1 YOHANA 2

1Avana vange vayanze, mung'oderaa amakuva yaga; kunangwa muvuli kokora uvwoni. Navuzwa mulala naava naakora uvwoni, koveeye nu mulala okomolomeraa ku Baba, naye ni Yeso Kristo, oveeye umulungi yenyine. 2Kandi Kristo mwene aveeye kisiuviriru chu vwoni vwitu; kandi siaveeye ku vwoni vwitu kwenyine mba, navuzwa kandi nuvwoni vwa vumukivala vosi.

3Nikuva ni kolonda amalago ga Nyasaye, maku, koveeye na agiligali, ndi kwamumanya. 4Oyo ovola, “Ndamanya Nyasaye” navuzwa avula kolonda amalago geege, aveeye mugaadi, kandi agiligali sigaveeye muye mba. 5Navuzwa ku vosi olondaa likuva lilie, vuyanzi vwivwe ku Nyasaye vuduukiziywi muye ligali. Nandio kunyala kuva na agiligali ndi, koveeye ni lisanga na Nyasaye. 6Oyo ovola amenyi mu Nyasaye gamudukira amenye kuli Kristo yamenya.

Lilaga Lihia

7Avalina vange avayaanze, si mung'oderaa lilaga lihia; navuzwa lilaga lia kale lia mwali nalio kutura mu litanga. Lilaga lia kale yili liveeye likuva lia mwahulira. 8Kali ndio, mung'oderaa lilaga lihia kalunu, kigira agiligali galio galoleka mu Kristo kandi mu munyi. Kigira kisundi kivitaa, na uvulavu vwa giligali vumali kwaaka.

9Oyo ovola aveeye mu vulavu, kandi adunyiraa amwavo weve, akikiri mu kisundi kali kalunu. 10Oyo ovola aveeye mu vulavu, kandi ndi muvwo sihaveeye ni kindu muye ikinyala kolomba umundu wundi kokora uvwoni mba. 11Navuzwa oyo udunyiraa amwavo weve aveeye mu kisundi; vagenda mukisundi na sivamanyi wa vazizaa mba, kigira kisundi kimali kuvakola vavoku.

12Ng'oderaa munyi, avana vange, kigira uvwoni vwinyu vusamiihhiywi kigira lieta lia Kristo 13Ng'odera munyi avababa, kigira mwamanya uyu uwaali ho kutura mu litanga. Ng'odera munyi avasoleri, kigira mumali kuguuta mudamanu.

14Ng'oderaa munyi avababa, kigira mumanya Baba. Ng'odera munyi, avasoleri kigira muveeye ni zinguru, kandi likuva lia Nyasaye limenya mu munyi; kandi mumali kuguuta mudamanu.

15Mutayaanza lirova, anoho kindu choosi chu mu lirova. Niiva mulayaanza lirova, ku simuyaanzaa Baba mba. 16Vindu viosi viveeye vielirova, viveeye liiva liu muviri likayirwa ne zimoni kandi liegingira lie livamwoyo sivitulaa ku Baba mba navuzwa viveeye vie lirova. 17Kivala harara ni vindu viacho viosi via avandu vakayirwa vivitaa, navuzwa uyu okolaa uvulariri vwa Nyasaye ahindiraa imihiga ni mihiga.

Avasigu va Kristo

18Avana vange, ing'inga ye keheri eveeye himbi; kandi kuli mwahulira umusigu wa Kristo yaazaa; kali kalunu avasigu va Kristo avanyingi vamali kololeka, ku yaga kumanya ni ing'inga ye keheri eveeye himbi. 19Vaatura kukunyi, navuzwa sivali mu lisanga lietu mba. Valava nivaali mu lisanga lietu ngano vamenya ni kunyi. Navuzwa vaatura ku kunyi ku vaduuki kumanyikana havulavu kuva, vosi sivaveeye kukunyi mba.

20Navuzwa munyi mumali konyoora Roho Mutakatifu watura ku Kristo, na mwosi mumanya agiligali. 21Si mung'oderaa kigira simwamanya agiligali, navuzwa kigira mwagamanya, kandi kigira mumanya ndi, sihaveeyeho no vovehi kali vulala vutura ku giligali.

22Nivwaha oveeye mugaadi? Ni uyu wambakanaa ndi Yeso aveeye Mesia, umundu kuli uyu aveeye umusigu wa Kristo. Yambakana Baba kandi Mwana. 23Ku vosi uwambakana mwana; siaveeye na Baba mba; kandi ku vosi uvugilira Mwana aveeye na Baba kandi.

24Muleke amigizu gamwahulira kutura mu litanga gamenye mumunyi. Ni mugumira amigizu ga mwahulira kutura mu litanga, mulamenya mu mwana, kandi mu Baba. 25Yaga nigo ga Kristo yakusuuviriza alakuha, nalio ni, “Livamwoyo litahera mba.”

26Vindu yivi mung'oderaa kigira yavo avagerizaa kumugaada. 27Navuzwa ku munyi, Kristo yahaana Roho Mutakatifu weve ku munyi. Ku olohono lwa Roho weve azizagiliraa komenya mu munyi, umundu wundi sigamuduukira mundu wundi amwigizi mba. Navuzwa kuli Roho weve amwigizaa vindu viosi, kandi amigizu geege gaveeye agiligali, kandi sigaveeye gu vugadi mba. Ku mulonde aga Roho yamwigiza kandi mumenye muye mu vuhambani na Kristo.

28Kandi kalunu, avana vakekeeke vange, mumenye mu Kristo, kunangwa lwa alolekaa, kove nuvuluviliri, kandi kuvuli kwivisa mu zisoni imbiri weve ku lidiku lie liza lilie. 29Munyi mumanyi vulahi ndi Kristo aveeye umulungi; kunangwa gamudukira mumanye ndi mundu woosi okolaa agaveeye malungi aveeye mwana wa Nyasaye.

Avana va Nyasaye

Currently Selected:

1 YOHANA 2: LOGOOLI

Highlight

Copy

Compare