Tito 2
2
1Navutswa ive, u vole vindu vi dukananga namegidzo gobulamu. 2Wegidza avakulundu va ve avadukanu, avobugoosi, avobugeeri obwere avalamu mu lisuuvira, nomu buyanzi nomu bwikudziri: 3kandi avakali avakulundu va ve ndiyo, va ve neligenda li dukananga nobutakatifu, va ta va avahudziridzi, kinga avatugwa vewaini inyingi, va ve avegidzi avevindu vilahi; 4va duke kugerehidza avakali vanyerere va yanze avasatsa vavo, na kandi va yanze avana vavo, 5avobugeeri obwere, navanifu ava kolanga miyinzi mu inyumba avagasu, navegehi dzira avasatsa vavo avene, likuva lya Nyasaye li vule kunyegwa. 6Kandi avasoleli ndiyo u va tsuve va ve nobugeeri obwere. 7Ku vindu vyosi welang'aminye u ve kyokuhenzera ku kyemiyinzi milahi; mu megidzo gogo u lang'aminye aga tonekanga nobugoosi, 8livola lyobukonyi ii ta nyala kuvolwa ku kindu; uyu u hing'ananga a duke kulegannywa, kigira si a veye nekya a vola ku kwinye kidamano. 9Wegidze avatugwa vegehidze avene ku vanene vavo, va va yanzidze ku vindu vyosi; va ta va namahangali; 10va ta va averondehidzi, navutswa va lang'aminye ubusuuvirifu bulahi bwosi: va duke kusiaha amegidzo ga Nyasaye Muhonnyi wetu ku vindu vyosi. 11Kigira tsimbabasi tsya Nyasaye tsi mali kuloleka, tsi letanga ubuhonnyi ku vandu vosi, 12nokwegidza kwinye, kuduka kwinye kwambakane ubudamano nelikayirwa lyevyelirova, ku menye nobugeeri obwere, nobulungi nelitibwa, lya Nyasaye mu inyinga yiyi; 13ku henzerere lisuuviridzwa lyobugasu, nelilang'ama lyobukumi bwa Nyasaye munene no Muhonnyi wetu Yesu Kristo; 14wehaana kigira kwinye, a duke kutungira kwinye ku twule mu bwebaali bwosi, mwene ya siiya avandu va ve avandu veve mwene avagulu ku miyinzi milahi.
15U vole amakuva yaga, weganehidze, wambakannye netsingulu tsyosi. U ta leka mundu kali mulala a ku lege.
©Bible Society of Kenya, 1967