Matayo 9
9
1Ya nina mu liato, ni yambuka na a duka mu lidala lilye. 2Kandi henza, va mu letera mundu wa fwogoya na a gona ku kitali: na Yesu lwa ya lola lisuuvira lyavo ya volera wa fwogoya, U leme mwoyo, mwana wange, u sameheywi bwoni bubwo. 3Kandi henza, avalala ku vang'odi va vola mmyoyo gyavo, Mundu uyu a nyeganga. 4Yesu ya manya tsi ganagani tsyavo na a vola, Kigira ki mu ganagana ndi ubudamano mmyoyo gyenyu? 5Li veye liangu ni li li ha, kuvola, Bwoni bubwo bu sameheywi; naho kuvola, Singira u gende? 6Navutswa mu duke kumanya Mwana wa Adamu a veye netsingulu mu lirova kusameha ubwoni (hene yaho ya volera wa fwogoya), Singira, u vugule kitali kikyo u tsie yengo wowo. 7Na a singira na a tsia yengo wewe. 8Navutswa viduma lwa vya lola, va genya ni vidzominya Nyasaye wa ha avandu tsingulu kuli yitsi. 9Yesu lwa ya vita kutwula yaho, ya lola mundu wa langwa Matayo ni yikaye ha va sololera ubushutu: ya mbolera, U nonde. Naye ya singira na a mu londa.
10Lwa yikala kulia munyumba, henza, avasololi vobushutu vanyingi navoni vadza ni vikala halala na Yesu navegidzwi veve. 11Avafarisayo lwa va lola yaga va volera avegidzwi veve, Kigira ki Mwegidzi wenyu a lia halala navasololi vobu shutu navoni? 12Naye lwa ya hulira, ya vola, Avalamu si venya wetsinyasi, navutswa avalwaye veng'ini. 13Navutswa mu tsie mweyegidze amakuva yaga; Nyenya tsimbabasi, si nyenya visyuviriru; kigira si ndadza kulanga avalungi navutswa kulanga avoni.
14Hene yaho avegidzwi va Yohana vadza kuye ni va vola, Kigira ki kwinye na Vafarisayo ku honga lilia kanyingi, navutswa avegidzwi vovo si va honga lilia? 15Yesu ya va volera, Avalina voserereywi si va nyala kulira lwa userereywi a veye halala navo? Navutswa madiku ga ladza userereywi lwa a li twulidzwa, kunangwa va la honga lilia. 16Ka ndi si ha veye nomundu u nava kilave kyengubo imbisi kungubo i kunguhi; kigira yikyo kya vikwa kuhanera ki tandula i kunguhi, kunangwa litandula li daswa. 17Kandi avandu si va tsuka iwaini impya mu tsimuya tsinkulu: ni va kola ndiyo tsimuya tsi tanduka ne iwaine ga sunduka, netsimuya tsyoneka: navutsu a va tsuka iwaini impya mu tsimuya tsimpya, na vyombi vi hona.
18Lwa ya va volera amakuva yaga, henza, munene yadza kuye na a msigamira na a vola, Mkana wange u mali kukudza kalunu: navutswa hamba u vike kuye mkono gugwo ma a la va mwoyo. 19Yesu ya singira na a mlonda halala navegidzwi veve. 20Kandi henza, mkali wa li na a lwala litadza masahi mihiga likumi negyiviri, yadza inyima na a mu dira ku lukigiti lwengubo: 21kigira ya vola mkiritu, Ni ndira ku ingubo yeye vutswa, nda hona. 22Navutswa Yesu yekevuka na a mlola, ya vola, Mkana wange, lema mwoyo, lisuuvira lilyo li ku honnyi. Mkali ya honnywa kutwula isaa yeyo. 23Yesu lwa ya duka mu inyumba yomunene, na a lola ava kupa visiliva, nekiduma ki kola liyoga, 24ya vola, Mwisunde: ki gira mkana si a kudzi mba navutswa a gona. Navo va mseka ni va mkolera kihenyahenye. 25Navutswa kiduma lwa kya twulidzwa, yingira na a mgumira mkono gwigwe; na mkana ya singira. 26Lukumi lwemiyinzi yikyi lwa landa mu kivala yikyo kyosi.
27Yesu lwa ya vita na a twula ho, avaboku vaviri va mu londa ni va lira, ni va vola, U ku vererere, ive Mwana wa Daudi. 28Lwa ya mala kwingira mu inyumba avaboku vadza kuye: na Yesu ya va volera, Mu suuvira inze nyala kukola yiki? Va mbolera, Yee, Mwami. 29Hene yaho ya dira tsimoni tsyavo, na a vola, Kuli lisuuvira lyenyu mu nyole. 30Na tsimoni tsyavo tsya kunulwa. Yesu ya veganehidza ligali na a va volera, Mu henze bulahi, mundu a ta manya kali mulala. 31Navutswa va twula ni va kuminya amakuva gege mu kivala yikyo kyosi. 32Lwa va twula ho, henza, va mu letera mundu idimbidi welidemone lya mu gumira. 33Lidemone lwa lya kungwa, idimbidi ya vola: na viduma vya genya ni vi vola, Si ga lolwa ndiyo mu Israeli. 34Navutswa Vafarisayo va vola, A twulidza amademone netsingulu tsyomwami wamademone.
35Yesu ya vodonkana mu madala gosi na mu tudala na yegidza mu masomero, ni yilwadza ivangeli yobwami, na a honnya tsinkudzo tsyosi nobudekeranu bwosi. 36Navutswa lwa ya lola viduma ya va vererera, kigira va li ni va damba ni va sala nnywa kuli magondi aga ta li nomwayi halala. 37Hene yaho ya volera avegidzwi veve, Ligesa ni linene navutswa avagesi va geha. 38Mu saale Mwami mwene ligesa, a hile avagesi mu ligesa lilye.
Currently Selected:
Matayo 9: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
