Zekaria 10
10
1Mu saale imbula ku Yahova ku inyinga yembula yekyubwi, uyu Yahova u lombanga uluheni; naye a la va ha lunyirira lwembula, mundu sa mulala a la hebwa bunyasi mmulimi. 2Kigira vifwananyi vi volanga vutswa, na vagimba va lolanga bubehi; na va volanga vya maloto gobubehi, lileminya mwoyo lyavo li veye lya vutswa: kigira yaga va tsitsanga kuli magondi, va dambidzwa, kigira si ha veye nomwayi. 3Ubutima bwange bwaaki ku avayi, na nda kalagira tsikole; kigira Yahova wa mahe a henzanga kyayo kikye, inyumba ya Yuda, na a la va kola va ve kuli iparasi yeye indahi inyinga yobulwani. 4Ligina lyolwiga li la twula kuye, nomsumari, nobuta bwobulwani bu la twula kuye, ku vosi avamehanga va la twula kuye. 5Na va la va kuli avobunyali, va duvaga vasigu vavo mbudohi bwoku mahasi mbulwani; va la lwana kigira Yahova a veye halala navo; navo ava nina ku tsiparasi va la genya. 6Na nda vika tsingulu ku inyumba ya Yuda, na nda honnya inyumba ya Yosefa, na nda galukidza yavo kandi; kigira mba vereye tsimbabasi; navo va la va kuli ava nda vula kuta: kigira mbeye Yahova Nyasaye wavo nda va hulira. 7Na yavo va Efiraim va la va kuli mundu wobunyali, myoyo gyavo gyi la sangala kuli gyi veye newaini; yee, avana vavo va la lola inkuva yiyi, na va la sangala; myoyo gyavo gyi la sangala mu Yahova.
8Nda va langira, nokuvavungidza; kigira mba tungiye; navo va la medeka kuli va medeki. 9Nda va midza hagati ha avandu; na va lidzulitsa inze mu vivala vyehale; na va la menya halala na avana vavo, na va la galuka. 10Kandi nda va leta kutwula mkivala kya Egepeti, nokuvavungidza kutwula mkivala kya Asuria; na nda va vika mu hivala kya Gileadi na Lebanon; nobuiyangu si bu la loleka bwokuvaduka. 11Naye a la vita hagati henyanza yelidambidza, nokukuya viguvuli vyenyanza, noluliva lwosi lwomugera gwa Nile lu la kama; noluyai lwa Asuria lu likidzwa, na impimbo yobwami ya Egepeti i la gota. 12Nda va vika tingulu mus Yahova; na va la genda yiyi na yiyi mu lieta lilye, Yahova a vola.
Currently Selected:
Zekaria 10: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
