1 VATESALONIKE 4

1Mu limaliriza, avaamitu, viitu, mwigi kutura ku kunyi kuli gamuduukira komenya kunangwa muduuki kuyaanziza Nyasaye. Nindio mwamenyangi kandi kalunu kumugoonya nu kumwiganihiza mu lieta liu Mwami Yeso mumeede kokora ndio ligali. 2Munyi mumanya lugano lwa malago ga kwamuha ku vunyali vwu Mwami Yeso.

3Yivu nu vulaliri vwa Nyasaye, munyi muduuki kutakaswa; mwerehe kutura ko voheyi. 4Mundu sa mulala ku munyi gamudukira amanye kuli amenyaa nu mukali weve mwene munzira yu vutakatifu, kandi yuluyali, 5sigaveeye mu liegomba lidamanu liu muviri kuli avandu vi zihiiri, avatamanyi Nyasaye. 6Mu makuva yaga, mundu atakolera Mukristayo wache uvudamanu. Umwami mwene alavaanza kisaalia ku yavo avakolaa vindu yivi viosi; kuli kwamuvolera, kandi ku mwiganihizaa nizinguru. 7Nyasaye siyakulanga komenye mu voheyi, navuzwa uvutakatifu. 8Kunangwa, uyu usuulanga amigizu yaga siasuraa mundu, navuzwa asuraa Nyasaye, uhaanaa kumunyi Roho weve Mutakatifu. 9Sihaveeyeho nikivuni chu ku mung'oderaa ku liyaanza avamwavo vinyu mba munyi aveene mumali kwigizwa na Nyasaye kuli munyala kuyaanzana aveene naveene, 10kigira mukoraa likuva yilio ndio, kuyaanza avamwavo vosi avaveeye mu Makedonia mwosi, avaamitu viitu kunyi kumuzuva mumeede kokora ndio ligali.

11Muve ni lienya lio komenya mu liiva lio kwehozeriza vuli mundu akole makuva geege mwene, kuganagani uvutumiki vwinyu aveene, kandikakole miyinzi namakono geege mwene kuli wa kwamuvolera maziambiri. 12Munzira yiyi mulanyola lizominywa kutura ku vandu avasuuviraa kandi muvuli kuva ni lienya kindu kutura ku mundu woosi.

Liza lio Mwami

13Avaamitu, viitu kwenya munyi mumanye agiligali ga makuva ga yavo avamala kukuza. Mutaverera kuli yavo avataveeye nilisuuvirizwa.

14Nikuva nikusuuvira ndi Yeso yakuza ma nasimuguka, kunangwa. Kusuuviri ndi Nyasaye alakavaleete harara na Yeso, yavo vosi avakuzaa nivasuuvira muye.

15Yaga ga kumwigiza kalunu gaveeye amigizu gu Mwami. Kunyi avakoveeye mwoyo, ku lidiku liu Mwami aliiza, sikulimilira yovo avamala kukuza mba. 16Gulakave ho nu mwoyo munene gwu kulanga, kandi nu mwoyo gwe engelosi Munene, kandi nugwi kisiriva cha Nyasaye, maku Mwami mwene aliika kutura mwigulu. Yavo vaakuza nivasuuvira mu Kristo valakasimuguki kutanga. 17Kunangwa kunyi avakukiri mwoyo ing'inga yeyo kulakavungizwi harara navo mu malesi kwaganira mwami mu vwerefu; na ndio kulava harara nu Mwami mihiga ni mihiga. 18Kunangwa mu leminyane mioyo munyi aveene naveene namakuva yaga.

Mwetegeke ku Lidiku liu Mwami

Currently Selected:

1 VATESALONIKE 4: LOGOOLI

Highlight

Copy

Compare