Varumi 6
6
1Kunangwa ku la vola ndi? Ku menye mu bwoni, tsimbabasi tsi duke kukira? 2Ga ta va ndiyo. Kwinye kwa gwa avakudzu ku bwoni, ku nyala ndi kumenya mubwo? 3Si mu manya kwinye kwosi ava kwa batidzwa mu Yesu Kristo kwa batidzwa mu likudza lilye? 4Kunangwa kwa tebwa halala naye ku libatidzwa mu likudza: kuli Kristo ya simugukidzwa nobukumi bwa Dada kutwula mu vakudzu, kandi kwinye ku nyale kugenda mu buhya bwelivamwoyo. 5Kigira ni ku va ni kwung'anywa naye mu lugano lwelikudza lilye, kandi ndiyo ku lung'anywa naye mu lugano lwelisimuguka lilye. 6Ku manya yaga, mundu wetu wa kale ya bambwa halala naye, mubiri gwobwoni gwononywe, ku ta va kandi avatugwa vobwoni. 7Kigira u kudzi a veye muboholole ku bwoni. 8Navutswa kwinye ni ku va ni kwa kudza halala na Kristo, ku suuvira ku la va mwoyo halala naye kandi. 9Ni ku manya ndi, Kristo ya simugukidzwa, si ya kudza kandi; likudza si lyameha kuye kandi. 10Kigira likudza lya ya kudza, ya gwa mukudzu ku bwoni lulala: navutswa livamwoyo lya a veye mwoyo, a veye mwoyo ku Nyasaye. 11Kandi mwinye ndiyo mwevalidza mwinye avene mu veye ava gwiye avakudzu ku bwoni, navutswa mu veye ava veye mwoyo ku Nyasaye mu Kristo Yesu.
12Kunangwa mu ta bugirira bwoni kwameha mu mibiri gyenyu gyelikudza, mu duke kuhulira likayirwa lyabwo. 13Kandi mu ta hila vivero vyenyu mu bwoni, kuli viju vyobwoneku; navutswa mwihile ku Nyasaye, kuli ava veye mwoyo kutwula mu vakudzu, ne vivero vyenyu vi ve kuli viju vyobulungi ku Nyasaye. 14Kigira ubwoni si bu lameha ku mwinye mba: kigira si mu veye ku lilaga navutswa mu veye ku tsimbabasi.
15Kunangwa ni kindu ki? Ku kole ubwoni kigira si ku veye ku lilaga, navutswa ku tsimbabasi? Ga ta va ndiyo. 16Si mu manya, uyu wa mwihila kuye kuli avatugwa nokuhulira, mwinye mu veye avatugwa va uyu wa mu hulira; ni mu va ni mu veye ku bwoni kuduka likudza, naho ni mu veye ku lihulira kuduka ubulungi? 17Navutswa Nyasaye a santidzwe, kigira kuli lwa mwa li avatugwa vobwoni mwa hulira nemyoyo gyenyu lugano lwelyegidza yilyo lya mwa vikwa mu; 18ma lwa mwa gwa avaboholole ku bwoni, mwa gwa avatugwa vobulungi. 19Mbola kuli mundu, kigira ubudedekere bwemibiri gyenyu. Kigira kuli mwa hila vivero vyenyu kugwa avatugwa vobudamano navekirage kuduka kirage kindi, ndiyo kandi kalunu mu hile vivero vyenyu vi gwe avatugwa vobulungi kuduka mu butakatifu. 20Kigira lwa mwa li avatugwa vobwoni, mwa li avaboholole ku bulungi. 21Inyinga zana mwa li namakuyu ki mu vindu vya mu veye soni navyo kalunu? Kigira kiheri kyevindu yivyo ni likudza. 22Navutswa kalunu, ni mu mali kukolwa ndi avaboholole kutwula ku bwoni kugwa avatugwa va Nyasaye, mu veye namakuyu kuduka ku butakatifu, nekiheri ki veye livamwoyo lyemihiga nemihiga. 23Kigira madanyi gobwoni ni likudza; navutswa kihaanwa kya Nyasaye ki veye livamwoyo lyemihiga nemihiga mu Kristo Yesu Mwami wetu.
Currently Selected:
Varumi 6: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
