2 SAMWELI 17
17
Hushai yimiliraa Abisolomu vudamanu
1Inyima wi ing'inga ngekeeke, Ahizofeli yavolera Abisolomu, “Mbugilira ndovole avasaza zielefu likomi na vaviri, kandi uvudiku vwalero, ndatula nondelere Daudi. 2Ndamwingilira lwa naave naluhi kandi nakuzi mwoyo. Alatihizwa kandi avandu vasaza veve vosi valiruka. 3Nanziti mwami yeng'ine ma nandete avasaza veve vosi ku ivi, kuli osereywi yirana ku musaza weve. Ivi wenyaa kwita mundu mulala yeng'ine vuzwa; avandu vandi vosi valava mu mirembe.” 4Livoora yili lialoleka kuva kuli liveeye zing'anagani zindahi ku Abisolomu kandi na aviimiliri va Isiraeli vosi.
5Maku Abisolomu yavoola, “Kalunu langa Hushai Umuariki, kandi muleke ahuliri icha avoora.” 6Lwa Hushia yaduuka, Abisolomu yamuvolera, “Yizi ni zing'anagani zia Ahizofeli aheeye kunyi. Kuzilonde? Nigatali ndio, kovolere icha kokora.”
7Hushai yativura, “Zing'anagani zia Ahizofeli akoheye ing'inga yiyi siziveeye zindahi mba. 8Ivi umanya ndi baba woovo Daudi na avandu vasaza veve vaveeye avalwaani vadinyu ligali ma kandi vaveeye avalulu kuli iduba ingali ninyagiywi avana vayo. Baba woovo aveeye musikari wilimanya linyingi kandi siavezaa na avandu veve havudiku mba. 9Kalunu ndi, hawundi yiivisi mu luhangaywa lundi anoho havundu handi. Nonoho lwa Daudi yingilira avandu vovo, ku vosi uhulira amakuva yaga alavoora ndi avandu vasaza vovo vamali kuguutwa. 10Ahene yaho, kali avasaza valuviliri kuvita vosi, avataveeye nuvuti kuli zisimba, valatia kigira avandu vosi mu Isiraeli vamanya ndi baba woovo nu musikari mululu wi liihi kandi avandu vasaza veve vaveeye avalwaani vadinyu kandi avaluviriri. 11Livoora lie zing'anagani ziange liveeye ndi oleete avandu vosi va Isiraeli harara, kutura ku lwako lulala kuduuka ku lundi, avanyingi kuli muyeke ku lujinga lwi inyanza, kandi uviimiliri ivi mwene mu vulwani. 12Kulanyoola Daudi hoosi ha ava naveeye kandi mu mwingiliri nakikiri kumanya ichekolekaa. Siaveeye ho nohononoka mba, oyo anoho avandu vasaza veve. 13Niiva yirana inyima nukwirukira mu lidaala linene, avandu vosi valaleta migoye ku lidaala linene zana, na kulaling'usa, nukuliviika mu mugera goveeye isi wi livona. Sihalava na kagina kalekwa kondongozi kwi kiguru mba.”
14Abisolomu na vandu va Isiraeli vosi vavoola, “Livoora lie zing'anagani zia Hushai liveeye lilahi kuvita lia Ahizofeli.” Yahova yaali natovoye livoora lilahi lia Ahizofeli livuli kolondwa kunangwa lidivizwa liduuki kuuza ku Abisolomu.
Daudi yiganihizwa kandi yiruka
15Ahene yaho Hushai yavolera vasaalisi Zadoku na Abiazari zing'anagani zia aheeye Abisolomu na aviimiliri vosi va Isiraeli kandi zia Ahizofeli ahaani. 16Hushai yameda kovora, “Koli vwangu, kalunu! Tumi amakuva ku Daudi atagona ha zinyambukiru ziemigera mwigendanyama mba, navuzwa vaambuki mugera gwa Jorodani vwangu kunangwa oyo harara na avasaza veve vavuli kugumirwa nukwitwa.”
17Muyaayi wa Abiazari Jonazani kandi wa Zadoku, Ahimaazi vaali nivalindilira ha kidaho cha Enirogeli, ku zinduru zia Jerusalemi, kigira sivaluvilira kololeka ni vingira mu lidaala linene mba. Mutumikiri mukali alazia kuvavoolera ichekolekaa kazozo, ma ku navo vazie kovoolera mwami Daudi. 18Navuzwa lidiku lilala, mwana muyaayi yavalola kandi navolera Abisolomu; kunangwa viiruka vwangu nukwivisa munyumba yu mundu mulala mu Bahurimu. Mundu uyu yaali nikidaho ahimbi ninyumba yeeye; navo viika musi mwacho. 19Mukali wu mundu zana yavugula kikuniku nafuma ha munwa gwi kidaho ma navagala uvuswage kucho, kunangwa mundu kali mulala avuli kukelora. 20Avatumikiri va Abisolomu vaza munyumba zana yeyo nivateeva, “Ahamaazu na Jonazani vaveeye hayi?”
Mukali oyo yavavolera, “Vaambuki mugera.” Avasaza yavo vavenya, navuzwa sivali valanyala kuvanyoola mba, maku viirana Jerusalemi. 21Inyima wa vaali nivakatula kuzia, Ahaamazu na Jonazani vaatura mu kidaho zana kandi nivavolera mwami Daudi. Vamuvolera ndi Ahizofeli alohizi kumusetera, navoora, “Koli vwangu mwambuki mugera.” 22Kunangwa Daudi harara na avandu vasaza veve vatanga kwambuka mugera gwa Jorodani, kandi lwa vwali nivuchezaa, vosi vaali nivambuki.
23Lwa Ahizofeli yalora ndi livoora lie zing'anagani zizie sizilondeywe mba, yanina ku ibarasi yeeye, nazia mu lidaala lilie liene. Inyima wokolohiza vindu vivie vulahi, yisunga umwene. Yateevwa mu kilindwa cha vandu avinyumba yeeye.
24Daudi yaali naduuki mu lidaala lia Mahanaimu ku ing'inga ya Abisolomu na vandu va Isiraeli vaali nivakambuka mugera gwa Jorodani. 25Abisolomu yaali naviiki Amasa kuva munene wi liihi mu vogono vwa Joabu. Amasa yaali muyaayi wa Izira, Umueshimaeli; mama weve yaali Abigaeli mukaana wa Nahashi, mbozo Zeruya, mama wa Joabu. 26Abisolomu na vasaza vi liihi veve valomba hokososa mu kivala cha Gileadi.
27Lwa Daudi yaduuka ha Mahanaimu, yaganirwa na Shobi, muyaayi wa Nahashi, kutura mu lidaala linene lia Raba mu kivala cha Amoni, kandi Mukiri muyaayi wa Amieli kutura mu lidaala lia Lodebari, kandi na Barizilai kutura mu lidaala lia Rogelimu mu Gileadi. 28Valeta vidali, zibenzeni, niviju via madohi, ingano, ishairi, nuvusie vuswage vusambiywi, amaganda kandi zimbindi, 29Uvwuki na maguta, amagondi amaguta kutura ku zing'ombe ku Daudi na avandu veve vaduuki kulia. Kigira vavoola, “Avandu yava vaveeye ni inzara kandi vaaluhi, kandi nuvuluhu mwigendanyama.”
©Bible Society of Kenya, 2019