Ayubu 4
4
1Hene yaho Elifazu Muteman, ya tivula, na a vola,
2Mundu na a geridza kuvolerana nive, u la lola ubudamano naho?
Navutswa ni bwaha u nyala kwegaya a ta vola?
3Henza, ive wegidze avanyingi,
Na u viki tsingulu mmakono madedekere.
4Amakuva gogo ga gumira uyu wa li na a gwiye,
Na ive wa dinyeridza masigamo madedekere.
5Navutswa kalunu yaga ga duki ku ive, na u kudzi mwoyo;
Ga ku dira, na ive u hendanga.
6Ubutii bubwo ku Nyasaye si bu veye buluviriri bubwo,
Na lisuuvira lilyo si li veye ubulungi bwenzira yoyo?
7Mwadza, widzulitse, ni bwaha wa diva vutswa na a veye bugira lihyolo?
Kinga avalungi va kalagirwa haliha?
8Kuli inze ndolanga, yavo ava limanga ubudamano,
Noku midza kivi, va gesanga kya zana.
9Va divanga ku mwika gwa Nyasaye
Na va gotanga ku lifuuma lyobutima bwibwe.
10Lifuuma lyeking'ang'a, nomwoyo gweking'ang'a kilulu,
Na amino geving'ang'a visoleli, ga vuniki.
11Neking'ang'a kisakulu ki divi ku livula kunyola vyokuhima,
Navana veking'ang'a kikali va salani.
12Nda leterwa likuva makiriri, Ugutu gwange gwa hulira limonya lyago.
13Mu tsiganagani tsya twula mmalola gobudiku,
Lwa tsindolo tsyamaveere tsi dukanga ku avandu,
14Ubutii bwa ngwira, nokudegera, Bwa kola vigumba vyange vyosi kudengeya.
15Hene yaho kigingi kya vita imbiri wange;
Na maswa agombiri gwange ga singira,
16Kigingi zana kya singira makiriri, navutswa si nda manya ligondo lyakyo mba;
Kifwananyi kya li imbiri wetsi moni tsyange: Ha kiring'ana, na nda hulira mwoyo ni gu vola,
17Umundu welikudza a la va nobulungi kuvita Nyasaye?
Umundu a la va musiyeku kuvita Mulombi wewe?
18Henza, uyu si a suuviranga vatumekiri veve; Netsingelosi veve a va lolanga kuva nobusiru:
19Nasindi yavo ava menyanga mu tsinyumba tsyobudohi,
Tsyemise gyatsyo gyi veye mu marova, Ava duvulangwa imbiri wetsisere
20Hagati homugamba nomgolova va shonolannyangwa:
Va divanga mihiga nemihiga, kandi si ha veye na u vikanga mu mwoyo.
21Mugoye gwelihema lyavo si gu lifwa muvo?
Va kudza, kandi yaga bugira ubugeeri.
©Bible Society of Kenya, 1967