Zaburi 72
72
Zaburi ya Solomani.
1O Nyasaye, u he mwami likalaga lilyo,
Na ubulungi bubwo ku mwana womwami.
2A la kalagira avandu vovo nobulungi,
Na avadaka vovo nobulungi.
3Vigulu vi la letera avandu mirembe,
Kandi tugulu, mu bulungi.
4A la kalagira avadambi va avandu
A la honnya avana va avadaka
Na a la shonolannya mudambidzi.
5Va la ku tia inyinga yosi yeliuva li hindira ho,
Kandi inyinga yomweli kuduka ku visukululwi vyosi.
6A lika ku lirova kuli imbula i kupanga ku ubulimu bu kalageywi,
Kuli imbula yamadzi mavovo ku lirova.
7Mu madiku gege avalungi va la gasidzwa,
Na mirembe minyingi kuduka mweli gu fweye.
8A lameha kutwula ku inyanza yiyi nokuduka ku yiyi
Kandi kutwula ku Mugera kuduka ku kiheri kyelirova.
9Ava menya mwigendanyama va linama imbiri wewe;
Na avasigu veve va la komba ulugukyi.
10Avami va Tarshishi na avevisulu va la leta ubusutu:
Avami va Sheba na Seba va la leta vihaanwa.
11Yee, avami vosi va la mu sigamira;
Na tsihiri tsyosi tsi la mu tumekira.
12Kigira a la honnya mudaka inyinga yanira,
Na mudambi u ta li nomukonyi.
13A la vererera mudaka, na avadambi,
Na a la honnya myoyo gyava dambi.
14A la honnya myoyo gyavo gyi twule mu lidambidzwa nomu linuulwa;
Na masahi gavo ga la va nobugulibudinyu imbiri wewe:
15Na va la hindira; naye a la hebwa ithahabu ya Sheba:
Na avandu va la mu saalira kazozo;
Va la mu gasidza lidiku lyosi.
16Ha la va nobuswage bunyingi mu lirova ku isonga ye vigulu;
Makuyu galyo ga la dengeya kuli Lebanon: Na yavo avelidala
va la gasidzwa kuli bunyasi bwelirova.
17Lieta lilye li hindira mihiga nemihiga;
Lieta lilye li la hongera kuva kuli liuva:
Na avandu va la gasidzwa muye;
Tsihiri tsyosi tsi la mu goha mugasu.
18A gasidzwe, Yahova Nyasaye, Nyasaye wa Israeli,
U veye yeng'ine mu likola vyokugenya:
19Lieta lilye lyobukumi li gasidzwe mihiga nemihiga
Lirova lyosi lizuye ubukumi bwibwe.
Amini, na Amini.
20Lisaala lya Daudi mwana wa Jesse li tweki.
©Bible Society of Kenya, 1967