Zekaria 11
11
1Igula miliangu gyigyo, O Lebanon, muliru gu duke kusamba mitaragwa gyigyo. 2Kupa tsikwili O cyprus, kigira mutaragwa gu gwiye, kigira misala milahi gyonomlyeywi: mu kupe tsikwili mwinye misala gya Bashan, kigira mulitu gwetsingulu gwiki hasi. 3Mwoyo gwelikupa tsikwili gwa avayi kigira ubukumi bwavo bwononnyeywi: mwoyo gwelifwuma lyeving'ang'a visoleli kigira luyai lwa Yordani lwononnyeywi.
4Yahova Nyasaye wange a vola; Waye kyayo kyokwiitwa; 5ama, gondi ga yavo ava veye nago viita, navo velanga avene ava ta li neli, hyola ku kindu; na yavo ava ga gulidzanga va vola, Yahova a gasi dzwe, kigira inze mbeye mutugi; na yavo avayi vago avene si va ga vererera mba. 6Kigira inze si nda vererera ava menyanga mu kivala yiki kandi mba, Yahova a vola: navutswa henza, nda va vika sa mulala mmukono gwomutende wewe, nommukono gwomwami wewe: na va la kuya kivala, na si nda va honnya kutwula mmakono gavo. 7Kuna ngwa ndaya kyayo kyokwiitwa, ligali avang'afu vekyayo. Na ndenyolera tsimpimbo tsiviri; indala nda gi gulika Ubulahi, neyindi nda gi gulika Viboheru; na ndaya kyayo. 8Na nda twulidza avayi vavaka ku mweli mulala; kigira va luhidza mwoyo gwange, navo kandi myoyo gyavo gya ndunyira. 9Ma nda vola, Si ndaya mwinye kandi: u kudzanga, a kudze; na u twulidzangwa a twulidzwe; na va tigala va lie sa mulala inyama yomubiri gwa wakye. 10Na nda vugula impimbo yange ya langwa Ubulahi, nda gi vunannya vihiru viviri, nduke kwononnya lilagana lyange lya nda lombn na avandu vosi. 11Lyononnywa mu lidiku zana yilyo; ni ndiyo avang'afu mu kyayo yavo avambulira va manya yili li veye likuva lya Yahova. 12Na nda va volera, Ni mu lola bulahi, mu mbe amadanyi gange; ni ga va ni ga ta veye ndiyo, mu leke. Ma va ngerera vidonye makumi gavaka gefetha kuva madanyi gange. 13Na Yahova ya mbolera, U sigisira mulongi, livalidza lilahi yili lya yavo va validza inze. Ma nda vugula vidonyi makumi gavaka vyefetha, na va sigisira mulongi, mu inyumba ya Yahova. 14Ma nda vunannya vihiru viviri impimbo yange ya kaviri, ya langwa Viboheru, nduke kwononnya ubumitu bwa li hagati ha Yuda na israeli.
15Na Yahova ya mbolera, U vugule kandi viju vyomwayi musiru. 16Kigira, henza, nda singeridza mwayi mu kivala, u li vula kutsia kuhenza yavo avagoti, kinga kwenya avasalannywa, kandi si a la honya avononnywa, kinga kulagiridza ava veye avalamu; navutswa a la lia inyama yomubiri gwomukomeru, nokutandula tsimbagayu tsyavo. 17O bayaye umwayi u ta konya kindu, u lekanga kyayo kivavi ki la va ku mukono gwigwe, noku imoni yeye ye nomukono mulungi: mukono gwigwe gu la va mwumu ligali, nemoni yeye yenomukono mulungi i la va kilive ligali.
Currently Selected:
Zekaria 11: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
