Jona 1
1
1Likuva lya Yahova lya duka ku Jona mwana wa Amitai, kumuvolera 2Vuka, u tsie Nineve, lidala iinene, u hanzuke kulyo; kigira ubudamano bwalyo bwanegiye imbiri wange. 3Navutswa Jona ya vuka kwiruka kutsia Tarshishi kutwula imbiri wa Yahova; na ya sulunguta kutsia Yopa, na a lola yo liato li tsitsanga Tarshishi: ma ya tunga mitungu gyalyo, na a tsia mulyo, a tsie Tarshishi halala navo kutwula imbiri wa Yahova.
4Navutswa Yahova ya leta kihudzudzi kinene ku inyanza, kandi kya duka kuva kihi kinene ku inyanza, kuduka liato lya li himbi kwononnywa. 5Ma averemi va li nobutii, navo sa mulala yanira munyasaye wewe; na va ta mu inyanza vindu vya li mu liato, li ve lyangu kuvo. Navutswa Jona ya li na a mali kwika, nokutsia musi mweliato; na a gona tsindolo tsinene. 6Kunangwa munene weliato ya tsia kuye, na a mu volera, U veye naki ive, u gonanga? Vuka, wanire Nyasaye wowo, mbula ga la va Nyasaye a la kwidzulira, ku ta diva mba. 7Navo va volerana sa mulala nowakye, Gendi ku kole ikura, ku duke kumanya ubudamano yibu bu duki ku kwinye kigira ibwaha. Ma va kupa ikura, na ikura ya gwira Jona. 8Hene yaho va mu volera, Mwadza, u ku volere, ubudamano yibu bu duki ku kwinye kigira ibwaha; miyinzi gyigyo gyi veye ki? Na ive u twula haliha? U veye mundu wekivala ki? U veye mundu wehiri ki? 9Naye ya va volera, Inze mbeye Muhebraina; na ntidza Yahova, Nyasaye womigulu, wa lomba inyanza na lirova Iyumu. 10Hene yaho avandu yava va tia muno, na va mu volera, Inkuva ki yiyi ya u koli? Kigira avandu va manya yiruka kutwula imbiri wa Yahova, kigira ya li na a va voleye.
11Hene yaho va mu teva, Ku la ku kolera ndi, inyanza i duke kukuleng'erera? Kigira inyanza ya li ni i medeka lihinulanywa. 12Naye ya va volera, Mu mbugule na mu nte mu inyanza; na ndiyo inyanza i la mu leng'erera: kigira inze mmanya ga veye kigira inze, kihi yiki kinene ki veye ku mwinye. 13Navutswa avandu yavo va luga liato netsingulu kulileta ku luginga; navutswa si va nyala: kigira inyanza ya medeka lihinulanywa kuvo. 14Kunangwa vanira Yahova, ni va vola, Ku ku saala, O Yahova, ku ku saala, kwinye ku ta diva kigira livamwoyo lyomundu uyu, kandi u ta vika ku kwinye amasahi ga ta li nekindu; kigira ive, O Yahova, u koli kuli u yanza. 15Kunangwa va vugula Jona, ni va mu ta mu inyanza; na inyanza ya leka kuhinulanywa. 16Ma avandu yavo va tia Yahova ligali; na va letera Yahova kihaanwa, ni va lagana.
17Na Yahova ya tegekidza isudzi inene kumira Jona; na Jona ya li mu munda mwesudzi madiku gavaka mbasu nobudiku.
Currently Selected:
Jona 1: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
