Joshua 7
7
1Navutswa ava Israeli va kola lihyolo ku kya gimwa; kigira Akan, mwana wa Karmi, mwana wa Zabedi, mwana wa Zera, ku ihiri ya Yuda, ya vugula ku kya gimwa: nobutima bwa Yahova bwaka ku avana va Israeli.
2Na Joshua ya tuma avandu kutwula Yeriko kutsia Ai, li veye himbi Bethaven, ku luvega lwevugwe we Betheli, na ya va volera, na a vola, Mu tsie mu lute kivala yikyo. Na avandu zana va tsia ni va luta lidala lya Ai. 3Ma virana ku Joshua, nokumuvolera, Avandu vosi va ta tsia mba; navutswa va tsie avandu kuli tsielfu tsiviri kinga tsivaka kwanegira nokuduya Ai; u ta dambidza avandu vosi kutsia yo; kigira va veye vakekeke. 4Kunangwa avandu vasatsa ava duka kuli tsielfu tsivaka mu avandu yava va tsia: navo viruka imbiri wa avandu va Ai. 5Na vasatsa va Ai va duya kuvo avandu ava duka makumi ga vaka na vatano na mulala; na va va kunga kutwula imbiri wekiribwa kyelidala kuduka Shebarim, na va va duya ha kisulungutu: nemyoyo gyavandu gya yenguka ni gyi gwa kuli amadzi.
6Ma Joshua ya tandula tsingubo tsitsye, na a gwa mammama imbiri welisanduku lya Yahova na a va ho kuduka inyinga ya mgolova, uyu na vakulundu va Israeli; veyuhira uluguki ku mitwe gyavo. 7Na Joshua ya vola, Bayaye, O Mwami Yahova, kigira ki ive wambukidza avandu yava mugera gwa Yordani, kukuvika mmakono ga Vaamori, kukudividza? Bwa li bulahi, ngano, kwa menya engereka wa Yordani 8O, Yahova, mbola ki, inyima wa Israeli va girunkanya migongo gyavo ku avasigu vavo 9Kigira Vakanani na avandu vosi va menya mkivala va la ga hulira na va la ku kumberidza, nokutwulidza lieta lyetu ku lirova: na ive u la kola ki ku lieta lilyo linene?
10Na Yahova ya volera Joshua, Singira, kigira ki u gwidzanga mammama ndi? 11Israeli va koli ubwoni; yee, vononyi lilagana lyange lya nda va laga: yee, vevuguleye ku kya gimwa, va mali kwiba, kandi va voye bubehi; na va ki viki mu viju vyavo. 12Kigira yaga avana va Is raeli si va nyala kusingira imbiri wavasigu vavo; va girunkana migongo gyavo imbiri wavasigu vavo, kigira va gwiye avalaameywi; na inze si nda va halala nemwinye kandi mba, ni mu vula kudividza kindu kya gimwa ki twule hagati henyu. 13Vuka, u takase avandu, u va volere, Mwetakase avene ku mugamba: kigira Yahova, uyu Nyasaye wa Israeli, a vola, Ha veye nekindu kya gimwa hagati hoho, O Israeli; si u nyala kusingira imbiri wavasigu vovo, kuduka lwa mu twulidza kindu kya gimwa ki twule hagati henyu. 14Kunangwa mugamba mu la letwa mwisunde himbi ku tsihiri tsyenyu: na ga la va, ihiri ya Yahova a la vugula i lisunda himbi ku bwiko bwayo; na bwiko bwa Yahova a la vugula bu lisunda himbi ku tsinyumba tsyabwo; nenyumba ya Yahova a la vugula i lisunda himbi mundu nomundu. 15Na ga la va, uyu u vugulwa u veye nekindu yikyo kya gimwa a la sambwa nomuliru, uyu noku vyosi vya a veye navyo; kigira yononya lilagano lya Yahova, kandi kigira ya kola inkuva yo buyingu mu Israeli.
16Kunangwa Joshua ya vuka mabwebwe, na ya leta Israeli visunde himbi ku tsihiri tsyavo; na ihiri ya Yuda ya vugulwa: 17ma ya sunda himbi ubwiko bwetsihiri tsya Yuda; na ya vugula bwiko bwa Vazera: na ya sunda himbi bwiko bwa Vazera mundu nomundu; na Zabedi ya vugulwa: 18kandi ya sunda himbi avandu venyumba yeye mundu nomundu; na Akan mwana wa Karmi, mwana wa Zabedi, mwana wa Zera, ku ihiri ya Yuda, ya vugulwa. 19Na Joshua ya teva Akan, Mwana wange, mwadza, u kuminye Yahova, Nyasaye wa Israeli, weyame kuye; na u volere inze ga wa kola; u ta ga vise ku inze. 20Akan ya tivulira Joshua, na a vola, Ligali nkoli bwoni ku Yahova, Nyasaye wa Israeli, na nkoli yaga na yaga: 21lwa ndoli mu vilanye ijoho indahi ya Babuloni, netsishekeli tsimia tsiviri tsyefetha, nekilezero kyethahabu yetsishekeli makumi gatano buliduhu bwakyo, hene vaho nda vi kayirwa, nokuvivugula; na henza, vi viseywi mu lirova hagati helihema lyange, na ifetha i veye isi wavyo.
22Kunangwa Joshua ya tuma vatumwa, ni va tsia tsimbiru kuduka ha lihema; henza, vya viswa mu lihema lilye, ne ifetha isi wavyo. 23Na va vi vugula vindu zana nokuvitwulidza ha zana hagati helihema, na va vi leta ku Joshua, na ku avana va Israeli vosi; na va vi vika hasi imbiri wa Yahova. 24Na Joshua, na Israeli vosi halala naye, va vugula Akan mwana wa Zera, nefetha, na ijoho, nekelezera kyethahabu, na avana vayai veve, na avana vakana veve, netsing'ombe tsitsye, netsisukiri tsitsye, na magondi gege, nelihema lilye, na vyosi vya ya li navyo: va vi leta nokuvyanigeridza kuduka mwivona lya Akori. 25Na Joshua ya vola, Kigira ki ive u viki ku kwinye kivi? Yahova a la vika ku ive kivi lero ndi. Na Israeli vosi va mu lasa magina; ni va va snmba nomuliru, na va va lasa magina. 26Na va vungidza kuye kitumi kinene kyamagina, kuduka lero; na Yahova ya girunkana ku bululu bwobutima bwibwe. Kigira yaga lieta lya ha zana lya langwa, Livona lya Akori, kuduka lero.
©Bible Society of Kenya, 1967