Joshua 23
23
1Na nyima ya madiku manyingi ga duka, lwa Yahova ya ha Israeli bwelemeridzi mu vasigu va va kumberidza yiyi na yiyi Joshua ya li musakulu nokutsia bwimbi nabutambi mu mihiga gyigye; 2Joshua ya langa Israeli vosi, vakulundu vavo, nemitwe gyavo, navakalagi vavo na vanyampara vavo, na a va volera, Inze mbeye musakulu na ntsitsanga bwimbi nabutambi mmihiga gyange: 3mu loli gosi ga Yahova Nyasaye wenyu ya kolera avetsihiri yitsi tsyosi kigira mwinye; kigira Yahova Nyasaye wenyu, niye wa lwanira mwinye. 4Henza ng odeye mwinye, avetsihiri yitsi tsi tigaye, tsi ve miyandu gyetsihiri tsyenyu, kutwula ku mugera gwa Yordani, halala netsihiri tsyosi tsya nda kalaga, kuduka ku inyanza inene ku luvega lweliyera lyeliuva. 5Na Yahova Nyasaye wenyu, a la va twulidza imbiri wenyu, nokuvakunga va vule kuva imbiri wetsimoni tsyenyu; na mu la gumira kivala kyavo, kuli ga Yahova Nyasaye wenyu ya mu volera. 6Kunangwa mu ve avaluviriri kulinda nakukola gosi ga ng odwa mu kitabu kyelilaga lya Musa, mu vule kugirunkana ku li leka kutsia haluvega lwomukono mulungi kinga lwomukono mmosi; 7mu tingira hagati hetsihiri yitsi, tsya tigala hagati henyu; kandi mu ta tala ameta ga vanyasaye vavo, kinga kumwisuhidza kuvo, kinga kuvatumekira, kinga kwinama imbiri wavo: 8navutswa mu hambane na Yahova Nyasaye wenyu, kuli mwa kola kuduka lero. 9Kigira Yahova ya twulidza imbiri wenyu tsihiri tsya li tsinene netsyetsingulu: navutswa mwinye, si ha li nomundu ava singira imbiri wenyukudukalero. 10Mundumulala ku mwinye a la kunga elfu, kigira Yahova Nyasaye wenyu, niye u mu lwaniranga, kuli ya mu volera. 11Kunangwa mwelinde bulahi avene, mu duke kuyanza Yahova Nyasaye wenyu. 12Gase ni mu va ni mwirana inyima, nokuhambana nelitigala lyetsihiri yitsi, tsya tigala hagati henyu, nokukwererana navo, namwinye mu ve halala navo, navo nokuva halala nemwinye; 13mu manye ligali Yahova Nyasaye wenyu a la vula kukunga tsihiri yitsi tsi twule imbiri wetsimoni tsyenyu; navutswa tsi la va umbeto nomutego ku mwinye, nokuva lukova lwokukuya mmbalu mwenyu, namafwa mu tsimoni tsyenyu, kuduka mu dive kutwula ku kivala yiki kilahi kya Yahova Nyasaye wenyu ya mu ha.
14Kandi, henzi, inze lero ntsitsanga ku inzira ya vosi velirova: na mwinye mu manya mu myoyo gyenyu gyosi, nomu roho gyenyu gyosi, si ha ve nekindu kali kilala kya vula kuva kyevindu vyosi vilahi vya Yahova Nyasaye wenyu ya vola ku mwinye; vyosi vi dukidzeywi ku mwinye, si ha veye nekindu kali kilala kya vula ho. 15Kandi ga la va, kuli vindu vilahi vyosi vya duka ku mwinye vya Yahova Nyasaye ya mu volera makuva gavyo, ni ndiyo kandi Yahova a la leta ku mwinye vindu vyosi vidamano, kuduka kumudividza mu twule mu kivala yiki kilahi kya Yahova Nyasaye ya mu ha. 16Lwa mwononya lilagano lya Yahova Nyasaye wenyu, ga ya mu laga, ni mu tsia kutumekira avanyasaye vandi, nokuvasigamira; hene yaho ubutima bwa Yahova bu laaka ku mwinye, na mu la diva bwangu mu twule mu kivala yiki kilahi kya ya mu ha.
©Bible Society of Kenya, 1967