Zaburi 71
71
1O Yahova, nsuuviranga mu ive;
U ta ndeka mihiga nemihiga kuva isoni.
2Ku bulungi bubwo u mbonnye na u mboholole:
U yekidze gutu gugwo ku inze, na u mbonnye.
3U ve ku inze lwanda lwobumenyi bwange, lwokwingira mu kazozo:
U mali kulaga mbonywe;
Kigira ive u veye lwanda lwange, na impinga yange.
4O Nyasaye wange, u ntwulidze mmukono gwomudamano,
Ku mukono gwomundu u ta li mulungi na wekirage.
5Kigira ive u veye lisuuvira lyange, O Mwami Yahova:
Ive u veye lisuuvira lyange kutwula bwana buke.
6Nsingeridzeywi nive kutwula ku livulwa lyange;
Ni ive wa ntwulidza mmunda mwa mama wange:
Lidzominya lyange li la va ku ive kazozo.
7Inze mbeye kyokugenya ku avanyingi;
Navutswa ive u veye kyokwivisa mu kyange kyetsingulu.
8Munwa gwange gu lizula nelidzominywa lilyo,
Kandi nobukumi bubwo lidiku lyosi bei.
9U ta nsyuva inyinga yobusakulu bwange;
U ta ndeka inyinga yetsingulu tsyange tsi geha.
10Kigira avasigu vange va tala lieta lyange;
Navo ava gonekanga mwoyo gwange va volerana.
11Ni va vola, Nyasaye u mu leki vutswa:
Mu mu londe na mu mgumire; kigira si ha veye nowokumu honnya.
12O Nyasaye, u ta va ihale ku inze;
O Nyasaye wange, u kole bwangu kunkonya.
13Yavo avasigu vomwoyo gwange va ve isoni na va heridzwe;
Va kunikwe nelileganywa nelivula kwidzominywa avenyeranga inze kivi.
14Navutswa nda suuvira kazozo,
Na nda kwidzominya munonono kuvita.
15Munwa gwange gu la vola ubulungi bubwo,
Kandi ubuhonnyi bubwo lidiku lyosi bei;
Kigira si manya livalidzwa lyabuo.
16Ndadza nevikolwa vyetsingulvya Mwami Yahova:
Ndidzulitsa avandu ubulungi bubwo, na bubwo bweng'ine.
17O Nyasaye, ive u nzegidzi kutwula bwana buke;
Nokuduka kalunu nandidzanga makuva gevikolwa vivyo vyokugenya.
18Yee, kali lwa mbeye musakulu nowetsimbudze, u ta ndeka, O Nyasaye,
Nduhe mbole tsingulu tsitsyo ku kisukululwi yiki,
Na ubunyali bubwo ku vosi avadzanga.
19Kandi, O Nyasaye, ubulungi bubwo bu veye igulu ligali;
U koli vindu vinene
O Nyasaye, ibwaha u leng'ana na ive?
20Ive u ku mannyi kivi kinyingi na budamano,
U la ku singeridza kandi,
Nokukutwulidza kandi mu ng'ani.
21Ive u mede ubunene bwange,
Wirane kandi u leminye mwoyo gwange.
22Kandi ndidzominya ive nobukana,
Kali ageligali gogo, O Nyasaye wange:
Nda kupira ive limuga kukwidzominya O ive, Mutakatifu wa Israeli.
23Minwa gyange gyi la kupa lwanga lwobusangali, lwa nyimba lidzominywa lilyo;
Na mwoyo gwange gwa u honnyi.
24Ululimi lwange lu la vola ubulungi bubwo lidiku lyosi bei;
Kigira yava avenyeranga inze kiviva veye isoni na va leganniywi.
©Bible Society of Kenya, 1967