Isaya 34
34
1Mwisunde himbi, mwinye tsi hiri, kuhulira; mu hulire mwi nye avandu: lirova li hulire, halala na vyosi vizula kulyo; lirova nevindu vyosi vi twulanga mulyo. 2Kigira Yahova a veye nobutima ku tsihiri tsyosi, nelivihirirwa ku amahe gavo gosi: u va dividzi ligali, u va viki mu liitwa. 3Yavo aviitwa mu yavo va la tebwa kyova, nelifunya lyemibiri mikudzu gyavo li lanegira igulu vigulu vi la yenguka kigira masahi gavo. 4Na lihe lyosi lyomigulu li la livuluka, ne ligulu li la lingwa halala kuli lilingwa lyetsikaratasi; na lihe lyavo lyosi li la niala, kuli litu li nialanga kutwula ku muzabibu, na kuli litu li nialanga ku mukuyu 5Kigira kivavi kyange ki mali kunwa nokwiguta mwigulu: henza ki liika ku Edom, noku avandu ve lilaamwa lyange, kuvakalagira. 6Ki vavi kya Yahova kizuye masahi, ki komeridziywi nobunolu, namasahi gavana vamagondi netsimbuli namaguta getsimbigu tsyamagondi makole: kigira Yahova a veye nekihaanwa ha Bozra, na liita linene mu kivala kya Edom. 7Na tsing'ombe tsyombulimu tsi la sulunguta halala navo, netsirahu, netsigiriki: nekivala kyavo ki la hambika masahi, na lugukyi lwavo lu la nulidzwa nevinolu.
8Kigira Yahova a veye nelidiku lyelivanza kisalya, muhiga gwokutunga mu lihing'ana lya Zioni. 9Na migera gyakyo gyi la girunkanywa kuva ubusandu, nolugukyi lwakyo lu la girunkanywa kuva kibiridi, nelirova lyakyo li la gwa busandu bu sambanga. 10Muliru gu la vula kusiminywa mbasu kinga ubudiku; mwoki gwagwo gu la duuma mihiga nemihiga; ki la va hatswa makula na makula; si ha veye nomundu u vita hagati hakyo kuduka mihiga nemihiga. 11Navutswa ki la menywa na magungu nevilungu; na makuuli na majikolo ga la menya yo: na a la nyira kukyo mugoye gwokugenya, na magina ga vutswa. 12Va la langa vanene vakyo vadze ku bwami, navutswa a la vula kuva ho kali mulala; na vanene vakyo si va la va kindu. 13Na mafwa ga la mera mu tsinyumba tsyakyo tsyobukumi, nelitambadza na matagalu mu tsimpinga tsyakyo; na ki la va ubumenyo bwevibwe, umugidzi gwamaudo. 14Na tsinyama tsindulu tsyomwigendanyama tsi la vugana nevisalang'ongo, na ikole i la langa yindi; yee, likuuli li la sosera ho, na li la nyola hokumenya. 15Na luvayo lu la lomba inyumba yalwo ha zana nokutera, nokwalula mu kiriri kyakyo; yee, amave ga la vugana ho likali nelisatsa.
16Mwenye mu kitabu kya Yahova, mu some: si ha veye mu yivi vyosi kilala kuvula kuva ho si ha veye nekikali kali kilala ki ii daka kisatsa; kigira munwa gwange gu mali kulaga, na Roho wewe a vi vungidzi halala. 17Na a vi koleye ikura, nomukono gwigwe gu vi gavuliye nomugoye: va la va nakyo madiku gosi; kutwula ku likula yili kuduka ku likula yilyo va la menya mu.
©Bible Society of Kenya, 1967