Matayo 20
20
1Kigira ubwami bwomigulu bu fwanana nomundu mwene inyumba, wa twula mugamba tsuri kwenya avayinziri vekizabibu kikye. 2Lwa ya mala kulagana navayinziri ishilling lidiku lilala, ya va tuma mu kizabibu kikye. 3Kandi kuduka isaa yetsivaka ya tsia na a nyola avandi va singiye mu kitu va gunza vutswa. 4Kandi ya va volera, Mu tsie mu kizabibu, kandi ku vyosi ki veye kilahi nda mu ha. Navo va tsia mu kizabibu. 5Kandi kuduka isaa yetsitanu na indala, kandi kuduka isaa yetsitanu na tsine, ya kola ndiyo. 6Kandi kuduka isaa yelikumi na indala ya tsia na a nyola avandi va singiye; na a va teva, Kigira ki mu singira hano lidiku lyosi mu gunza vutswa? 7Navo va tivula, Kigira si ha li nomundu wa ku lagana naye. Ya va volera, Kandi mwinye mu tsie mu kizabibu. 8Mgolova mwene kizabibu ya volera mulindi wewe, Langa avayinziri u va tunge umutungu, u tange kutunga avenyima kuduka kuvo avembiri. 9Ava tsia isaa likumi na indala, lwa va duka va tungwa sa mulala ishilling. 10Avembiri lwa va duka, va ganagana Kwinye ku la daswa; navutswa yava kandi va tungwa sa mulala ishilling. 11Lwa va tungwa va monya mwene inyumba, 12ni va vola, Yava avenyima va koli isaa indala yeng'ine, na ive u va leng'anya na kwinye ku koli miyinzi gyelidiku kandi ku loli mbasu munene. 13Navutswa ya tivula, na a volera mulala kuvo, Mulina, si nku kolera ubudamano: ive si u lagani ninze ishilling? 14Vugula kikyo, u tsie; nyanza kuha avenyima kuli nda ku ha. 15Si bu li bulahi inze nkole kuli wa nyanza ku vindu vyange? Naho imoni yoyo i veye indamano kigira inze mbeye mulahi. 16Ndi avenyima va la va avembiri, navo avembiri va la va avenyima.
17Yesu lwa yanegira na a tsia Yerusalemi ya hila avegidzwi likumi na vaviri ha vandu va ta li, na ku inzira ya va volera, 18Henza, kwanegira kutsia Yerusalemi; na Mwana wa Adamu a la zamwa ku vasalisi navang'odi; navo va la mu kalagira yiitwe, 19na va mu vike mu makono ge Tsihiri va duke kumukolera kihenyahenye nokumukuya nokumubamba: ku lidiku lya gavaka a la simugukidzwa.
20Hene yaho yadza kuye mama wa vana va Zebedayo, navana veve, na a mu sigamira na a mu saava kindu kilala. 21Naye ya mu teva, Wenya ki? Ya mu volera, U haane munwa ku vana vange vaviri yava vikale, mulala ku mkono mulungi gugwo na wundi ku mkono mmosi gugwo, mu bwami bubwo. 22Navutswa Yesu ya tivula na a vola, Si mu manya kya mu teva mba. Mwinye mu nyala kunwera ku kikombe kya nyenya kunwa ku? Navo va mu volera, Ku nyala. 23Naye ya va volera, Kikombe kyange ligali mu la nwera ku: navutswa kwikala ku mkono mulungi gwange na ku mkono mmosi gwange, si ki li kyange kuhaana Navutswa ki veye kya yava ava Dada wange ya lombera. 24Ava li likumi lwa va hulira va vihirirwa yava vombi. 25Navutswa Yesu ya va langa vadze kuye, na a vola, Mwinye mu manya avami ve Tsihiri va va tuga, navanene vatsyo va veye netsingulu kuvo. 26Mwinye si mu la va ndiyo: navutswa ku vosi wenya kuva munene ku mwinye a la va mtumekiri wenyu; 27naye wenya kuva mwimiri ku mwinye a la va mtugwa wenyu: 28kuli Mwana wa Adamu si yadza kutumekirwa, navutswa kutumekira, nokuhaana liva mwoyo lilye li ve litungira lya vanyingi.
29Lwa va twula Yeriko kiduma kinene kya mu londa. 30Henza, vaboku vaviri vikala ku luginga lwenzira, lwa va hulira Yesu a vitanga, va mwanira ni va vola, Mwami, mwana wa Daudi, u ku vererere. 31Na kiduma kya va gaya, va kiring'ane: navutswa va kira ligali kwanira, ni va vola, Mwami, mwana wa Daudi, u ku vererere. 32Ma Yesu ya singira na a va langa, na a vola, Mwenya mmu kolere ndi? 33Ni va mu volera, Mwami, kwenya tsimoni tsyetu tsigulike. 34Yesu ya va vererera na a dira ku tsimoni tsyavo; nonoho va nyola lilola ni va mu londa.
Currently Selected:
Matayo 20: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
