Ayubu 3
3
1Inyima wa yaga Ayubu ya kunul munwa gwigwe, nokulaama lidiku lilye.
2Na Ayubu ya tivula, na a vola:
3Lidiku lya ndivulwa mu li dive,
Kandi ubudiku bwa haana ma kuva yaga, Mwana muyai u verekeywi.
4Lidiku yilyo li ve kisundi;
Nyasaye u veye igulu a vule kulivalidza,
Kandi ubulavu bu vule kung'ereng'ana kulyo.
5Li ve kisundi, ne kiriri kyelikudza ki li vugule li ve lyakyo;
Lilesi li menye kulyo;
Vyosi vi kolanga lidiku kuva kisundi vi li tihidze.
6Ku makuva gobudiku yibwo, ga gumirwe nekisundi kinene:
Bu ta sangala mu madiku gomuhiga; Bu ta vikwa mu livalidzwa lye myeli.
7Henza, ubudiku yibwo bu ve ubwere;
Mwoyo gwobusangali gu ta va mulyo.
8Ava laama amadiku va li laame,
Avetegeki kuvukidza leviathani.
9Tsing'ereng'ani tsyomugolova gwatsyo tsi ve kisundi:
Bwenye ubulavu, navutswa bu vule kunyola;
Kandi bu ta lola vigohe vyomu gamba:
10Kigira si bwa hana miliango gye nda ya mama wange,
Kandi si bwa visa lidambidzwa ku tsimoni tsyange.
11Kigira ki nda vula kukudza mu litwula munda?
Kigira ki mwoyo gwa vula kutwula lwa nda twula munda?
12Kigira ki masigamo ga mbugula?
Kinga maveere, kigira ki ga mbugula kuduka kununa?
13Kigira nkano nda gona hasi nokwehodzeridza;
Nkano nda gona tsindolo; nokunyola lisosa,
14Halala navami navavoli velirova,
Yavo aveyombakira aha veye hatswa;
15Kinga halala navanene ava li nethahabu,
Avizulitsa tsinyumba tsyavo ifetha:
16Kinga kuli inda ya tadza ya vula kuduka ku inyinga yayo, nda vula kuva ho;
Kuli avana vadoto va vula kulola ubulavu.
17Ha zana vadamano va leka lidambidza.
Ha zana kandi avaluha va sosanga.
18Ha zana avahambe velemeridzahalala
Si va huliranga mwoyo gwomu singiriri.
19Avanene navakekeke va veye yo:
Na mutugwa a bohololwa ku munene wewe.
20Kigira ki uyu u veye mu kivi a hebangwa ubulavu,
Na yavo ava veye nelitsunwa va hebangwa livamwoyo;
21Avenyanga likudza, navutswa si va nyolanga mba;
Va yavanga va duke kulinyola kuvita lyenya ubutugi bwa viswa;
22Ava sangalanga ligali,
Nokuyanza lwa va dukanga mki lindwa?
23Kigira ki umundu wenzira yeye ya viswa a hebangwa ubularu,
Mundu wa Nyasaye ya kumbiri dza kuye lwevo?
24Kigira likenya lyange li dukanga ni nkikiri kulia kindu,
Na lifuuma lyange li tsukeywi kuli amadzi.
25Kigira aga ntidzanga ga duki ku inze.
Na ga ntihidzanga ga duki ku inze.
26Inze si ndolanga bwelemeridzi mba, kinga lyehodzeridza, kinga ubusosi;
Navutswa kivi kidzanga.
©Bible Society of Kenya, 1967