Kyavalevi 22
22
1Na Yahova ya volera Musa, na a vola, 2U volere Haruni na avana veve, va duke kweyahula avene ku vindu vitakatifu vya avana va Israeli, vya va takasera inze, kandi va tononya lieta lyange litakatifu: inze mbeye Yahova. 3U va volere, Ku vosi mundu wekisukululwi kyenyu kyosi, mu visukululwi vyenyu vyosi, u lisunda himbi ku vindu vitakatifu vya avana va Israeli va takasera Yahova, mundu uyu u veye nobudamano bwibwe, a la twulidzwa a ta va imbiri wange: inze mbeye Yahova. 4Ku vosi mundu wekisukululwi kya Haruni u veye nobugere, kinga u veye nekisununu; uyu a ta lia ku vindu vitakatifu, kuduka lwa a veye mulahi. Kandi ku vosi u dira ku kindu kidamano kyomukudzu, kinga mundu welotera; 5kinga u dira kimolanga kyokumukola mudamano kinga mundu wa a nyala kunyola kuye ubudamano, ku bwosi bwa a veye nabwo; 6mundu uyu u dira ku vyosi kuli yivi, a la va mudamano kuduka mgolova, na si a la lia ku vindu vitakatifu, bugira kwisinga mbiri mu madzi. 7Na lwa liuva li yera a la va mulahi; na a la lia ku vindu vitakatifu, kigira vi veye vyokulia vivye. 8Inyama inkudzu, kinga yiyi yenyama yombulimu i tandula, a ta gi lia, a vule kwivika mu budamano kuyo: inze mbeye Yahova. 9Kunangwa va la gumira malago gange, gase va la ginga ubwoni ku yaga, na va kudza mugo, ni va gononya: inze mbeye Yahova u va takasanga.
10Mugeni si a la lia ku kitakatifu: mumenya womusalisi, kinga mutumekiri u tungangwa, a ta lia ku kindu kitakatifu. 11Navutswa musalisi na a va na a gula mundu ku vosi na ifetha yeye, uyu a la lia kuvyo; navo vivulwa mu inyumba, va la lia ku vyokulia vivye. 12Mwana mukana womusalisi, mugeni na a mu kwa, a ta lia ku kihaanwa kyokugingwa igulu mu vindu vitakatifu. 13Navutswa mwana mukana womusalisi na a va na a veye mukunzakali, kinga musatsa na a va na a va mu leka, na a ta li nomwana, ni yirana kumenya mu inyumba ya dada wewe kuli mu bwana bwibwe, a la lia ku vyokulia vya dada wewe: navutswa ku vageni vosi va ta lia kuvyo. 14Kandi mundu na a va na a lia ku vitakatifu na a ta manya, hene yaho a la meda kidieli kya vitano, nokuha musalisi kitakatifu zana. 15Kandi va tononya vindu vitakatifu vya avana va Israeli, va haananga ku Yahova, 16na ndiyo va kolwa kuginga mahyolo aga leta kindu kuvo, lwa va lia vindu vitakatifu vyavyo: inze mbeye Yahova u va takasanga.
17Kandi Yahova ya volera Musa, na a vola, 18U volere Haruni na avana veve, na avana va Israeli vosi u va volere, Ku vosi mundu wenyumba ya Israeli, kinga ku vageni ava veye mu Israeli, u letanga kihaanwa kikye, ni ki va ni ki veye kilala kyelilagana lyavo, kinga ni ki veye kilala ku vindu vyavo vyokuhaana nomwoyo gwobuyanzi, vya va haana ku Yahova kuva kihaanwa kyokusambwa; 19mu duke kubugirirwa mu la leta kisatsa kidukanu, ku tsing'ombe, kinga ku magondi, kinga ku tsimbuli. 20Navutswa ku mitugu gyosi yigu gu veye nobulema, mu ta gu leta mba: kigira si gu la bugirirwa ku mwinye mba. 21Kandi ku vosi u letera Yahova kihaanwa kyemirembe kuduka kutwulidza lilagana, kinga kihaanwa kyomwoyo gwobuyanzi, ku tsing'ombe kinga ku magondi, ki ve kidukanu kubugirirwa ki ta va nobulema kukyo kali hakuzuzu. 22Ki veye kiboku, kinga kyavunika, kinga kilema, kinga kyavimba, kinga magakala, kinga kyafwuvuka, yivi mu ta haana ku Yahova, kinga kuvilomba kuva kihaanwa kyomuliru ku bwali ku Yahova. 23Ing'ombe kinga ligondi li veye nekindu kya vitirira, kinga kya gehera ku vindu vyevivero vyakyo, u veye nomunwa kulihaana kuva kihaanwa kyomwoyo gwobuyanzi; navutswa kyelilagana si ki la bugirirwa mba. 24Si mu la haana ku Yahova kindu kya saliridzwa, kinga kya duvagwa, kinga kya vunanywa, kinga kya kalagwa; kandi mu ta haana vihaanwa kuli yivi mu kivala kyenyu mba. 25Kandi mu ta haana vyokulia vya Nyasaye wenyu vi twula ku mukono gwomugeni vi veye ku yivi vyosi; kigira ubudamano bwavyo bu veye muvyo, kilema ki veye muvyo: si vi la bugirirwa ku mwinye.
26Na Yahbva ya volera Musa na a vola, 27Inyinga ing'ombe, kinga ligondi, kinga imbuli, yivulwa, i la va halala na innya madiku gatano na gaviri; na kutwula ku lidiku lyagatano na gavzka i la bugirirwa kuva kihaanwa kyokulombwa nomuliru ku Yahova. 28Kandi ni i veye ing'ombe idwasi, kinga ligondi linyavuli, mu ta liita halala nomwana ku lidiku lilala mba. 29Na lwa mu haana kihaanwa kyokusantidza Yahova, mu la kiita mu duke kubugirirwa. 30Ki la libwa ku lidiku zana; mu ta leka kindu kukyo kuduka mugamba: inze mbeye Yahova. 31Kunangwa mu la gumira malago gange kugakola: inze mbeye Yahova. 32Kandi mu tononya lieta lyange litakatifu; navutswa nda takaswa hagati ha avana va Israeli: inze mbeye Yahova u takasanga mwinye, 33nowa mu twulidza mu kivala kya Egepeti, kuva Nyasaye wenyu: inze mbeye Yahova.
©Bible Society of Kenya, 1967