Isaya 24
24
1Henza, Yahova a kola lirova kuva lyere, na a li kola kuva vutswa, nokulitung'aminya, na ya salannya avamenyi mulyo. 2Na ga la va, kuli ga veye ku avandu, ga la va ndiyo ku vasalisi; kuli ga veye ku mutugwa, ga la va ndiyo ku wamutuga; kuli ga veye ku mukana mutugwa, ga la va ndiyo ku wekikali wamutuga; kuli ga veye ku muguli, ga la va ndiyo ku mugulanyi; kuli ga veye ku uyu u hambidzanga kivete, ga la va ndiyo ku uyu u hambanga kivete; kuli ga veye ku uyu u vugulanga vyambeti, ga la va ndiyo ku uyu u mu hedzanga vyambeti. 3Lirova li la kolwa lyere ligali, nokwononywa ligali; kigira Yahova ya vola likuva yili. 4Lirova li syomanga nokuniala, lirova li dengeyanga nokuniala, avenenehidzanga ku lirova va dengeyi. 5Lirova lyononnyeywi isi wa va menyanga kulyo: kigira vononnya lilaga, nokugirunkannya amalago, nokwononnya lilagana lyemihiga nemihiga. 6Kigira yaga kilaamo ki liye lirova, na yavo avamenyanga kulyo va loleki kuva ne lihyolo: kigira yaga avamenyi mu lirova yili va hiye, ava tigaye va veye avakekeke 7lwaini impya i syomanga, na muzabibu gu niyalanga, vosi ava sangala va kenyanga. 8Ubusangali bwevindu ku lugano lwesugudi bu heri, isango ya yavo ava sangalanga i heri, ubusangali bwobukana bu heri. 9Si va la nwa iwaini halala netsinyimbu; amalwa ga la gwa ubululu ku yavo va nwedzanga. 10Lidala yilyo li veye kyanyi li tegulwa; tsinyumba tsyosi tsi haneywi miliango, a ta duka kwingira mundu kali mulala. 11Lilira li veye mu mahasi galyo kigira iwaini; busangali bwosi bu vikeywi kisundi, ubusangali bwosi bwekivala bu goti. 12Mu lidala mu tigaye vutswa, na kiribwa kyalyo ki duyeywi nobwoneku. 13Kigira ni ndiyo ga la va hagati helirova hagati ha tsihiri kuli lisung'uswa lyemizeituni, kuli lidola lyomuzabibu, lwa li la va ni li fweye.
14Yava va la ginga myoyo gyavo va la kupa lwanga; kigira ubukumi bwa Yahova, va la kupa lwanga kutwula ku inyanza. 15Kunangwa mu kuminye Yahova ku luvega lwevugwe, mu kuminye lieta lya Yahova Nyasaye wa Israeli, mu visulu vyomu inyanza. 16Kutwula ku luvega lwekiheri kyelirova kwa hulira tsinyimbu: Ubukumi bu ve ku valungi.
Navutswa nda vola, Inze nda ng'aha, nda ng'aha bayaye bu veye ku inze avobugadi va tumekira ubugadi bwavo; yee, avobugadi va tumekira ubugadi ligali. 17Ubutii, na ubogo, na mutego, vi veye ku ive, O mmenye ku lirova. 18Ga la duka uyu wirukanga kigira liyoga lyobutii a lirana mu bogo; na uyu u senukanga kutwula mbogo a la hambwa mmutego: kigira madirisha ga veye igulu ga kunuleywi, na mise gyelirova gyi dengeyi. 19Lirova li vunannyeywi ligali, lirova li syavuluki, lirova li sung'usiki ligali. 20Lirova li la yekayeka kuli muhambiki, nokuhungudzwa yiyi neyiyi kuli mwinuya; nelihyolo lyalyo li la va liliduhu kulyo, na li la gwa, nokuvula kuvuka kandi.
21Na ga la va mu lidiku yilyo, Yahova a la kalagira kiduma kya yavo aveginga igulu, navami velirova ava veye ku lirova. 22Na va la vungidzwa halala, kuli avahambi va vungidzangwa halala mu bogo, na va la bofwa mu inyumba yavahambe; na va la lolwa inyima wa madiku manyingi. 23Ma mweli gu li va netsisoni, neliuva li la va netsisoni; kigira Yahova wa mahe a lameha mu kigulu kya Zioni, nomu Yerusalemi; kandi imbiri wa avakulundu veve ha la va nobukumi.
©Bible Society of Kenya, 1967