1 VATESALONIKE 5
5
1Sihaveeye ho kivuni komung'odera kunyi, avaamitu viitu, makuva gizing'inga gi mihiga, lwa Mwami alirana mba. 2Munyi aveene mumanya vulahi ndi Lidiku liu Mwami lilakaze kuli mwivi yaazaa vudiku. 3Lwa vandu vava nivakevoola ndi, “Jiveeye mirembe kandi vindu viosi viveeye vulahi kandi liveeye lielemeriza,” nonoho kivi kilakaduuki kuvo vwangu kuli lilumwa liduka ku mukali oveeye inda, kandi avandu si vahononoka ligali mba. 4Navuzwa munyi, avaamitu viitu, simuveeye mu kisundi mba, kandi Lidiku yilio litamugosa kuli mwivi mba. 5Munyi mwosi muveeye avandu vuvulavu kandi avumbasu. Kunyi sikoveeye avuvudiku anoho avikisundi; 6kunangwa kutagona kuli avandi vakora, navuzwa kulindi kazozo kandi kove novogeri. 7Yavo avagonaa zindoolo, vagona vudiku, navo avahambikaa, vahambikaa vudiku. 8Navuzwa, kunyi koveeye avumbasu, gakuduukiraa kove no vogeri. Kuduuka kwiviiki lisuuvira nu vuyanzi, kuli isalamba kandi lisuuvirizwa lietu lio vuhonyi kuli igudwa siyakotovola. 9Nyasaye siyakuviika kusaliri kigira uvutima vwivwe mba, navuzwa konyoole uvohonyi kuvitira mu Mwami wiitu Yeso Kristo; 10uwa kukuzira, kunangwa komenye harara naye kali nikuva mwoyo anoho ni kukuza lwa aliiza. 11Kunangwa, muzuvane munyi aveene naveene nokokonyana vene na vene, kuli mukolanga kazozo.
Amalago gu kumaliriza ni licheliza
12Avaamitu viitu, kogoonya munyi muhaane luyali luduukanaa ku yavo avayinziraa hagati hinyu, ava mwimiliraa nukwigiza mu liiva liu Vukristayo. 13Mu vavugiliri ligali mu vuyanzi kigira miyinzi jaavo ja vakora. Mumenye ni mirembe hagati hinyu munyi aveene naveene. 14Kumuzuvaa munyi avaamitu viitu, muliganihizi avagata, muluvirizi vati, mukoonye avadedekere, kandi mwikuziri ku avandu vosi. 15Muhenze mundu kali mulala atatuunga wundi kali mulala uvudamanu ku vudamanu mba navuzwa vuli kazozo, mukolerane vulahi vene na vene kandi ku vandu vosi.
16Musangare kazozo, 17musaale Nyasaye vugira kolekera. 18Musandizi Nyasaye ku vindu viosi kigira yivu voveeye uvulariri vwa Nyasaye ku munyi mu Kristo Yeso.
19Mutigaliri Roho mba. 20Mutachaya amakuva go voporofeti mba, 21mugerizi vindu viosi, mugumiri vudinyu ligali yiki ekeveeye kilahi: 22Mwiyahuli ku vudamanu zing'ano ziosi.
23Nyasaye mwene ahaanaa mirembe ku kunyi amutakase ligali; kandi roho winyu, mioyo ni miviri jinyu jive milavu vugira imbara kuduuka ku liza liu Mwami wiitu Yeso Kristo. 24Uyu ulangaa munyi aveeye musuuvirifu alakola ndio kigira aveeye musuuvirifu.
25Avaamitu viitu, mukusaaliri kandi.
26Muchelizi avaamitu vosi ni livuusa litakatifu.
27Mugoonyaa mu vunyali vwu Mwami ndi, ibarwa yiyi esomerwe avaamitu vosi.
28Zimbavasi ziu Mwami wiitu Yeso Kristo zive ni munyi vosi.
Currently Selected:
1 VATESALONIKE 5: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
