa kalunu mba, kigira muyaayi wu mwami ukuzi.” 21Maku yavolera mutugwa weve kutura Ezopia, “Zia ovoolere mwami cha umali kolola.” Mutugwa zana yinama kandi nazia zimbiru.
22Ahimaazi yaanigiriza Joabu, “Sindegeleraa ichekoleki mba. Mwaza yaanza oleke inzi mbili makuva malahi zana kandi.”
Joabu yamuteeva, “Kigira ki wenya okole ndio mwana wange? Sinoonyole madanyi kugo mba.”
23Ahimaazi yavoola kandi, “Ku choosi ichekolekaa, nyenya nzie.”
Joabu yamuvolera, “Zia.” Kunangwa Ahimaazi yazia zimbiru kuvitira mu livona lia Jorodani, nonoho, yavita mutugwa zana oyo.
24Daudi yaali niyikaye hagati hi virivwa viviri. Mulindi wi kirivwa yanina igulu wi kirivwa kuduuka ku lidiiji igulu. Kandi lwa yaginga zimoni zizie igulu, yalora mundu musaza nanyagura yeng'ine. 25Mulindi zana yalanga kandi navolera mwami. Mwami yavoola, “Niiva aveeye yeng'ine aleetaa amakuva malahi.” Naye yaza zimbiru ligali niyisunda himbi.
26Maku musikari mulindi yalora mundu musaza wundi nanyagura yeng'ine, kandi yalanga hasi ku mulindi wi kirivwa, “Henza mundu wundi yaazaa zimbiru kandi!”
Mwami yativura, “Mwene uyu kandi aleetaa amakuva malahi.” 27Musikari mulindi yavoola, “Nyara kolola ndi musaza wukutanga anyaguraa kuli Ahimaazi. Aveeye mundu mulahi.”
Mwami yavoola, “Kandi aleetaa amakuva malahi.”
28Ahimaazi yacheliza mwami vudinyu, niyituula hasi umwene navoora, “Yahova Nyasaye woovo yizominywi, umali kukuha liguuta ku avasaza vibaara ku Mwami Wuluyali!”
29Mwami yateeva, “Musoleri Abisolomu akaveeye mu mirembe naho?”
Ahimaazi yativura, “Mwami Wange, lwu munene woovo Joabu yaandumi, ndoli vuzwa liduvagana linene, navuzwa sindaali nyara kumanya chaali ki mba.”
30Mwami yamuvolera, “Singira yaho.” Kandi yaazi nasingira ho.
31Ahene yaho, mutugwa wa Ezopia yaduuka kandi navolera mwami, “Mbeeye na makuva malahi, Mwami Wuluyali! Kalunu Yahova akoheeye liguuta ku yavo vosi avibaara kutura ku ivi.”
32Mwami Daudi yamuteeva, “Musoleri Abisolomu akaveeye mu mirembe naho?”
Mutugwa zana oyo yativura, “Ndakayanzi ichekoleke kuye chakekoleki ku avasigu vovo vosi; Mwami, kandi ku vosi avibaara ku ivi.”
33Mwami Daudi yiizurwa nekevelera. Yanina kuduuka mu keng'oze keveeye kunzira yikirivwa. Lwa yaali nazizaa, yalira, “O, muyaayi wange! Muyaayi wange Abisolomu! Abisolomu, muyaayi wange! Ngano ninzi ukuzi mu vogono vuvwo muyaayi wange! O, muyaayi wange Abisolomu!”
©Bible Society of Kenya, 2019