Isaya 56
56
1Yahova a vola ndi, Mu linde likalaga, mu kole ubulungi; kigira ubuhonnyi bwange bu ve himbi, nobulungi bwange lilang'aminya lyabwo li veye himbi. 2A veye nobugasu u kolanga inkuva yiyi, na mwana womundu u hambananga nayo ligali; u lindanga lidiku lyelisabato a vule kulyononnya, wigaliranga mukono gwigwe a vale kukola budamano. 3Kandi umugeni wehambannya ku Yahova a vule kuvola, Ligali Yahova a la nzahula ku avandu veve; kinga uyu kitsiri a vole, Henza inze mbeye musala mwumu. 4Kigira Yahova a vola ku vitsiri ava lindanga amadiku gelisabato lyange, nokutovola vindu vi yanzidzanga inze, nokuhambana nelilagana lyange ligali: 5Nda haana kuvo lidzulitsa na ameta mu inyumba yange, mu madigi gange ga li va malahi kuvita kuva navayai navakana; nda va ha lieta lyemihiga nemihiga, li la vula kutwulidzwa.
6Avageni avehambanya ku Yahova, va duke kumutumekira, nokuyanza lieta lya Yahova, kuva avatumekiri veve, sa mulala u lindanga lidiku lyelisabato, a vule ku lyononnya, nokuhambana nelilagana lyange; 7avandu yavo nda va leta vadze kuduka mu kigulu kyange kitakatifu, nokuvasangalidza mu inyumba yange yokusaala; na vihaanwa vyavo vyo kusambwa ni visyuviriru vyavo vi la bugirirwa ku bwali bwange; kigira inyumba yange i la langwa inyumba yokusaala ku tsihiri tsyosi. 8Yahova Nyasaye wa vungidza halala yavo avatebwa va Israeli, a vola, Halala na yaga nda vungidza avandu kuye, ukuvita yavo aveve va vungidzwa.
9Mwinye tsinyama tsyosi tsyombulimu, hambi mu duke kulia, yee, tsinyama tsyosi tsyommulitu. 10Avalindi veve va veye avoboku, vosi va gehi ubugeeri; vosi va veye tsimbwa tsidimbidi, si va nyala kuloka; va lola maloto, va gona hasi, vayanza tsindolo. 11Yee, tsimbwa yitsyo tsi veye tsimpuvali kazozo, si tsi nyola liguta mba; kandi yava va veye avayi ava ta manya kindu: va girunkani sa mulala kulonda inzira yeye mwene, sa mulala ku vyambeti vivye, kutwula ku tsimbega tsyosi. 12Va vola, Hambi nda leta iwaini nokulizulitsa myoyo gyetu lihambika, kandi mugamba i la va kuli lero, lidiku linene kuvita kigero.
©Bible Society of Kenya, 1967