Isaya 14
14
1Kigira Yahova a la vererera Yakobo, na a la tovola Israeli, na a la va vika mu kivala kyavo: na mumenya a la hambana navo, va la hambana nenyumba ya Yakobo. 2Navandu vetsihiri va la va vugula, nokuvaleta mbugono bwavo; nenyumba ya Israeli i la va navandu yavo mu kivala kya Yahova, va ve avatugwa vavo navakana vatugwa vavo: na va la va hamba ubuhambe ava li avahambe vavo; va lameha ku yavo ava li avadambidzi vavo.
3Na ga la duka mu lidiku yilyo lya Yahova a ku sosidza ku liverera lilyo, noku litihidzwa lilyo, noku butumekiri budinyu bwa wa tumekirwa, 4ga la va u la vola lugano yilu ku mwami wa Babuloni, kuvola, Ai wa ku dambidza ya hera ndi lidala lyethahabu lya hera kuli ndi 5Yahova ya vunannya midigiru gya vadamano, impimbo yobwami ya yavo avamehanga; 6avakuya avandu nobutima ku likuya lyakazozo, vameha ku tsihiri mu butima, neli dambidza lyomundu a vula kwigalira. 7Lirova lyosi li sosa, nokwelemereridza: va leterera tsinyimbu. 8Yee, misala ku lugano lwemitaragwa gya sangalira ive, na misala gya Lebanon, gya vola, Kutwula lwa wa vikwa hasi, si ha veye nomundu mutemi wemisala u dukanga ku kwinye. 9Kihadisi kya hasi kya sung'uswa kigira ive ki duke ku ku vuganira lwa udzanga; ki vukidzanga avukudzu kigira ive, kali vosi yavo avanene vomu lirova; ki vukidza avami vosi vetsihiri va twule ku tsintebe tsyavo tsyobwami. 10Yavo vosi va la tivula nokukuvo lera, Ive kandi u gwiye mudedekere kuleng'ana nekwinye? Ive u gwiye lugano lulala nekwinye? 11Ubunene bubwo bwikidzeywi hasi mu Kihadisi, nemyoyo gyamamuga gogo: ing'ende i vagaywi isi wowo, netsing'ende tsi ku kuniki.
12Wagalulwa kuli ndi kutwula migulu, ive Lusiferi, mwana womugamba wa kalika kuli ndi kuduka hasi, ive wa vika tsihiri tsyosi hasi 13Na wa vola mu mwoyo gugwo, Inze ndanegira kuduka migulu, nda ginga intebe yange yobwami igulu kuvita tsing'ering'ani tsya Nyasaye; na ndikala ku kigulu kyelivugana, mu tsimbega tsyekiheri kyakasikasini; 14nda nina igulu kuvita ubwerefu bwamalesi; ndekola mwene kuva lugano lulala na uyu U Veye Igulu Ligali. 15Navutswa u likidzwa hasi kuduka ku Kihadisi, kuduka ku tsimbega tsyekiheri ligali tsyobogo. 16Yavo ava lolanga ive va la kwu mika ligali, nokukuganagana ligali, ni va vola, Uyu niye umundu wa degeridza lirova yili, uyu wa dege yidza ubwami bunyingi; 17wa kola lirova kuva kuli kyangalangwi, noku tung'aminya madala galyo; uyu wa vula kuboholola avahambe veve vi rane wavo? 18Avami vosi avetsi hiri, vosi ligali, va gona mu bukumi, sa mulala mu inyumba yeye mwene. 19Navutswa ive u tebeywi kyova ihale nekilindwa kikyo kuli lusya lwokuvihiriridza, wa vikwa yavo aviitwa, yavo avatumitwa nekivavi, yavo avikanga mu magina gombogo; kuli mubiri mukudzu gwa duvagirwa hasi nevirenge. 20Ive si u la hambana navo mu litebwa mba, kigira wononnya kivala kikyo, wiiti avandu vovo; kisukululwi kya yavo ava kolanga ubudamano ki la vula kutalwa mihiga nemihiga.
21Mu lungikidzire avana veve liitwa kigira ubudamano bwavadada vavo; va vule kusingira, nokugumira kivala, nokwizulitsa lirova amadala. 22Na nda singira kuhing'ana navo, Yahova wa mahe a vola, nda kalaga kutwulidza ku Babuloni lieta nelitigala, na mwana muyai na mwisukulu, Yahova a vola. 23Na nda kola kivala yikyo ki gwe kivala kyevilungu vi menya mu, na madavalia: na nda kyeya na meyo agobwoneku, Yahova wa mahe a vola.
24Yahova wa mahe yisuha, na a vola, Ligali, kuli nda saavira, vi la va ndiyo; kuli ndalalira, i la singira ndiyo: 25nda vunannya Muasuria mu kivala kyange, nda mu duvagira isi wevirenge mu vigulu vyange: kunangwa inira yeye i la twula kuvo, nemisigo gyigye gyi la twula ku ma vega gavo. 26Lisaavira lya saavirwa ku lirova lyosi ni yili; nomu kono gwa nyirwa ku tsihiri tsyosi ni yigu. 27Kigira Yahova wa mahe wa saavira, nibwaha u la kola ga vule kuva? Nomukono gwigwe gwa nyirwa, nibwaha u girunkannya gwirane? 28Mu muhiga yigwo gwomwami Ahazu ya kudza lya li ho likuva yili liliduhu.
29U ta sangala, ive Filisitia, ive wosi, kigira impimbo ya ku kuya i vuniki; kigira mu kitinya kyenzoka, kihirigoma ki la twula mu, nolwivulo lwakyo lu la va inzoka yokubuluka yomuliru. 30Na wokutanga kwivulwa womudaka a la lia vyokulia, nomudambi a la gona hasi nemirembe; na ndiita kitinya kikyo nenzala, nelitigala lilyo li liitwa. 31U kupe tsikwili, O kiribwa; u lire, O lidala; wa salaluka ku kama, O Filisitia, ive wosi; kigira mwoki gu twula kasika sini, na si ha veye nomundu kuvo u lyeyahula mu tsinyinga tsyagwo tsya lagwa.
32Kunangwa mundu a la tivulira ndi avatumwa vehiri? A la vola, Yahova u temi muse gwa Zioni, na yavo va dambidzwa mu avandu veve va lirukira yo.
©Bible Society of Kenya, 1967