Isaya 13
13
1Ubuliduhu bwa Babuloni bwa Isaya mwana wa Amozu ya lola.
2Mwesingeridzire ibendera ku kigulu ki ta veye nemisala kinga ubulimu, mu hanzuke myoyo gyenyu, mu va sime nomukono, va duke kwingira mu viribwa vyavanene. 3Inze mali kulaga avandu vange avatakatifu, yee, nnangi avetsingulu vange kigira ubutima bwange, yava ava sangala mu bunene bwange. 4Liyoga lyavanyingi mu vigulu, kuli liyoga lyavandu vanene Liyoga lyomuliviti gwobwami bwetsihiri bwa vugana halala Yahova wa amahe ya vungidza amahe ku ubulwani zana. 5Va twula mu kivala kyehale, kutwula ku i kiheri kyegulu a veye Yahova, nevyuma vyobutima bwibwe, kudividza kivala kyosi.
6Mu kupe tsikwili; kigira lidiku lya Yahova li veye ahimbi; li ladza kuli ubudivi budzanga bu twulanga ku Uyu Wanyala Vyosi. 7Kigira yaga amakono gosi ga la va madediekere, nomwoyo gwomundu sa mulala gu la yengeka: 8na va la va nobutii: lilumwa nelisalira li la va gumira; va la kenya kuli mukali u veye mu lilumwa: na va la genyerana sa mulala nowakye; mumoni mwavo mu la va mumoni mwolumemo. 9Henza, lidiku lya Yahova lidzanga, li la va nobululu, halala nobutima nevihi rirwa vilulu; kukola kivala kuva hatswa, nokwononnya avobwoni ava kyo va twule ku. 10Kigira tsing'ering'ani tsyomigulu nelihambana lyatsyo si tsi laakidza ubulavu bwatsyo mba: neliuva li la kolwa kisundi mu livaala lyalyo, nomweli gu la vula kwaakidza ubulavu bwa gwo. 11Na inze nda kalagira lirova yili kigira ubudamano bwalyo, nava damano nda va kalagira kigira ubu kyamu bwavo; na nda heridza luyai lwa yavo avekirage, noluyai lwa yavo avatihidzi nda lu tsoma hasi. 12Nda kola mundu kuva wobuguli budinyu kuvita ithahabu, nomundu a ve mu lahi ligali kuvita ithahabu indahi ya Ofiru. 13Kigira yaga nda degeridza ligulu, nelirova yili li la sung'uswa li twule ha li vedzanga, mu ubutima bwa Yahova mu amahe, mu lidiku lyobutima bwibwe bululu. 14Na ga la duka, kuli imboongo ihimangwa, na kuli magondi gavandu va vula kuvungidza, ni ndiyo va la girunkana mundu sa mulala kutsia ku avandu veve, na va liruka mundu sa mulala a tsie mkivala kikye. 15Sa mulala u li nyoleka a la todzwa; na sa mulala u li gumirwa a la gwa ku kivavi. 16Avana vadoto vavo va la donyanywa imbiri wetsimoni tsyavo; netsinyumba tsyavo tsi la lanywa, navakali vavo va lononnywa.
17Henza, nda vukidza Avamedi va tsie kuvo, ava li vula kuhenza ifetha, nomu makuva gethahabu, si va gi sangalira. 18Buta buavo bu la vunannya avasoleli; na si va la vererera lwivulu lwenda; tsimoni tsyavo tsi la vula kuvererera avana. 19Na Babuloni, ubukumi bwobwami, ubulahi bwoluyai lwa Vakalidei, bu la va kuli Sodoma na Gomora lwa Nyasaye ya va dividza. 20Si bu la menywa ho navandu kandi, kandi si ha veye nomundu u menya mu ukutwula makula namakula: kandi Muarabu si a lombaka lihema lilye yo; kandi avayi si va la leka vyayo vyavo kugona yo mba. 21Navutswa tsinyama tsindulu tsyomwigendanyama nitsyo tsi li gona yo; netsinyumba tsyavo tsi lizula tsinyama tsyemyoyo gyokutihidza; maudo ga la menya yo, netsikole tsyombulimu tsi la kina yo. 22Visalong'ongo vi la lokera mu tsimpinga tsyavo, nevibwe mu tsinyumba tsyavo tsyobukumi tsyokuyanzidza: netsinyinga tsyalyo tsi veye himbi kuduka, na madiku galyo si ga la medwa livalidzwa.
©Bible Society of Kenya, 1967