Ezekieli 14
14
1Hene yaho avalala ku vakulundu va Israeli vadza ku inze, ni vikala imbiri wange. 2Na likuva lya Yahova lya duka ku inze, kuvola, 3Ive mwana womundu, avandu yava va viki vifwananyi vyavo mu myoyo gyavo, va viki kyokwikigitala kyobudamano bwavo imbiri wommoni mwavo: ga ndukira yavo va nteve ku makuva gosi?
4Kigira yaga u va volere nokuvavolera, Mwami Nyasaye a vola: Umundu sa mulala wenyumba ya Israeli u vugula kifwananyi kikye nokukivika mu mwoyo gwigwe, nokuvika kyokwikigitalidza kyobudamano bwibwe imbiri wommoni mwimwe, nokutsia ku muprofeti; inze Yahova nda mu tivulira ku likuva lilye kuli ubunyingi bwevifwananyi vivye; 5nduke kugumira inyumba ya Israeli mu myoyo gyavo avene, kigira veyahuye ku inze ku vifwananyi vyavo.
6Kunangwa u volere inyumba ya Israeli, Mwami Nyasaye a vola ndi: Mwirane, mweganire nokuleka vifwananyi vyenyu; mu girunkannye mmoni mwenyu mu vule kuhenza ku kivihiri kyenyu. 7Kigira mundu sa mulala mu inyumba ya Israeli, kinga avageni va menyanga mu Israeli, u twulidzanga mwoyo gwigwe ku inze, nokuvugula vifwananyi vivye mu mwoyo gwigwe, nokuvika kyokwikigitalidza kyobudamano bwibwe imbiri wommoni mwimwe, nokutsia ku muprofeti kunteva likuva ku mwoyo gwigwe: Inze Yahova nda mu tivulira, inze mwene: 8na nda dinnya mmoni mwange ku mundu uyu, na nda mu kola a ve kyokugenya, kandi a ve kilolekidzu, nolugano, na nda mu twulidza hagati ha vandu vange: na mu la manya inze mbeye Yahova. 9Kandi ni i va muprofeti uyu ya gadwa nokuvola likuva ku gosi Ninze, Yahova, wa gada muprofeti uyu, na nda nyira mukono gwange kuye, nokumudividza a twula hagati ha vandu vange Israeli. 10Na va la ginga ubudamano bwavo: budamano bwa uyu muprofeti bu la leng'ana nobwa uyu wa tsia kuye kumuteva, 11inyumba ya Israeli i vule kuvoyavoya ihale ku inze kandi, kinga va vule kwivika mu bubi kandi ku mahyolo gavo gosi; navutswa va ve avandu vange, na inze mbe Nyasaye wavo, Mwami Nyasaye a vola.
12Na likuva lya Yahova lya duka ku inze, kuvola, 13Ive mwana womundu kivala ki kolera inze ubwoni ku likoia mahyolo, na nda nyira mukono gwange kukyo, nokuvunannya mudigiru gwevyokulia vyakyo, na nda leta inzala kukyo, nokutwulidza avandu nemitugu: 14kali avandu yava vavaka, Nuhu, na Danyeli na Ayubu ni va veye mukyo, nkano va ka honnya myoyo gyavo avene gyeng'ine mu ubulungi bwavo, Mwami Nyasaye a vola. 15Ni ndeta tsi nyama tsindamano tsi vite mu kivala yikyo, nokukyononnya, kuduka kuva hatswa, kuduka si ha veye nomundu u vita mu kivala yikyo kigira tsinyama zana; 16kali avandu yavo vavaka ni va veye mukyo, kuli inze mbeye mwoyo, Mwami Nyasaye a vola, si va la honnya avayai kinga vakana; avene veng'ine va la hona, navutswa kivala ki la tigala hatswa. 17Kinga ni ndeta kivavi ku kivala yikyo, nokuvola, Kivavi, vita hagati he kivala yikyo; kuduka kutwulidza ku kivala yikyo avandu nemitugu; 18kali avandu yavo vavaka ni va veye mukyo, kuli mbeye mwoyo, Mwami Nyasaye a vola, si va la honnya avayai kinga avakana, navutswa avene veng'ine va la honnywa, 19Kinga ni ndeta ubulwaye mu kivala yikyo, nokutsuka ubutima bwange kukyo mu masahi, kutwulidza kukyo avandu nemitugu: 20kali ni va veye mukyo Nuhu, na Danyeli, na Ayubu, kuli mbeye mwoyo Mwami Nyasaye a vola, si va la honnya avayai kinga avakana; va la honnya myovo gyavo avene gyeng ine mu ubulungi bwavo.
21Kigira Mwami Nyasaye a vola ndi: Ga la va kuvita kuli ndi lwa ndeta gokukalaga gange gane yaga bululu ku Yerusalemi, kivavi, nenzala, netsinyama tsindamano, nobulwaye, kuduka kutwulidza ku kivala avandu nemitugu 22Navutswa, henza, va la tigala yavo ava lihilwa kyova, avayai navakana: yava va li loleka ku mwinye, na mu la lola tsinzira tsyavo, nelikola lyavo; na mu la leminywa myoyo mu makuva gobudamano bwa nda leta ku Yerusa lemi, kali mu vyosi vya nda leta kuiyo. 23Na va la leminya myoyo gyenyu, lwa mu lola tsinzira tsyavo nelikola lyavo: na mu la manya si nda kola bugira kivune yago gosi aga nda kola mulyo, Mwami Nyasaye a vola.
Currently Selected:
Ezekieli 14: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
