Joshua 24
24
1Kandi Joshua ya vungidza tsihiri tsyosi tsya Israeli ha Shekem, na a langa avakulundu va Israeli, nemitwe gyavo, navakalagi vavo, navanyampara vavo; na vevungidza avene imbiri wa Nyasaye. 2Na Joshua ya volera avandu vosi, na a vola, Yahova Nyasaye wa Israeli, a vola, Avaguga venyu mmadiku goku matsyambiri va menya engereka wa Mugera, navo ni Tera, ise Abrahamu, na a veye kandi ise Nahoro: navo va tumekira avanyasaye vandi. 3Na inze nda vugula Abrahamu guga wenyu engereka yo Mugera na nda mwimirira mu kivala kyosi kya Kanani, nda mu medera kisukululwi kikye, na nda mu ha Isaka. 4Na nda ha Isaka Yakobo na Esau: na nda ha Esau kigulu kya Seiru, a duke kukigumira: na Yakobo navana veve va sulunguta Egepeti. 5Kandi nda tuma Musa na Haruni, na nda kuya Egepeti, kuli yaga ga nda kola hagati hakyo: na lwenyima nda twulidza mwinye. 6Nda leta vadada venyu va twula Egepeti: na mwa duka ku inyanza; na Vaegepeti va londerera vadada venyu namagari na va nina ku tsifarasi kuduka ku Inyanza Inzakanyu. 7Navo lwa vanira Yahova ya vika kisundi hagati henyu na Vaegepeti, na ya leta inyanza kuvo, nokuvakunika; netsimoni tsyenyu tsya lola gosi aga nda kola mu Egepeti: na mwa menya mu kyangalangwi amadiku manyingi. 8Na nda mu leta ni mmuvika mu kivala kya Vaamori, ava menya engereka ya Yordani: na va lwana nemwinye; na nda va vika mmakono genyu, na mwa gumira kivala kyavo; na nda va dividza imbiri wenyu. 9Inyinga yeyo Balaki mwana wa Ziporu, mwami wa Moabu, ya vuka kulwana na Israeli; na ya tuma avandu kutsia kulanga Balaam mwana wa Beoru a duke kulaama mwinye; 10nayutswa inze si nda bugirira kuhulira Balaam; kunangwa ya meda kumugasidza na ndiyo nda mu honnya ku mukono gwigwe. 11Na mwambuka Yordani, nokuduka Yeriko: avasatsa va Yeriko va lwana nemwinye, Vaamori, na Vaperizi, na Vakanani, na Vahiti, na Vagirigashi, na Vahivi, na Vajebusi; nda va vika mmakono genyu. 12Na nda tuma mahalamba kwimira imbiri wenyu aga va kunga imbiri wenyu, avami vaviri va Vaamori, si ga li nekivavi kikyo, kinga ubuta bubwo. 13Na nda mu ha kivala kya mwa vula kuyinzira ku, na madala ga mwa vula kwombaka, na mwa menya mu; na mu litsanga amakuyu gemilimi gyemizabibu nemilimi gyemizeituni gya mwa vula kusimika.
14Kunangwa kalunu mu tie Yahova, nokumutumekira mu libugirira nomu geligali; na mu vike ihale avanyasaye ava vaguga venyu va tumekira engereka ya Mugera, nomu Egepeti; na mu tumekire Yahova. 15Litumekira Yahova ni li va ni li loleka kuva ku mwinye lidamano, mu tovole lero wa mu tumekira; ni va va ni va veye avanyasaye va vaguga venyu va tumekira lwa va li engereka va Mugera, kinga ni va va avanyasaye va Vaamori, ava mu menya mkivala kyavo: navutswa inze nenyumba yange, ku la tumekira Yahova.
16Navandu va tivula ni va vola, Nyasaye a ku gaye ku ta leka Yahova, kutsie kutumekira avanyasaye avandi; 17kigira Yahova Nyasaye wetu, niye wa leta kwinye navadada vetu kutwula mkivala kya, Egepeti, kutwula mu inyumba yavatugwa, kandi niye wa kola vilolekidzu vinene imbiri wetsimoni tsyetu, nokukulinda ku inzira yosi ya kwa genda ku, na hagati ha avandu vetsihiri tsyosi, tsya kwa vita mu; 18kandi Yahova ya kunga avandu vetsihiri tsyosi va twule imbiri wetu, navo na Vaamori ava menya mu kivala yikyo: kunangwa kwinye kandi ku la tumekira j Yahova; kigira uyu a veye Nyasaye wetu.
19Na Joshua Ya volera avandu. Mwinye si mu nyala kutumekira Yahova; kigira a veye Nyasaye mutakatifu; a veye Nyasaye welikendeka; si a la mu sameha amahyolo genyu kinga ubwoni bwenyu. 20Ni mu va ni mu leka Yahova, nokutumekira avanyasaye avageni, hene yaho a la girunkana nokumukolera budamano, nokumudividza, inyima wa ya mu kolera ubulahi. 21Navandu va volera Joshua, Auwa; nayutswa kwinye ku la tumekira Yahova. 22Na Joshua ya volera avandu, Mwinye mu veye avalolekidzi ku mwinye avene mu tovoye Yahova, mu duke kumutumekira. Navo va vola, ku veye avalolekidzi. 23Kunangwa kalunu, ya vola, Vika haluvega avanyasaye avageni ava veye hagati henyu, mu yekidze myoyo gyenyu ku Yahova, uyu Nyasaye wa Israeli. 24Navandu va volera Joshua, Kwinye ku la tumekira Yahova Nyasaye wetu, na ku la hulira mwoyo gwigwe. 25Kunangwa Joshua ya lomba lilagana halala navandu lidiku yilyo, na a vika kuvo amalago nemiima ha Shekem. 26Na Joshua ya ng oda makuva yaga mu kitabu kyelilaga lya Nyasaye; na ya vugula ligina linene, na a li singeridza ha zana isi womusala gwa li himbi hatakatifu ha Yahova. 27Na Joshua ya volera avandu vosi, Henzi, ligina yili li la va lilolekidza ku kwinye; kigira li huliye amakuva yaga gosi ga Yahova ya ku volera: kunangwa li la va liloekidza ku kwinye, gase mu lambakana Nyasaye wenyu. 28Kunangwa Joshua ya ha avandu munwa va tsie, mundu sa mulala ku miyandu gyigye.
29Ma inyima wa makuva yaga, Joshua mwana wa Nuni, mutumekiri wa Yahova, ya kudza, naye ya li omundu wemihiga mia na likumi. 30Na va mu ta mu lwako lwemiyandu gyigye mu Timinathusera, li veye mu kivala kyevigulu kya Efiraim ku luvega lwa kasikasini lwekiguiu kya Gaashu. 31Na Israeli va tumekira Yahova madiku gosi ga Joshua, na madiku gosi aga vakulundu va hindira kuvita Joshua, ava manya miyinzi gyosi gya Yahova, ga ya kolera Israeli.
32Na vigumba vya Yosefa, vya avana va Israeli va leta kutwula Egepeti, va vi ta ha Shekem, mu kidieli kyekivala kya Yakobo ya gula ku avana va Hamoru ise Shekem, nevidonye mia vyefetha: nakyo kya gwa miyandu gyavana va Yosefa. 33Na Eleazaru mwana wa Haruni ya kudza; na va mu ta mu kigulu kya Finehasi mwana wewe, kya ya hebwa mu kivala kyevigulu kya Efiraim.
©Bible Society of Kenya, 1967