1 SAMWELI 3
3
Yahova Yivuula ku Samweli
1Mu madiku yago, lwa muyaayi Samweli yaali natumikira Yahova hasi hu vwimiliri vwa Eli, gaali ho amakuva makekeeke vuzwa kutura ku Yahova, na malola kutura kuye sigali ho vuli ing'inga mba.
2Vudiku vulala, Eli, waali ahimbi kuvakula, yaali naagonaa mu keng'oze chiche. 3Samweli yaali naagonaa hatakatifu; aha Lisandugu litakatifu lie Lilagana lia Nyasaye liali. Ni vukikiri kucha, itaya nichakaa, 4Yahova yalanga, “Samweli! Samweli!” Samweli yativura, “Yee, Mwami mbeeye hano!” 5Yazia vwangu ku Eli navoora, “Waali kuunanga, na inzi mbeeye hano.”
Navuzwa Eli yamutivulira, “Inzi singulangi da; yirana ogone kandi.” Kunangwa Samweli yirana kogona.
6Yahova yalanga kandi, “Samweli!” Samweli yavuka kandi nazia ku Eli navoora, “Mbeeye hano, waali kuunanga!”
Eli yamuvolera, “Mwana wange, inzi singulangi mba. Yirana ogone kandi.”
7Samweli siyamanya ndi ni Yahova uwamulanga mba, kigira Yahova yaali nakikiri kwivuula kuye.
8Yahova yalanga Samweli lwa kavaga; yavuka, nazia ku Eli, navoora, “Unaangi na inzi mbeeye hano.”
Ahene yaho, Eli yamanyiriza ndi ni Yahova ulangangi muyaayi Samweli. 9Kunangwa Eli yamuvolera, “Yirana ogone; na niiva alakulanga kandi, ovoole, moloma, Yahova, kigira inzi mutumikiri woovo, mbulira!” Kunangwa Samweli yirana naagona.
10Yahova yaza nasingira ho, naalanga kuli lwa imbiri, “Samweli! Samweli!”
Samweli yativura, “Moloma; mutumikiri woovo mbulirizaa.”
11Yahova yamuvolera, “Lidiku lilala nziza kokora kindu ku vandu va Isiraeli keveeye chukutiihiza ligali, nu mundu woosi uhulira inguuva yeyo alegosa nokogenya ligali. 12Ku lidiku yilio ndatwekiza litihiza liange liosi ku vinyumba ya Eli, kutura ku litanga kuduuka ku keheri. 13Ndaamara kumuvolera ndi ndahaana mageri ku vinyumba yeeye mihiga ni mihiga, kigira vayaayi veve vamala konyega. Eli yamanya ndi vakora ndio, navuzwa siyavagaya mba. 14Kunangwa ndisuuhira avinyumba ya Eli ndi, ‘Uvwoni vwa vinyumba ya Eli sivunyala kwogizwa na masahi gi visiuviliru anaho vihaanwa mihiga ni mihiga kali hakuzu mba.’ ”
15Samweli yaagunza mu vogono kuduuka mugamba; ma navuuka, niyiguula viliango vie inyumba ya Yahova. Yaali nuvuti kovoolera Eli makuva ga malola. 16Eli yamulanga, “Samweli, muyaayi wange!”
Samweli yativura, “Mbeeye hano, mwami!”
17Eli yateeva, “Yahova akovooleeye ki? Utambisa kindu choosi mba. Nyasaye alakuha mageri vululu niiva siulambolera vuli kindu cha akovooleeye mba.” 18Kunangwa Samweli yamuvolera vindu viosi. Siyavisa ku kindu kali kilala mba. Eli yavoola, “Aveeye Yahova; kandi alakola choosi ekelolekaa kuva kilahi kuye.”
19Samweli yaviruka, Yahova yaali naye kandi naakora vindu viosi via Samweli yavoola kuva vieligali. 20Kunangwa vandu vosi va Isiraeli, kutura ku lovega lulala kuduuka ku lovega lundi lwi kivala yicho, vamanya ndi Samweli ligali aveeye muporofeti wa Yahova. 21Yahova yaazizagilira kwivuula ha Shilo, aha yaali naloreki ku Samweli kandi naamolomi kuye.
©Bible Society of Kenya, 2019