1 SAMWELI 2
2
Lisaala lia Hana
1Hana yasaala navoora:
“Mwoyo gwange gusangalanga mu Yahova.
Zinguru ziange zinenehiziywi mu Yahova.
Munwa gwange gosekelizaa avasigu vange,
kigira inzi sangaliraa mu vohonyi vuvwo.
Mbeeye nuvusangali vonene kigira Nyasaye umali kongonya!
2“Sihali noveeye umutakatifu kuli Yahova sihali nuwundi kuli ye
sihali numusooli kuli Nyasaye wiitu.
3Lekera lieyizominya,
leka limoloma liilio liu kwigingira.
Kigira Yahova aveeye Nyasaye oveeye nilimanya,
kandi akalagaa vindu viosi via vandu vakora.
4Uvuta vwa vasikari vi zinguru vuvuniki,
navuzwa vadedekere vanyooye zinguru.
5Avandu vaali ninziguta kalunu
vayinzira ku vaduuki konyoora chukulia,
navuzwa yavo avaari ninzara si vaveeye ni inzara kandi mba.
Mukali mugumba wivuuyi avana saba.
Navuzwa mama wa vayaayi vanyingi
utigaye umwere vugira mwana.
6Yahova yitaa kandi yilanyaa livamwoyo.
Atumaa avandu kuzia mu kivala chavakuzu kandi aviranyia.
7Akolaa avandu valala vadaka, na vandi vatugi.
Agehizaa avalala na vandi avanenehiza.
8Agingaa avadaka igulu kutura mu luguchi,
kandi avukizaa avilienya kutura mu vudinyu vwavo.
Avakolaa kuva avalina va vayaayi va vami vanene.
Na avaviika mu vogono vwu luyali.
Mise jilirova jiveeye ja Yahova;
na kujo yamala kolomba musingi gwi lirova.
9“Asoolaa livamwoyo lia vandu avasuuvirifu veve;
Navuzwa avadamanu vagotelaa mukisundi;
kigira mundu siagutaa kigira zinguru zizie mba.
10Avasigu va Yahova valadivizwa;
alahirigana kuli inguba kutura mwigulu kuvo.
Yahova alakalagira lirova liosi;
Alahaana zinguru ku mwami weve.
Alakola mwami munene mutovole weve kuva ni liguuta.”
11Maku Elikana yirana yengo ha Rama, navuzwa muyaayi Samweli yamenya mu Shilo. Yatumikira Yahova hasi hu musaalisi Eli.
Avayaayi vadamanu va Eli
12Avayaayi va Eli vaali avadamanu ligali; sivahaana ku Yahova luyali mba, 13anoho ku malago galondekanaa ku cha vasaalisi vaali vanyara koteeva kutura ku vandu. Mu vogono yivwo, lwu mundu yaali nahaanaa kisiuviriru chiche ku Yahova, mutumikiri wu musaalisi yaali anyala kuuza nu lwuma lwi zisago zivaga. Lwi inyama iva nekedeekwa, 14yazomaa lwuma yilwo mu inyingu edekaa, na choosi chu vwuma vwatulizaa, chaalange cha vasaalisi. Avaisiraeli vosi avaazaa ha Shilo kuhaana visiuviliru viavo, vakolerwa kuli ndi. 15Komeeda ku kali itinya nikikiri kutulizwa ku, nukusaalulwa, mutumikiri wu musaalisi yaali anyala kuuza no kovoolera mundu uhaanaa kisiuviriru chiche, “Mbe inyama sambiri musaalisi; sialavugilira inyama edeekeeywe kutura ku ivi mba, navuzwa inyama imbisi.”
16Niiva mundu oyo yativulaa, “Leka kokole agaveeye malungi na kusaamba itinya kutanga, ma ku uvuguli choosi cha wenyaa.”
Mutumikiri wu musaalisi yativura, “Awa! Mbe lwene yilu! Nuvula kumba, ndagivugula kuzinguru!”
17Uvwoni yivu vwa vayaayi va Eli vwali vudamanu ligali mu zimoni zia Yahova, kigira vavura kuhaana luyali ku vihaanwa via Yahova.
Samweli ha Shilo
18Mu ing'inga yeyo, muyaayi Samweli yaazizagilira kutumikira Yahova ha Shilo, niyiviiki kisibaho chinguvu yi katani indakatifu. 19Vuli muhiga, mama weve yamulomberaa iganza engekeeke ma amuhilira lwa yaazizaa harara numusaza weve ukuhaana visiuviliru via vuli muhiga. 20Ahene yaho Eli yagasizaa Elikana numukali weve, navoora, “Yahova akohe avana vandi ku mukali uyu, vavuguli vwiyangu vwa uyu wahaana kuye.”
Inyima wa yaga, viranaa yengo.
21Yahova yagasiza Hana ligali, kandi yivula avayaayi vandi vavaga na vakana vaviri. Musoleri Samweli yaviruka mu vutumiki vwa Yahova
Eli na vayaayi veve
22Kalunu Eli yaali musakulu ligali. Yaazizagilira kuhulira goosi aga vayaayi veve vakoleranga Avaisiraeli, kandi kuli vaali harara navakari avatumikanga ha vwingiliru vwi kirivwa kingiraa mu Lihema Litakatifu lia Yahova. 23Kunangwa yavavolera, “Kigira ki mukolanga vindu kuli yivi? Avandu, vambolera makuva gu vwoneku vwa mukoraa! 24Mulekere ligali avana vange! Yiki ni kindu chukuvihiliriza ligali cha vandu va Yahova vamoloma. 25Niiva mundu yonera mundu wundi, Nyasaye anyala kumukinga navuzwa nivwaha unyala kukinga mundu wonera Yahova.”
Navuzwa sivahulira livoora lia baba wavo mba, kigira Yahova yaali nasaviiyi kuvita.
26Muyaayi Samweli yaazizagilira kuviruka nokonyoora livugilirwa na Yahova kandi na vandu.
Ovoporofeti vwi lidivizwa lia Avinyumba ya Eli
27Muporofeti yaza ku Eli na makuva yaga kutura ku Yahova: “Lwa guuga woovo Haruni na vinyumba yeeye vaali avatugwa vu Mwami wa Egebeti, Ndiivuura inzi mwene ku Haruni. 28Ndatovora avinyumba yeeye kuva vasaalisi vange, kutura mu zihiiri ziosi zia Isiraeli, kutumika ha vwali, kusaamba kimuli kandi kwivika kisibaho imbiri wange ukwenya zing'anagani kutura ku inzi. Kandi ndavaha uvunyali vwu kuvugura kedonye chi visiuviliru viukusambwa ku vwali. 29Kigira ki, muheenzaa nu vuhuuvali ku visiuviliru kandi vihaanwa viange via ndalange mbeevwe kutura ku vandu vange? Kigira ki, Eli, uhaanaa luyali ku vana vovo kuvita inzi ku livaleka veekomerize aveeneni vidonye vilahi ligali vie visiuviliru viosi via vandu vange vahaana ku inzi? 30Inzi Yahova Nyasaye wa Isiraeli, ndasuuviriza ku maziambiri ndi avinyumba yooyo na vikiliango chicho valatumikira inzi kuli avasaalisi zing'inga ziosi. Navuzwa kalunu mboraa ndi sindava nago kuli ndio kandi mba! Muvogono yivwo, ndahaana uluyali ku yavo avambeezaa uluyali. Ndachaya yavo avanjayaa. 31Hulirizi, ing'inga yiizaa lwa nanziite avayaayi vosi mu avinyumba yooyo kandi avikiliango chicho, kunangwa avuli kuva ho nu musaza mu avinyumba ulimenya kuva musakulu. 32Ulakubizwa kivi kandi ulahenza nilikendeka ku vugasu vwosi vwa ndihaana ku avandu vandi va Isiraeli, navuzwa avuli ho nu mulala ulimenya kuva musakulu mu avinyumba yooyo. 33Nitali ndaviika mulala ku visukululwi vovo kuva mwoyo kandi alandumikira kuli musaalisi. Navuzwa alagwa mboku na akuze mwoyo, kandi visukululwi vovo vandi vosi valitwa ni kivavi. 34Lwa vayaayi vovo vombi, Hofini na Finiasi vakuza ku lidiku lilala, yiki kilava kelolero kukumanyia ndi goosi aga mali kovora galadukizwa. 35Ndatovora musaalisi uliva musuuvirifu ku inzi. Kandi akole kindu choosi icha nyenya akole. Ndamuha visukululwi, avalitumika kazozo imbiri wu mwami wange mutovole. 36Ku vosi visukululwi vovo avalitigala mwoyo valazia ku musaalisi oyo kandi vamusave mabese ni chukulia, kandi kogoonya vavugilirwi vakonye avasaalisi, kunangwa vaduuki konyoora kindu cha valia.”
©Bible Society of Kenya, 2019