Isaya 19
19
1Ubuliduhu bwa Egepeti. Henza, Yahova a ninanga ku lilesi li gendanga bwangu nokuduka Egepeti: nevifwananyi vyokusigami rwa vya Egepeti vi la dengeya imbiri wewe; nomwoyo gwa Egepeti gu la yenguka hagati hakyo. 2Na nda vukidza Avaegepeti kuhing'ana na Avaegepeti: na va la lwana sa mulala namwavo wewe, sa mulala na wakye; lidala nelidala, ubwami nobwami. 3Na roho gwa Egepeti gu la kudza hagati hakyo; na ndononnya makuva gakyo: va la tsia ku vifwananyi, noku vasegetiri noku vang'oli, noku va kumu. 4Na nda vika Avaegepeti mmukono gwomwami mululu; nomwami welitihidza a lameha kuvo, Yahova ya vola, Yahova wa mahe.
5Na amadzi ga twulanga mu inyanza ga la kama, na mugera gu la gota nokwuma. 6Na migera gyi la funya; visenukiru vyamadzi vya Egepeti vi la geha nokukama; kirago na lihunzu vi la niala. 7Na bunyasi bu veye ku intulu gwomu gera gwa Nili, ku luginga lwomugera gwa Nili, halala na vyosi vya tagwa ahimbi ku Nili vi la niala, nokutwulidzwa, si vi la va ho kandi mba. 8Na valuvi va la lira, na yavo vosi ava limbikanga mu mugera gwa Nili va la verera, na yavo avinikanga miluvu mu madzi va la geha tsingulu. 9Halala na yaga ava kolanga miyinzi gyokukupa katani, na yavo ava lu kanga tsingubo tsindavu, va la va tsisoni. 10Na tsitiru tsya Egepeti tsi la vunanywa; na yavo vosi va kola miyinzi gyokutungwa va la verera mu myoyo gyavo.
11Avanene va Zoan va siruhala ligali; makuva ga vavoli va Farao avobugeeri ligali ga gwiye makuva getsinyama; mu volere ndi Farao, kuvola, Inze mbeye mwana wa yavo avobugeeri, mbeye mwana wavamr va kale ligali? 12Avobugeeri vovo va veye haliha? Va ku volere kalunu; na va manye ni inkuva ki ya Yahova wa mahe a saaviye ku Egepeti. 13Avanene va Zoan va gwiye avasiru, avanene va Nofu va gadeywi; va gotidzi Egepeti kutsia mu livoyavoya, ava li ligina lyolwiga lwetsihiri tsyakyo. 14Yahova u tsugannyi roho gwobukyamu hagati hakyo; na va gotidzi Egepeti mu miyinzi gyakyo gyosi, kuli muhambiki a yekayekanga mu liluka lilye. 15Egepeti si i la va nemiyinzi kali mulala, gyi nyala kukolwa nomutwe kinga mukira, kinga litu lyamakindu, kinga mmberam.
16Mu lidiku yilyo Avaegepeti va la fwanana navakali; na va la degera nokutia kigira lisung'usa lyomukono gwa Yahova wa mahe, gwa a sung'usanga kuvo. 17Na kivala kya Yuda ki la va litihidza ku Egepeti, mundu sa mulala u volerwa makuva gakyo a la tia, kigira lisaavira lya Yahova wa mahe, lya a saavira kukyo.
18Mu lidiku yilyo ga la va ho mu kivala kya Egepeti amadala gatano aga tumekira lulimi lwa Vakanani, nokwisuhira Yahova wa mahe; lidala lilala li la langwa Lidala lyobwoneku. 19Mu lidiku yilyo bu la va ho mu kivala kya Egepeti ubwali bwa Yahova, noku lwako lwakyo munara gu la va ho ku Yahova. 20Na gu la va kilolekidzu nekyokumanyira gu vuula Yahova wa mahe mu kivala kya Egepeti; kigira va lanira Yahova ki gira yavo ava va dambidzanga, naye a la leta kuvo muhonnyi, nokuvasola, na a la va honnya. 21Na Yahova a la manyekana ku Egepeti, na Avaegepeti va la manya Yahova mu lidiku yilyo; yee, va la sigamira nokuhaana vihaanwa nevindu, na va la kola lilagana na Yahova, nokulikola. 22Na Yahova a la kuya Egepeti, kukuya nokuhonnya; navo va lirana ku Yahova, naye a la bugirira lisaala lyavo, nokuvahonnya.
23Mu lidiku yilyo lihasi li la va ho kutwula Egepeti kuduka Asuria, na Muasuria a lingira Egepeti, na Muegepeti a lingira Asuria; na Avaegepeti va la sigamira halala na Vaasuria.
24Mu lidiku yilyo Israeli ki la va kya kavaka halala na Egepeti na Asuria, va la va vokugasidza hagati helirova; 25kigira Yahova wa mahe u va gasidzi, na a vola, Va gasidzwe Egepeti avandu vange, na Asuria miyinzi gyamakono gange, na Israeli miyandu gyange.
©Bible Society of Kenya, 1967