Isaya 35
35
1Ligendanyama nekivala kyumu vi la sangala; nekyangalangwi ki la sangala, na ki la lavidza ubulavidzu kuli kimuli. 2Ki la lavidza ubulavidzu bunyingi, ki la sangala kuduka litsantsalika nokwimba; ki la hebwa ubukumi bwa Lebanon, ubulahi bwa Karimeli na Sharon: va la lola ubukumi bwa Yahova, ubunene bwa Nyasaye wetu.
3Mu vike tsingulu ku makono madedekere, noku masigamo ga ta li netsingulu mu ga dinyeridze. 4Mu volere ava veye nomwoyo gwobutii, Mu ve avagulu, mu ta tia mba: henza, Nyasaye wenyu a ladza nekisalya, halala ne litunga lya Nyasaye; a ladza kumuhonya.
5Hene yaho tsimoni tsya vaboku tsi la kunulwa, namatu ga vahana amatu ga ligulwa. 6Hene yaho umuhenyeri a la tumatuma kuli imboongo, nolulimi lyedimbidi lu limba; kigira mmigendanyama madzi ga la senuka, notugera tu la senuka mu kyangalangwi. 7Na muyeke gweluhya gu la gwa lidavalia, namarova gobuluhu ga la gwa visenukiru vyamadzi; mu bumenyo bwevibwe, ha vi gonanga, ha la va nobunyasi halala nommberani, nelihunzu. 8Na ha zana ha la va lihasi, nenzira, na i la langwa Inzira yobutakatifu; ava ta li avanifu si va li genda kuyo; navutswa i la va ya yavo: avandu volugendo, kali ni va veye avasiru, si va li hyolera kuyo. 9King'ang'a ki la vula kuva ho, na tsinyama tsindulu tsi la vula kwanegira kuyo, tsi la vula kuloleka yo; navutswa avahonnywa va la genda yo: 10na avahonnywa va Yahova va lirana na va la duka Zioni, nokwimba; ubusangali bwemihiga ne mihiga bu la va ku mitwe gyavo: va la nyola ubusangali nobuyanzi, ubuvereri nelikenya vi la twulidzwa li'gali.
©Bible Society of Kenya, 1967