2 PETERO 1
1
1Inzi Simoni Petero, umutumikiri kandi umutumwa wa Yeso Kristo; Ng'oderaa vandu vosi kuvitira mu vulungi vwa Nyasaye wiitu, kandi Muhonyi wiitu Yeso Kristo avamali konyoora lisuuvira lilala liere liu vulahi kuli lietu.
2Zimbavasi ni mirembe vive mu munyi muvunyingi mulimanya Nyasaye na Yeso Mwami wiitu.
Lilangwa nililovolwa na Nyasaye
3Zinguru zindakatifu zia, Nyasaye zimali kukuha vindu viosi viduukana kove navio ku komenye liiva lia Nyasaye. Kuvitira mu limanya lietu lia uyu wakulanga kuduuki kusanga mu vukumi kandi uvulahi vwivwe mwene. 4Muliiva yili umali kukuha vihaanwa vinene kandi vilahi via yakusuuviriza. Kunangwa, ku vihaanwa yivio, muhononoke ku uvwoneku vwu kudiviza ovoveeye mu lirova kunangwa muduuki kusanga mu liiva liu vutakatifu vwivwe. 5Kigira ikivuni chene yiki mukore zinguru komeeda uvulahi vwosi ku lisuuvira lienyu; mumeede ilimanya ku vulahi vwinyu, 6kulimanya lienyu, mumeede ku ilielinda; ku lielinda lienyu mumeede ku liekuzira; na kuliekuzira lienyu, mumeede ku vunyasaye; 7na ku vunyasaye vwinyu, mumeede ku vulahi vwu vumiitu; na ku vulahi vwu vumiitu vwinyu, mumeede ku uvuyanzi. 8Ni muva ni vindu yivi muvunyingi, vilamukola kuva avaguru kandi avadukanu mu limanya Mwami wiitu Yeso Kristo. 9Navuzwa mundu woosi utaveeye ni vindu yivi, alolaa ahimbi kandi aveeye umboku, kandi wiviriyi ndi yaatakaswa uvwoni vwivwe vwa kale.
10Kulwa yaga, avaamitu, muyinziri ni zinguru miyinzi milahi mulombe lilangwa ni litovolwa lienyu vive via agiligali. Nimukora yaga simunyala koleka lisuuvira lienyu mba. 11Kunangwa mulanyola livugilirwa liu vukumi mu Vwami vwi mihiga ni mihiga vwu Mwami kandi Muhonyi wiitu Yeso Kristo.
12Kunangwa ndamwizuliza vuli kazozo vindu yivi, kali niiva mwavimanya kandi vaduukiru mu giligali ga mwanyoola.
13Ng'anagana, nivulahi inzi kumwizuliza amakuva yaga lwa ngikiri mwoyo. 14Manyi ndi ndaaza nguzi vwangu, kuli Mwami wiitu Yeso Kristo yambolera havulavu. 15Ndakora zinguru kumulomba muduuki kwizuliza ivindu yivi vuli ing'inga, kali niiva ni inyima wi likuza liange.
Petero yalora uvukumi vwa Kristo
16Sikwereda ku livoora lie zing'ano zio vogeri zitaveeye nu vulungi, ing'inga ya kwamumanyia izingulu zie liza liu Mwami wiitu Yeso Kristo mba, navuzwa kwalola moni na moni ovonene vwivwe. 17Kwaali ho lwa yanyoora uluyali nu vukumi ku Nyasaye Baba. Lwa mwoyo gwaaza kuye kutura mu vukumi ovonene nigovoora, “Uyu niyie umwana wange umuyanze wange, unyanzizaa!” 18Kunyi aveene kwahulira umwoyo yigu nigutura mwigulu lwa kwaali harara naye mu kiguru kitakatifu.
19Kunangwa koveeye ni lisuuvira ligali na makuva galandizwa na vaporofeti. Mulakola vulahi niiva mulagahuliriza, kigira gaveeye kuli itaya yaka mu kisundi kuduuka lwa vuchezaa, nu vulavu vwe eng'ereng'ani ya mugamba yaka mumioyo jinyu. 20Kuvita yaga goosi, mwizurizi ndi, sihaveeyeho nu mundu unyala kwivaala ku vwivwe umwene ovoporofeti vwa Mang'oda Matakatifu mba. 21Voporofeti si vwaza ku vulaliri vwu mundu, navuzwa avandu vanyoola Roho Mutakatifu lwa vamoloma amakuva gaturaa ku Nyasaye.
A vigizi vuvugadi
Currently Selected:
2 PETERO 1: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
