Isaya 65
65
1Avandu va vula kunyenya va nteva; nnyoleki ku yavo ava vula kunyenya: nehiri ya vula kulangwa ku lieta lyange, nda gi volera, Lola inze, lola inze. 2Nda nyira mukono gwange mbasu bei ku ve baali, ava gendanga ku inzira i ta li indahi, kulonda tsiganagani tsyavo avene; 3va veye avandu mbihiridzanga kazozo imbiri wetsimoni tsyange, ava haananga vihaanwa mu milimi gyavo, nokuvuyidza vimuli ku matafali, 4avandu vikalanga hagati hevilindwa, nokugona hokwivisa; ava litsanga tsnyama tsyempidzi, nomunyu gwevindu vyokumbihiriridza gu veye mu viju vyavo; 5ava volanga, Singira weng'ine, u tesunda ku inze, kigira mbeye mutakatifu kuvita ive. Yava va veye mwoki mu amolu gange, muliru gwaakanga mbasu bei. 6Henza, likuva yili li ng'odeywi imbiri wange: si nda kiring'ana, navutswa nda tunga amaanyi, yee, nda tunga amadanyi gavo mu viritu vyavo, 7ubudamano bwenyu avene, nobudamano bwa va dada venyu halala, Yahova a vola, mwinye ava vuyidzi kimuli ku vigulu, nokunyegera mu tugulu: kunangwa kigira yaga nda tanga kuvagerera miyinzi gyavo mu viritu vyavo.
8Yahova a vola ndi, Kuli iwaini impya i nyolekanga mu kiganda, na mulala a vola, U tononnya, kigira bugasu bu veye mukyo: ni ndiyo ndi kola ku vatumekiri vange, mbule kuvononnya vosi. 9Nda leta bugutsa kutwula ku Yakobo, na wemi yandu gyevigulu vyange kutwula ku Yuda; na mutovole wange a la nyola miyandu, na vatumekiri vange va la menya yo. 10Na Sharon ki la va kego kyevyayo, nelivona lya Akori ha la va hetsing'ombe tsi gona, kigira avandu vange va nyenyi. 11Navutswa mwinye ava lekanga Yahova, avivirira kigulu kyange kitakatifu, ava lombera Ubutugi imeza, ni vizulitsa viju iwaini ya tsuganywa ku misambwa; 12nda mu validza mu ve avekivavi, na mwosi mu la sigamira liitwa; kigira lwa nda langa, si mwa bugira; lwa nda vola, si mwa hulira; navutswa mwa kola agobudamano imbiri wetsi moni tsyange, nokutovola ga inze nta yanza.
13Kunangwa Mwami Nyasaye ya vola yaga, Henza, avatumekiri vange va la lia, navutswa mwinye mu la va nenzala; henza, avatumekiri vange va la nwa, navutswa mwinye mu la va nobuluhu; henza, avatumekiri vange va la sangala, navutswa mwinye mu la va isoni, 14henza avatumekiri vange va limba kigira ubuyanzi bwemyoyo, navutswa mwinye mu l la lira kigira liverera lyomwoyo muinye mu la kupa tsikwili kigira ubululu bwemyoyo gyenyu. 15Mu la leka lieta lyenyu kuva kilaamo ku vatovole vange; Mwami Nyasaye a liita ive; na a la gulika avatumekiri veve lieta lindi: 16kuduka ga la va uyu wegasidza mwene mu lirova a legasidza mu Nyasaye wageligali; na uyu wesuha mu lirova, a lesuha ku Nyasaye wageligali; kigira vivi vya kale vi mali kwivirirwa, kandi kigira vi viseywi ku tsimoni tsyange.
17Kigira, henza, nombanga ligulu lihya nelirova lihya; nevindu vya kale vi la vula kwidzulitswa, kandi si vi lingira mu myoyo mba. 18Navutswa mu ve nobuyanzi mu sangale madiku gosi mu vya nombanga; kigira, henza, nombanga Yerusalemi li ve lisangala, navandu veve kuva ubuyanzi. 19Nda sangalira Yerusalemi, nda yanza mu avandu vange; mwoyo gwelisyoma si gu la hulirwa kandi mulyo mba, kinga mwoyo gwelilira. 20Si a la va ho kandi mwana mudoto wa madiku makekeke, kinga musakulu u kikiri kudukidza madiku gege: kigira mwana a la kudza na a veye mihiga mia, nowo bwoni wemihiga mia a la laamwa. 21Va lombaka tsinyumba, nokumenya mutsyo; va la taga mizabibu na va la lia makuyu gagyo. 22Si va lombaka, ma wundi a menya mu mba; si va la taga, ma wundi a lia makuyu mba: kigira kuli amadiku gomusala ga veye ni ndiyo madiku gavandu vange ga la va, avatovole vange va la sangalira madiku manyingi mu miyinzi gya makono gavo. 23Si va la kola miyinzi gya vutswa, kandi si va livulira kivi; kigira va veye kisukululwi kya uyu wa gasidzwa wa Yahova, na lwivulu lwavo halala navo. 24Na ga la duka kuva, ni va kikiri kunanga, nda bugirirana lwa va veye mu livola, nda hulira. 25Kisalang'ongo neligondi vi laya haiala, king'ang'a ki la lia bunyasi kuli ing'ombe yayanga; na lugukyi ga la va kyokulia kyenzoka. Si vi la saliridzana kandi si vi lononnyana mu kigulu kyange kitakatifu kyosi, Yahova a vola.
©Bible Society of Kenya, 1967