Joshua 18
18
1Ni livugana lyosi lya avana va Israeli vevungidza halala ha Shilo, ni va singiridza lihema lyokuvugana mu ha zana: nekivala zana kya guutwa imbiri wavo. 2Na va tigala hagati ha avana va Israeli tsihiri tsitano na tsiviri, tsi kikiri ku gavulirwa miyandu gyavo. 3Na Joshua ya teva avana va Israeli, na a vola, Mu la duka inyinga ki mu veye avagata ku lingira lyenyu nokugumira kivala kya Yahova, Nyasaye wa vaguga venyu, ya mu ha? 4Mwevikiri mwinye avene avandu vavaka ku ihiri sa indala: na inze nda va tuma, navo va la vuka, va tsie hagati hekivala, nokuking oda kuli miyandu gyavo gyi veye; na va ladza ku inze. 5Avandu yavo va la gavula kivala ki ve vidieli vitano na viviri: Yuda a la menya mu lwako lwilwe ku luvega lwa kusini, na inyumba ya Yosefa i la menya mu lwako lwavo ku luvega lwa kasikasini. 6Na mu la ng oda kivala ki ve vidieli vitano na viviri, na mu la leta ku inze; na inze nda mu kolera ikura imbiri wa Yahova, Nyasaye wetu. 7Kigira ave ihiri ya Valevi si va veye nekidieli hagati henyu; kigira ubusalisi bwa Yahova bu veye miyandu gyavo: kandi Gadi na Rubeni na inusu yehiri ya Manase va mali ku nyolera miyandu gyavo engereka ya Yordani ku luvega lwevugwi, lwa Musa mutumekiri wa Yahova ya va ha.
8Na avandu yavo va vuka, ni va tsia: na Joshua ya laga yavo ava tsia kung oda kivala, na a vola, Mu tsie mu vite hagati hekivala yikyo, nokung oda makuva gakyo, ma mwirane ku inze; na nda mu kolera ikura imbiri wa Yahova mu Shilo. 9Na avandu yavo va tsia ni va vita hagati hekivala, na va ng oda makuva gakyo nokukigavula ku madala gakyo ni ki duka vidieli vitano na viviri mu kitabu; ni va galuka ku Joshua ha hokusosa ha Shilo. 10Na Joshua ya va kolera ikura imbiri wa Yahova mu Shilo: kunangwa Joshua ya gavulira avana va Israeli kivala kuli lyavukana lyavo.
11Kandi kya loleka kidieli kya avana va Benjamini kuli ubwiko bwavo: na lwako lwekidieli kyavo lwa twulira hagati ha avana va Yuda na avana va Yosefa. 12Lwako lwavo ku luvega lwa kasikasini lwa twula ku mugera gwa Yordani; na lwako lwa vita kuduka mbalu mwelidala lya Yeriko ku luvega lwa kasikasini, na lwa vita hagati hekivala kyevigulu kuhenza ku luvega lwemadioli; ne kiheri kyalwo ki veye ha kyangalangwi kya Bethaven. 13Na lwako zana lwa vita kutwula ho nokuduka ku lidala lyo Luz, mbalu mwa Luz (lidala zana li veye Betheli), ku luvega lwa kusini; na lwako lwa sulunguta Atarothadari, himbi nekigulu ki veye ku luvega lwa kusini wa Bethhoron lyemunzi. 14Na lwako lwa medwa, nokuvodonkana ku luvega lwemadioli ihenza kusini, kutwula ku kigulu ki henza Bethhoron ku luvega lwa kusini; na kiheri kyalwo ki veye ha Kiriathubaal (lidala yili li veye Kiriathujearim), li veye lidala lyavana va Yuda: yilu no luvega lwemadioli. 15Na luvega lwa kusini lwa twula ku luvega lwekiheri kya Kiriathujearim; no lwako lwa twulira ku luvega lwemadioli, kutwula ha zana lwa vita kuduka ku mugera gwamadzi ga Nefitoa; 16na lwako lwa sulunguta kuduka ku kiheri kyekigulu ki veye ha zana ku henza ku livona lyomwana wa Hinom, li veyo ha zana mu livona lya emindu ku luvega lu henza kasikasini; na lwa sulunguta kuduka ku livona lya Hinom, kuduka mmbalu mwo Mujebusi ku luvega lwokuhenza kusini, na lwa sulunguta kuduka Enrogeli; 17na lwa ng odwa ku luvega lwa kasikasini, na lwa twulira ha Enshemeshi, nu lu vita kuduka Gelilothu, ki henza ku kyanegiru kya Adumim; na lwa sulunguta kuduka ku ligina lya Bohan, muyai wa Rubeni; 18lwa vita mmbalu gu henza mu Araba ku luvega lu henza kasikasini, na lwa sulunguta kuduka mu Araba; 19no lwako lwa vita kuduka mmbalu mwa Bethhogila ku luvega lu henza kasikasini; nobutwuliru bwolwako zana bu veye ha kiheri kye Inyanza yo Munyu, ki veye kiheri kya kusini womugera gwa Yordani: yilo nilwo lwako lweluvega lwa kusini. 20Na mugera gwa Yordani gu veye lwako lwakyo ku luvega lwevugwi. Yigyi nigyo miyandu gyavana va Benjamini, kuli tsinzako tsitsye kuvodonkana hosi, kuli ubwiko bwavo.
21Na amadala gehiri yavana va Benjamini kuli ubwiko bwavo ni yaga, Yeriko, na Beth-hogila, na Emekikeziza, 22na Betharaba, na Zemaraim, na Betheli, 23na Avim, na Para, na Ofira, 24na Kefariamon, na Ofini, na Geba; madala likumi na gaviri halala na tudala twago.
25Gibeon, na Rama, na Beerothu.
26Na Mizipe, na Kefira na Mozahu.
27Na Rekem, na Iripeeli, na Tarala.
28Na Zela, Elefu, na Mujebusi (li veye Yerusalemi), na Gibeathu, na Kiriathu; madala likumi na gane halala na tudala twago. Ga veye miyandu gyavana va Benjamini kuli ubwiko bwavo.
©Bible Society of Kenya, 1967