Varumi 16
16
1Mbiki imbiri wenyu mbotso wetu Febe, u veye mutumwa welivugana li veye mu Kenkerea: 2mu mu bugirire ku Mwami, kuli wa ga dukira avatakatifu, kandi mu mu konye ku vindu vyosi vya yenya ku mwinye: kigira uyu mwene ya li mukonyi wavanyingi, kandi va konya inze mwene.
3Mu nchelidzire Prisila na Akula avayinzira halala ninze mu Kristo Yesu, 4ava haana magoti gavo kigira livamwoyo lyange; si mba santidza tsyeng'ine, navutswa mavugano gosi ge Tsihiri: 5kandi mu nchelidzire livugana li veye mu inyumba yavo. Kandi mu nchelidzire Epainito muyanze wange, u veye ubuhya bwa Asia ku Kristo. 6Mu nchelidzire Maria, wa mu kolera miyinzi minyingi. 7Mu nchelidzire Anderoniko na Junia, aviko vange, kandi va veye vahambe halala ninze, ava manyekana ku vatumwa, ava li mu Kristo imbiri wange. 8Mu nchelidzire Ampliato muyanze wange mu Mwami. 9Mu nchelidzire Urubano wa yinzira halala ninze mu Kristo, na Sitahusi muyanze wange. 10Mu nchelidzire Apele wa bugirirwa mu Kristo. Mu nchelidzire yavo avenyumba ya Arisitobulo. 11Mu nchelidzire Herodioni mwiko wange. Mu nchelidzire yava avenyumba ya Narikiso, ava veye mu Mwami. 12Mu nchelidzire Turufana na Turufosa ava yinziri mu Mwami. Mu nchelidzire Perisi muyanze wa yinzira ligali mu Mwami. 13Mu nchelidzire Rufusu mutovole mu Mwami, kandi mama wewe, naye ni mama wange kandi. 14Mu nchelidzire Asunkirito, na Felegona, na Herime, na Pateroba, na Herima, na vamitu ava veye halala navo. 15Mu nchelidzire Filologo na Julia, na Nerea, nambotso wewe, na Olumpa, navatakatifu vosi ava veye halala navo. 16Mu chelidzane mwinye avene navene nelibusa litakatifu, Mavugano gosi ga Kristo ga chelidza mwinye.
17Kalunu mmu goonya ligali avamitu, mu henze yava ava leta lyavukana nelyekigitala, vi hing'ana namegidzo ga mweyegidza: kandi mu girunkane mu va leke. 18Kigira ava veye ndi si va tumekira Kristo Mwami wetu, navutswa va tumekira inda yavo, kandi va gada myoyo gya yava ava ta li nobudamano ku livola lyavo lidoto. 19Kigira lihulira lyenyu li vuuliki mu vandu vosi. Kunangwa nyanza ligali kigira mwinye: navutswa nyenyu mu ve avageeri ku malahi, kandi mu vule kuva nobugeeri ku madamano. 20Nyasaye wemirembe a la syonola Setani isi wevirenge vyenyu kalunu ndi. Tsimbabasi tsyo Mwami wetu Yesu Kristo tsi ve nemwinye. 21Timoteo u yinzira halala ninze a mu chelidza; kandi Lukio na Yasoni, na Sosipataro, aviko vange.
22Inze Teritio, wa ng'oda ibaruwa yiyi, nchelidza mwinye mu Mwami. 23Gayo wa ng'enihi ho kandi u genihidzi livugana lyosi, a chelidza mwinye. Erasto umulindi wevindu vyelidala a mu chelidza, kandi Koarito amitu wetu. 24Tsimbabasi tsyo Mwami wetu Yesu Kristo tsi ve halala ne mwinye. Amini. 25Kalunu ku uyu u nyala kuluviridza mwinye kuli ivangeli yange kandi kuli lilwadza lyamakuva ga Yesu Kristo, kandi kuli livuulika lyagaviswa ga vikwa makiriri mu tsinyinga tsyemihiga nemihiga, 26navutswa kalunu ga lang'aminyeywi ku makuva ga vaprofeti, kuli lilaga lya Nyasaye u veye wemihiga nemihiga ga mannyeywi ga duke ku Tsihiri tsyosi va duke ku lihulira lyelisuuvira: 27Nyasaye u veye nobugeeri ye ng'ine, lidzominywa li ve kuye mihiga nemihiga kigira Yesu Kristo. Amini.
Currently Selected:
Varumi 16: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
