Kohelethu 2
2
1Nda vola mu mwoyo gwange, Kalunu hamba, nda geridza ive nelisangala: kunangwa u lole ubusangali: kandi, henza, yaga kandi ga li ga vutswa. 2Mmakuva geliseka nda vola, Ga veye bulalu; nomu makuva gobusangali nda vola, Ga kola ki? 3Nda henzeridza mu mwoyo gwange kuli nnyala kusangalidza mubiri gwange na iwaini, nomwoyo gwange gwa li ni gu nyimirira nobugeeri, kandi kuli ng'umiri ubusiru, nduhe ndole ni kindu ki ki konya avana vavandu va duka kugikola isi weligulu amadiku gosi gelimenya lyavo. 4Ndelombera miyinzi minene; ndeyombakira tsinyumba lugano lugano; ndetagira milimi gyemizabibu; 5ndelombera milimi lu gano lugano, noluhya, na nda taga mulwo misala gyamakuyu getsingano tsyosi; 6ndelombera madavalia gamadzi, nduke kusuma mulitu hemisala midoto gyasimikwa; 7nda gula vatugwa avayai na navakana, na vatugwa vivulwa mu inyumba yange: kandi nda li nobutugi bunyingi bwetsing'ombe namagondi, kuvita vosi a vimira imbiri wange mu Yerusalemi; 8kandi ndevungidzira ifetha nethahabu, nemiyandu gyobwami na gyevivala vya ihale na ihale; ndenyolira avandu avasatsa avokwimba navakali avokwimba, nelyesyaha lyavana vavandu, nobukana bwetsinyimbu tsyetsingano tsyosi. 9Ma nda gwa munene, nokumedeka kuvita vosi a vimira imbiri wange mu Yerusalemi: ubugeeri bwange bwa menya halala ninze. 10Na ku vyosi kya tsimoni tsyange tsya kayirwa si nda tsima kya zana mba; si nda gaya mwoyo gwange mu busangali mba; kigira mwoyo gwange gwa li ni gu sangalira linyankana lyange lyosi; na yiki kya li kidieli kyange mu linya nkana lyange lyosi. 11Ma nda henza miyinzi gyosi gyamakono gange ga kola, nelinyankana lyosi lya nda nyankana ku: henza, vyosi vya li vya vutswa nokudidikana ku imbuudza, kandi si ha li nekyambeti kali kilala, isi weliuva.
12Ndegirunkannya nduke kuhenza ubugeeri, nobulalu, nobusiru: kigira mundu u li londa mwami a nyala kukola kindu ki? Ala kola ki mali kukolwa kutwula kale. 13Hene yaho nda lola ubugeeri bu vita ubu siru, kuli ubulavu bu vitanga kisundi. 14Tsimoni tsya uyu wobugeeri tsi veye mmutwe gwigwe, nomusiru a tsitsanga mu kisundi: halala na yaga nda lola inkuva indala i gwiranga vosi halala. 15Hene yaho nda vola mmwoyo gwange, Kuli yaga aga gwiranga umusiru, ni ndiyo ga la ngwira inze; na nda li nobugeeri kuvita, kigira ki? Hene yaho nda vola mmwoyo gwange, yaga kandi ga veye aga vutswa. 16Kigira si ha veye nokwidzulitswa mihiga nemi higa ku mugeeri, kuli musiru; kigira mu madiku gadzanga, yaga va la va ni va mali kwivirirwa. Nowobugeeri akudzaga ndi, ni halala kuli musiru 17Ma nda dunyira livamwoyo, kigira miyinzi gya kolwa isi weliuva gya saliridza inze; kigira yaga gosi na ga vutswa nokudidikana ku imbuudza.
18Na nda dunyira likola lyange lyosi lya nda kola isi weliuva, kigira nda lola ga ndukira ndekere mundu u li londa inyima wange. 19Kandi ni bwaha u manyanga a la va wobu geeri kinga musiru? Navutswa a lameha ku likola lyange lyosi lya nkoli, na mulyo ndolekidzi ubugeeri bwange isi weliuva. Kandi yaga gosi na ga vutswa. 20Kunangwa nda girunkana yiyi na yiyi nduke kutwulidza likayirwa ku mwoyo gwange mu makuva gelididikana lyange lya nda didikana mu isi weliuva. 21Kigira mundu a veye ho welididikana lilye li veye halala nobugeeri, na halala nelimanya, na nobusidza; navutswa kandi a la lekera mundu wa vula kudidikana mu, ki ve kidieli kikye. Yaga kandi ga veye ga vutswa nobudamano bunene. 22Kigira mundu a nyola ki mu lididikana lilye lyosi, nomu linyankana lyosi lyomwoyo gwigwe, lya a didikana mu isi weliuva? 23Kigira madiku gege gosi ga veye ubuvereri vutswa, nelinyankana lilye lyosi li veye ubusaliri: yee, kali inyinga yobu diku, mwoyo gwigwe si gu nyola lisosa mba. Yaga kandi na ga vutswa.
24Si ha veye nobulahi ku mundu kuvita yaga, a lie kandi a nwe, noku sangalidza mwoyo gwigwe mu bulahi, mu lididikana lilye. Kandi nda lola yaga ga twula mukono gwa Nyasaye. 25Kigira ni bwaha u nyala kulia, kandi ni bwaha u nyala kwesangalidza, kuvita inze? 26Kigira Nya saye a hedzanga umundu wa a yanza ubugeeri, nelimanya, nelisangala; navutswa a hedzanga wobwoni, linyankana, kuvungidza nokumeda, a duke kuha wa Nyasaye a yanza. Yaga kandi na ga vutswa, nokudidi kana ku imbuudza.
©Bible Society of Kenya, 1967