Malaki 1
1
1Yibu ni buliduhu bwelikuva lya Yahova lya ng'odu a ku Israeli nomukono gwa Malaki. 2Inze nyanza mwinye, Yahova a vola. Navutswa mu vola, U ku yanzira kuliha? Esau si ya li amwavo Yakobo? Yahova a vola: navutswa nda yanza Yakobo; 3navutswa nda dunyira Esau, na nda kola vigulu vivye hatswa, na miyandu gyigye nda ha vibwe vyombulimu. 4Kali Edoma vola, Kwinye ku duvagirangwa hasi, navutswa ku la galuka nokwombaka mu vyanyi vya lekwa: Yahova wa mahe a vola, Va lombaka, navutswa nda sambula kandi; na vandu va la va langa, Kivala kyobudamano, na Avandu ava Yahova a vihirirwa mihiga nemihiga. 5Na tsimoni tsyenyu tsi la lola, na mu la vola, Yahova yidzominywe kuvita lwako lwa Israeli.
6Mwana muyai yidzominyanga dada wewe, na mutumekiri yidzominyanga wa mu tuga: kunangwa ni mba ni mbeye dada, lidzominywa lyange li veye haliha? Ni mba ni mbeye munene, litibwa lyange li veye haliha? Yahova wa mahe a tevanga mwinye, O avasalisi, ava leganga lieta lyange. Na mu vola, Kwinye ku legeye lieta lilyo ku kindu ki? 7Mu haananga ubukima bwononnywa ku bwali bwange. Na mu vola, Ku kwononnyi ku kindu ki? Ga veye ku livola lyenyu lya mu volanga, Imeza ya Yahova i vedzanga nelilegwa. 8Na lwa mu haananga kiboku kuva kihaanwa, si bu veye budamano? Kandi lwa mu haananga vilema nevilwaye, si bu veye budamano? Haana ku yivi ku Govuna wenyu kalunu; vi la yanzeka kuye? Kinga a la bugirira ive? Yahova wa mahe a vola. 9Mwadza, kalunu, mu saale tsimbabasi tsya Nyasaye, a duke kukuvererera: inkuva yiyi i twuli mmakono genyu: a la bugirira liva lyenyu? Yahova wa mahe a vola. 10Nkano ha veye ho mulala hagati henyu wetegeki kuhana miliango, mu vule kuhambidza muliru vutswa ku bwali bwange si mu yanzeka ku inze mba, Yahova wa mahe a vola, kandi si mbugirira kihaanwa kali kilala mu makono genyu. 11Kigira kutwula ku litonga lyeliuva kuduka ku liyera lyalyo, lieta lyange li veye linene mu tsihiri: kandi hosi kimuli ki la sambangwa ku lieta lyange, na kihaanwa kilahi: kigira lieta lyange li veye linene mu vandu vetsihiri: Yahova wa mahe a vola. 12Navutswa mu lyononnyanga, ku livola, imeza ya Yahova yononnyangwa, na makuyu gayo, kali vyokulia vyayo, ni vyokulegwa. 13Kandi mu vola yaga, Henza, inkuva yiyi i ku luhidzanga ku duka ndi na mwinye mu vi hudzudzanga nemiyeka gyomolo, Yahova wa mahe a vola; na mu leti kya vugulwa nekirage, kandi kilema, na kilwaye; ni ndiyo mu letanga vyokuhaanwa: ga ndukira ku bugirira kindu yiki mmakono genyu? Yahova a vola. 14Navutswa a laamwe uyu u gadanga u veye mu kyayo kikye kisatsa, navutswa a laga, nokuhaana ku Yahova kindu kilema; kigira mbeye Mwami munene, Yahova wa mahe a vola, na lieta lyange li tihidzangwa mu tsihiri.
Currently Selected:
Malaki 1: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
