Isaya 43
43
1Navutswa kalunu Yahova wa ku lomba, ive Yakobo, naye wa ku longa, ive Israeli, a vola ndi: U ta tia mba, kigira mmali kukutungira; nku langi nelieta lilyo, u veye wange. 2Lwa u vita mmadzi manene, nda va halala nive; nomumigera, gyi la vula kukwina; lwa u genda mmuliru, u la vula kuhya; kandi ulumemo lwomuliru si lu laaka ku ive. 3Kigira inze mbeye Yahova Nyasaye wowo, Mutakatifu wa Israeli, Muhonnyi wowo; mmali kuhaana Egepeti kuva umutungu gugwo, mbaani Ethiopia na Seba kigira ive. 4Kigira ive u veye wobuguli budinyu mbiri wetsimoni tsyange, no welidzominywa, na nku yanzi; kunangwa kigira yaga nda haana avandu mu bugono bubwo, netsihiri nda haana mu bugono bwelivamwoyo lilyo. 5U ta tia mba; kigira inze mbeye halala nive: nda leta kisukululwi kikyo ki twule ivugwe, na nda ku vungidza kutwula madioli; 6nda volera kasikasini, Haana; na kusini, U tigalira mba; leta avayai vange kutwula ihale, navakana vange kutwula ku kiheri kyelirova; 7sa mulala ava langwa ku lieta lyange, wa nda lombera ubukumi bwange, wa nda mu lomba, yee, wa nda mu kola.
8Leta avaboku ava va veye netsimoni, na va hana amatu ava veye namatu. 9Avetsihiri tsyosi va vunge halala, navandu va vugane halala: ni bwaha hagati havo u nyala kwilwadza likuva yili, nokukuvuulira vindu vya kale? Va lete avaloli vavo, va lolwe kuva avalungi; kinga va hulire, nokuvola, Likuva yili ni lyeligali. 10Mwinye mu yeye avaloli vange, Yahova a vola, mutumekiri wange wa nda tovola; mu duke kumanya nokusuuvira inze, nokumanya inze niye: imbiri ku inze Nyasaye si a lombwa yo mba, kandi inyima ku inze si a la va yo wundi mba. 11Inze, yee, inze mbeye Yahova; na a ta li inze si ha veye nomuhonnyi. 12Inze mmali kulandidza makuva, mmali kuhonnya, mmali kuvuula; si ha li nomunyasave mugeni hagati henyu: kigira yaga mwinye mu veye avelolekidzi vange, Yahova a vola, na inze mbeye Nyasaye. 13Yee kutwula ku lidiku lya li ho, inze niye, na si ha veye na u nyala kuhonnya ku mukono gwange: inze nda kola miyinzi, ni bwaha u nyala kugyigalira?
14Yahova, Mutungiri wenyu, Mutakatifu wa Israeli, a vola ndi: Kigira mwinye nda tuma mutumwa Babuloni, na ndikidza vosi kuli avakungi, kali Vakalidei, mu bwato bwelisangala lyavo. 15Inze mheye Yahova, Mutakatifu wenyu, Mu lombi wa Israeli, Mwami wenyu. 16Yahova a vola, uyu u lombanga inzira mu inyanza, inzira mu madzi manene; 17u letanga kyova ligari lyobulwani na iparasi, lihe nomu nyali (va gona hasi halala, si va la vuka kandi; va simi, va siminywa kuli ikatani): 18Mu tidzulitsa vindu vyoku matsyambiri, kandi mu ta ganagana vindu vya kale. 19Henza, nda kola kindu kihya; ki la sebuka kalunu ndi; mwinye si mu la ki manya? Nda lomba inzira mu kyanga langwi, na migera migendanyama. 20Tsinyama tsyombulimu tsi la kuminya inze, vibwe na maudo; kigira mbaana amadzi mmigendanyama, na migera mu kyangalangwi, kuha avandu vange linwa, avatovole vange, 21avandu va ndelombera inze mwe ne, va duke kulandidza lidzominywa lyange.
22Halala na yaga ive Yakobo, si wanira inze; O Israeli, wa luha ku inze. 23U vuli kundetera magondi kuva vihaanwa vyokusambwa; kandi u vuli kunzidzominya nevihaanwa vivyo. Inze si nku niga kuntumekira nevihaanwa vivyo, kandi si nku luhidza nevimuli. 24Si wa ngulira mikonye nefetha yoyo, kandi wa vula kunzigutidza na maguta gevihaanwa vivyo; navutswa u mmini no bwoni bubwo, u nduhidzi nobudamano bubwo.
25Inze, yee, inze niye weyanga mahyolo gogo kigira mwoyo gwange; na si ndidzulitsa ubwoni bubwo. 26U nkolere nzidzulire; ku lombe likalaga halala: u lang'aminye makuva gogo, u duke kuhebwa ubulungi bubwo. 27Guga wowo wokutanga ya kola ubwoni, navegidzi vovo va hyola ku inze. 28Kigira yaga nda va vika ubudamano avanene va hatakatifu; na nda kola Yakobo kuva lilaamwa, na Israeli kuva manyego.
©Bible Society of Kenya, 1967