Isaya 27
27
1Mu lidiku yilyo Yahova halala nekivavi kikye kyogi nelsinene nekyetsingulu a la kalagira leviathan, inzoka yetsimbiru, na leviathan inzoka yamaganyi; na a liita gunani gwa li mu inyanza.
2Mu lidiku yilyo: Mulimi gwomuzabibu gwewaini, mu gwimbire. 3Inze Yahova mbeye mulindi wagwo; nda gu sama amadzi tsinyinga tsyosi: gase mundu a la gwononnya, nda gu linda budiku nombasu. 4Ubutima bululu si bu veye mu inze: nkano lutavati na mafwa vya li ku inze mubulwani nkano nda ka salama kuvo, nokuvasambahalala. 5Kinga a gumire tsingulu tsyange, a hambane ninze mmirembe; yee, a hambane ninze mmirembe. 6Mu madiku gadzanga Yakobo a likidza imiri; na Israeli a la lavidza kimuli nokusibuka: na va lizulitsa mmoni mwelirova makuyu.
7U kuyi yavo kuli ya kuya yavo ava va kuya? Kinga viitwa kuli liitwa lya yavo ava viita? 8Lwa u va kunga, u la hing'ana navo, nekigero; ya va twulidza nembuudza yeye indulu mu lidiku lyembuudza yevu gwe. 9Kigira yagaubudamano bwa Yakobo bu logidzwa, yaga na makuyu gokutwulidza ubwoni bwibwe: lwa a kola magina gosi gobwali kuva kuli magina gechoka ga vunanywa, kuduka Misala gyemiluka nevifwananyi vyeliuva vyavo vi la vula kusingira kandi. 10Kigira lidala lyetsingulu li tigaye lyere, bumenyo bu lekwa hang'anye, kuli mwigendanyama: ha zana kimoli ki laya, ki la gona ha zana, nokulia tsisya tsyalyo. 11Tsisya tsyalyo lwa tsyuma, tsi la vunanywa; avakali va ladza, nokutsyaakidza umuliru; kigira va veye avandu ava ta li nelimanya: kigira yaga uyu wa va lomba si a la va vererera mba, uyu wa va longa si a la va vanza mba.
12Na ga la va mu lidiku yilyo, Yahova a la hula amakuyu galyo kutwula ku kisenukiru kyo Mugera kuduka ku mugera gwa Egepeti; na mu la vungidzwa sa mulala, O mwinye avana va Israeli.
13Na ga la va mu lidiku yilyo, kisiliva kinene ki la kupwa; navo vetegeka kudiva mu kivala kya Asuria va ladza, na yavo ava kungwa mu kivala kya Egepeti; na va la sigamira Yahova mu kigulu kitakatifu ha Yerusalemi.
©Bible Society of Kenya, 1967