Isaya 60
60
1Yuka, u ng'ereng'ane; kigira vv ubulavu bubwo bu duki, nobukumi bwa Yahova bu kyeye ku ive. 2Kigira, henza, kisundi ki la kunika lirova, nekisundi kinene ki la kunika avetsihiri: navutswa Yahova a la kya ku ive, nobukumi bwibwe bu la loleka ku ive. 3Na tsihiri tsing'ano netsing'ano tsi ladza ku bulavu bubwo, navami va ladza ku bung'ering'anu bwelikya lilyo.
4Ginga tsimoni tsitsyo u lole ku tsimbega tsitsyo: vosi vevungidze avene halala, vadzanga ku ive; avana vovo vayai va ladza ku ive kutwule ihale, avana vovo avakana va la gingirwa mmakono. 5Hene yaho u la lola nokung'ereng'anywa, na mwoyo gugwo gu la vukidzwa nokuneneha; kigira ubunyingi bwenyanza bu la girunkanywa budze ku ive, buhinda bwavetsihiri bu ladza ku ive. 6Ubunyingi bwetsing'amia bu la ku kunika, netsing'amia tsisoleli tsya Midiani na Efa; vosi va twula Sheba va ladza; va la leta ithahabu nekimuli, na va lilwadza lidzominya lya Yahova. 7Vyayo vyosi vya magondi ga Kedari vi la vungidzwa ku ive, magondi makole aga Nebaio thu ga la tumekira ive; ga lanegira igulu ku bwali bwange bwokubugirirwa; na nda kuminya inyumba yo bu kumi bwange. 8Yava ni bwaha ava bulukanga kuli lilesi, kuli madiri sha ga bulukanga kutsia mu myanzu gago? 9Ligali visulu vi la ni ndirira, na amato ga Tarshishi ga limirira, ga duke kuleta avana vange avayai kutwula ihale, ifetha yavo nethahabu yavo va la va navyo, vi ve vyelieta lya Yahova Nyasaye wowo, na vya Mutakatifu wa Israeli, kigira a kuminyi ive.
10Na vageni va lombaka madigi gogo, na avami vavo va la ku tumekira; kigira mbutima bwange nda ku kuya, navutswa mbuyanzi bwange nda ku vera tsimbabasi.
11Viribwa vivyo vi ligulwa madiku gosi; si vi la hanwa mbasu kinga budiku avandu va duka kukuletera ubutugi bwa vetsihiri, na avami vavo va limi rirwa va li avahambe. 12Kigira ihiri yeyo nobwami yibwo bu vule kukutumekira bu la diva; yee, tsihiri yitsyo tsi la dividzwa ligali. 13Ubukumi bwa Lebanon bu ladza ku ive, cypres, na gwobusuvu, na musala gwabokisi halala, kukola halahi hatakatifu hange; na nda kola ha bugono bwevirenge vyange kuva aho bukumi. 14Navana vayai va yavo ava dambi dza ive va ladza kukwinamira; na yavo vosi ava ku lega va leyinaminya avene ha tsinduvatiru tsitsyo; na va la ku langa, Lidala lya Yahova, Zioni lyo Mutakatifu wa Israeli.
15Kuli wa lekwa nokudunyirwa, kuduka ni ha vula kuva nomundu wa vita hagati hoho, nda ku kola u ve ubunene bwemihiga nemihiga, ubusangali bwa makula manyingi. 16U la nuna amaveere gavetsihiri, na u la nuna tsimbeere tsyavami; na u la manya inze, Yahova, mbeye Muhonnyi wowo, Mutungiri wowo, Wanyala Vyosi wa Yakobo. 17Nda leta ithahabu mbugono bwomugasa, na nda leta ifetha mbugono bwevivya, nomugasa mbugono bwomusala, na vivya mbugono bwamagina. Nda kola avasingeriri vovo kuva mire mbe, navasololi vovo kuva ubulungi. 18Kirage ki la vula kuhulirwa kandi mu kivala kikyo, kandi litigala hatswa, nobwoneku si vi la va mu tsinzako tsitsyo mba; navutswa madigi gogo u la ga gulika lieta yili, Ubuhonnyi, neviribwa vivyo u la vi gulika lieta Lidzominya. 19Liuva li la vula kuva ubulavu bubwo kandi inyinga yombasu; kandi ku bung'e reng'anu yibwo mweli si gu la ku ha ubwaaku kandi: navutswa Yahova a la va ubulavu bwemihiga nemihiga ku ive, Nyasaye wowo a la va bukumi bubwo. 20Liuva lilyo si li la yera kandi mba, kinga mweli gugwo si gu livisa kandi; kigira Yahova a la va bulavu bubwo ubu hongeranga mihiga nemihiga, na madiku gelisyoma lilyo ga la vita. 21Avandu vovo va la va avobulungi vosi; va la lia miyandu gyekivala mihiga nemihiga; lusya lwelisimika lyange mwene, miyinzi gyamakono gange mwene, nduke kukuminywa. 22Mukekeke a la gwa elfu, na mulala mukekeke a la va ihiri yetsingulu: Inze, Yahova, nda kola bwangu inkuva yiyi ku inyinga yayo.
©Bible Society of Kenya, 1967