2 PETERO 2

1Kuli vaporofeti vu vugadi vanyooleka hagati ha vandu mu madiku yago, kandi munzira ndala nzere avigizi vu vugadi valanyooleka mumunyi. Valaleta mu vuvisi amigizu go vovehi kandi gukudiviza na valambakana Umwami wavahonyia, na ndio valeletera aveene lidiviza lia vwangu. 2Kali ndio, avanyingi valalonda likora liavo lie kifavwi; na kigira vikolwa viavo, avandi valamoloma vudamanu ku miigizu gu Mwami Yeso ga giligali. 3Mu likayirwa liavo lio vuviiti vigizi vuvugadi yava vukala ku munnyi kigira amakuva gaavo gu vugadi. Mukalagi wavo umali kwetegeka kandi mudivizi wavo siagonaa mba.

4Nyasaye siyavererera zingelosi ziakola vwoni mba, navuzwa vazisiuva mu gehena, wazialindwa mukisundi nizivoheywe minyororo kuduuka likalagirwa. 5Nyasaye siyavererera avilirova va kale, navuzwa yaleeta amazi amanene ku vandu vatamanyi avaavura kumutia Nyasaye, navuzwa yahonyia Nuhu, umwilwazi vulungi na vandu vandi saba. 6Nyasaye yakalagira amadara ga Sodoma na Gomora, kandi yaagadiviza nu muliru naagakora kelolero kiliekoleka ku yavo avatamanyi Nyasaye. 7Yahonyia Loti mundu mulungi wavererizwa ligali ku limenya lie kifavwi cho voheyi lia vandu vachamu. 8Umundu mulungi oyo yamenya muvo, yasalirizwa mu mwoyo gwigwe madiku manyingi kuli yalora nu kuhulira vikolwa viavo vichamu. 9Kulwayago, Mwami amanya kuli anyala kohonyia avandu valungi kutura mu ligerizwa liavo, nu kuhaana mageri ku vandu, vachamu kuduuka Lidiku lie Likalaga, 10kandi kuvita ligali, yavo avalondaa likayirwa lio muviri, nukuchaya uvunyali vwa Nyasaye.

Avigizi vuvugadi yava vaveeye nu vuluviliri kandi vikirage, na sivamanyia uluyali kuyavo avuvukumi mwigulu mba; navuzwa vavanyegaa. 11Kali zingelosi ve zinguru nu vunyali kuvita avigizi vuvugadi yavo, sizileetaa ikiyaalo na manyego madamanu kuvo imbiri wu Mwami mba. 12Navuzwa avandu yava vayinzira novogeri kuli zinyama ziu muvulimu, ziivurwa ma zigumirwa nukwitwa. Vingilira namanyego kindu choosi chavatamanyi. Valadivizwa kuli zinyama ziu muvulimu, 13na valatungwa ni lisalirizwa kigira lisaliriza lia vaakolera avandi. Lieyaanziza kuvo liveeye kokora kindu choosi havulavu kinyala kwigutiza liegomba liavo liu muviri. Valeganyia kandi vaveeye zisoni mu livugana lienyu, lwa viiyunga ni munyi mu lilia, na yilwo lwa vasangalira zinzira ziavo ziu vugadi. 14Sivenyaa vaheenze ku kindu kindi mba, navuzwa avakali vaheyi venyine; kandi liegamba liavo ku likora uvwoni siliveeye ne keheri mba. Vagoonya nu kwimilira avandu vadedekere kwingira mu mutego gwu uvwoni. Imioyo jaavo jaanalizwa kuva mu vuhuvaali. Nyasaye yavalaama! 15Vamali koleka inzira inungi, ma vaagoti nokolonda inzira ya Balaamu mwana wa Beori, uwayaanzilira konyoora uvukala ku likora uvudamanu. 16Navuzwa yagondokerwa ku vwoni vwivwe. Ibarasi yeeye yamoloma nu mwoyo gwu mundu kigira uvwoni vwivwe nu kwigalira vulalu vwu muporofeti.

17Avandu yava vaveeye kuli vidaho vitaveeye na mazi, kuli amalesi gi kihuzuzi kihiraa; Nyasaye yavavikira ovomenyo mu vogo vwi kisundi kenene. 18Vavoola amakuva gi liegingira ligali kandi agatali ni kivuni, kandi gu vusiru, kandi vatumikira likayirwa liu muviri kotega yavo avirukaa kutura ku yavo avamenyaa mu vugadi. 19Vavasuuviriza ovovoholore, lwa yavo aveene vaveeye avatugwa vu vwoni kigira umundu aveeye umutugwa wi kindu choosi ikimwamihaa. 20Niiva avandu vamali kohononoka kutura mu vindu vie kifavwi chi lirova kigira limanya Mwami kandi Muhonyi wiitu Yeso Kristo, kandi viirana kugumirwa nu kuguutwa navio, liiva liavo lie inyima ligwiyi lidamanu ligali kuvita maziambiri. 21Vwakaveeye vulahi ligali kuvo, valavula kumanya inzira yu vulungi, kuvita kugimanya kandi viirana koleka amalago matakatifu gavahevwe. 22Gamali kokoleka kuvo kuli izing'ano zie ligali ndi: “Imbwa yiranaa kandi ku maluki gayo,” kandi “Inguruvi isingiywi kandi yiranaa kugalagala mu madohi.”

Lidiku liu Mwami

Currently Selected:

2 PETERO 2: LOGOOLI

Highlight

Copy

Compare