Danyeli 2
2
1Ku muhiga gwa kaviri gwelyameha lya Nebukadinezaru, Nebukadinezaru ya lota maloto; na roho gwigwe gwa henda, kandi tsindolo tsitsye tsya mu leka. 2Hene yaho mwami ya haana munwa kulanga avakumu, na avasegetiri, na avagongoyi, na Vakalidei, va volere mwami amaloto gege. Kunangwa vadza ni va singira imbiri womwami. 3Na mwami ya va volera, Ndoti liloto, na roho gwange gu henda kumanya liloto zana. 4Hene yaho Avakalidei va volera mwami nolulimi lwa Kisiria, O mwami, u menye mihiga nemihiga; u volere avatumekiri vovo liloto zana, na kwinye ku la ku mannya livuula lyalyo. 5Mwami ya tivula na a volera Avakalidei, Likuva zana li twula ku inze; ni mu va ni mu ta mmannya liloto ne livuula lyalyo, mu la temanywa vidonye, kandi tsinyumba tsyenyu tsi la kolwa isina. 6Navutswa ni mba ni mu mbolera liloto ne livuula lyalyo, mu la nyola ku inze vihaanwa na madanyi, nelidzominywa linene: kunangwa mu mmannye liloto nelivuula lyalyo. 7Navo va tivula hali kaviri ni va vola, Mwami u mannye kwinye, avatumekiri vovo, liloto, na kwinye ku la mannya livuula lyalyo. 8Mwami ya tivula na a vola, Manya ligali mwinye mwenya kunyola ubwiyangu, kigira mu lola likuva lvene li twuli ku inze. 9Navutswa ni mu va ni mu vula kummannva liloto, gu veye ho munwa mulala ku mwinye; kigira rnu lombi amakuva gobubehi na gobudamano kuvola imbiri wange, kuduka inyinga i luhe i girunkane: kunangwa mu mbolere liloto, na inze nda manya mu nyala kummannya livuula lyalyo. 10Avakalidei va tivula imbiri womwami, na va vola Si ha li nomundu mu lirova u nyala kuvuula likuva lyomwami, kigira si ha li nomwami, kinga munene, kinga munyampara, wa teva likuva kuli yili ku mukumu, kinga ku musegetiri, kinga ku Mukalidei. 11Nalyo li veye likuva li ta li lya kazozo lyomwami yenyanga, kandi si ha li no wundi u nyala kuvuula likuva yili imbiri womwami, ni va ta li vanya saye, avelimenya lyavo si li veye na avombiri. 12Kigira yaga mwami ya vihirirwa na a va nobutima ligali, na a haana munwa avandu avobugeeri vosi va Babuloni va dividzwe. 13Kunangwa munwa yigu gwa landa, na avandu avageeri va li kwiitwa; kandi venya Danyeli navakye veve viitwe.
14Hene yaho Danyeli ya tivula nobugeeri nobuhokya ku Arioku munyampara wavalindi vomwami, wa li na a twuli kutsia kwiita avandu vobugeeri va Babuloni; 15ya tivula na a volera Arioku munyampara womwami, Kigira ki munwa gwomwami gu veye nobwangu ndi? Ma Arioku ya vuulira Danyeli likuva zana. 16Na Danyeli yingira, ni yenya mwami a mu lage inyinga, a duke kuvuulira mwami livuula zana.
17Hene yaho Danyeli ya tsia ha inyumba yeye, na a volera Hanania, Mishaeli, na Azaria, avakye veve likuva zana: 18va saale ku Nyasaye womigulu, tsimbabasi ku likuva yili li viseywi, Danyeli na avakye veve va vule kudividzwa halala na avandi avandu avageeri va Babuloni. 19Ku nangwa likuva li viseywi zana lya vuulwa ku Danyeli mu malola gobu diku. Hene yaho Danyeli ya santidza Nyasaye womigulu. 20Danyeli ya tivula na a vola, Lieta lya Nyasaye li gasidzwe imihiga nemihiga; kigira ubugeeri netsingulu ni vivye. 21Na a girunkannyanga tsinyinga ne imihiga; a twulidzanga avami, nokuvika avami; a hedzanga avageeri ubugeeri, na limanya kuvo ava veye nelihulira; 22a vuulanga ivindu vi veye mu luliva nomu liviswa; a manyanga vi veye mu kisundi, na ubulavu bu menyanga halala naye. 23Nsantidzanga, nokukwidzominya, ive Nyasaye wavaguga vange, wa mpa ubugeeri netsingulu, na kalunu u mali kumannya inze likuva lya kwa teva ku ive; kigira u ku vuuliye likuva lyomwami. 24Kunangwa Danyeli ya tsia kwingira wa Arioku, womwami ya vika kudividza avandu avobugeeri va Babuloni; ya tsia na a mu volera ndi: U ta dividza avandu avobugeeri va Babuloni; u ndukidze imbiri womwami, na inze nda vuulira mwami livuula zana.
25Hene yaho Arioku ya hila Danyeli bwangu kuduka imbiri womwami, na a mu volera ndi, Inze nyoye mundu ku avana vobuhambe bwa Yuda, uyu a la vuulira mwami livuula zana. 26Mwami ya tivula na a volera Danyeli, welieta lindi lya li Beliteshazaru, Ive u nyala kumbuulira liloto lya nda lota, halala na livuula lyalyo? 27Danyeli ya tivula imbiri womwami, na a vola, Likuva lyo mwami yenya avageeri, na avasegetiri, na vakumu, na avang'oli vosi, si va nyala kuvuulira mwami; 28navutswa ha veye ho na Nyasaye migulu u vuulanga vi viseywi, uyu u mannyi mwami Nebukadinezaru, makuva aga li va ho mu madiku gekiheri. Liloto lilyo, na malola gomutwe gugwo ku kitali kikyo, ga veye yaga: 29Ku ive, O mwami, tsiganagani tsitsyo tsingira mu mwoyo gugwo ku kitali kikyo, ni ki, ki la duka inyinga yekiheri; na uyu u vuulanga agaviseywi u vuuliye ive aga li kolwa. 30Na vutswa ku inze, agaviseywi si ga vuuleywi ku inze kigira ubugeeri bwa mbeye nabwo kuvita avandi ava veye mwoyo, navutswa li veye livuula ii dukidzwe ku mwami, kandi ive u duke kumanya tsiganagani tsyomwoyo gugwo.
31Ive, O mwami, wa lola, na, henza, kifwananyi kinene. Kifwananyi yiki, kya li nobunene, na ubung'ereng'anu bwakyo bwa li bulahi, kya singira imbiri wowo; na liloleka lyakyo lya li nobutihidzi. 32Ku kifwananyi yiki, mutwe gwakyo gwa li gwethahabu indahi, na kiritu kyakyo na makono gakyo ga li gefetha, na inda yakyo na matango gakyo ga li gomugasa, 33na virenge vyakyo vya li vyekivya, na tsinduvatiru tsyakyo tsya li tsyekivya kidieli kilala, na kindi kya li ubudohi. 34Ive wa lola kuduka ligina lya twulidzwa bugira makono, lya duya kifwananyi ku virenge vyakyo vya li nekivya nobudohi, nokuvidonyannya vidonye. 35Hene yaho kivya, nobudohi, nomugasa, nefetha, na ithahabu, vya donyannywa halala, nokugwa kuli mukudzi gwo uloze gwekimei; na imbuudza ya vi hila, kuduka vi ta li na hokuva: na ligina lya duya kifwananyi lya gwa kigulu kinene, nokwizula lirova lyosi.
36Yili ni liloto; na kwinye ku la vuulira mwami livuula lyalyo. 37Ive, O mwami, u veye mwami wa vami, wa Nyasaye womigulu ya ku ha ubwami, ubunene, na tsingulu, na lidzominywa; 38kandi hosi ha avana va vandu va menyanga, na tsinyama tsyomwigendanyama, na manyonyi gombwerefu, u viki mmkono gugwo, kandi u kwamehidzi ku vyosi: ive u veye mutwe gwethahabu. 39Kandi inyima wowo bu la duka ubwami bundi uboke ku ive; na ubwami bwa kavaka bwomugasa, bu lameha ku lirova lyosi. 40Na ubwa mi bwa kane bu la va netsingulu kuli kivya, kigira kivya ki donyannyanga nokuguuta vyosi; kandi kuli kivya ki shonolanga yivi vyosi, bu la donyannya nokushonola. 41Kandi kuli ive wa lola tsinduvatiru na vino vyakyo, vya li vyobudohi bwomulongi, kandi vyekivya, ubwami yibwo bu la va bwelyavukana; navutswa mubwo tsi la va mu tsingulu tsyekivya, kuli wa lola kivya ki tsugannyeywi nobudohi budotidziywi. 42Kandi kuli vino vyevirenge vya li vyekivya, nevyo budohi, na ndiyo ubwami bu la va netsingulu nobusasuguku. 43Kandi kuli ive wa lola kivya ki tsugannyeywi nobudohi ubdotidzwi, va letsukannya nevisukululwi vyavandu; navutswa si va li hambana mba, kuli kivya si ki nyala kuhambana nobudohi. 44Kandi mu madiku ga avami yavo Nyasaye womigulu a la singeridza ubwami bu li vula kudiva mihiga nemihiga, na ubwami bwabwo si bu li lekwa kuva bwehiri yindi; navutswa bu la donyannya nokuheridza ubwami yibwo bwosi, na bwene bu la singira mihiga nemihiga. 45Kuli ive wa lola ligina lya twulidzwa ku kigulu bugira makono, na lya donyannya kivya, nomugasa, nobudohi, nefetha, nethahabu; Nyasaye munene u mannyi mwami amakuva gevindu vi li va ho mu madiku gadzanga: na liloto li veye lyeligali, na livuula li veye lyeligali.
46Ma mwami Nebukadinezaru ya gwa mammama, nokusigamira Danyeli, na ya haana munwa va mu letere ikihaanwa ne vi funyanga mwayu. 47Na mwami ya tivula na a volera Danyeli, na a mu volera, Ligali, Nyasaye wowo a veye Nyasaye wa vanyasaye, na umwami wa avami, na muvuuli wevindu vya viswa, kigira wa nyala kumbuulira liviswa yili. 48Ma mwami ya kola Danyeli kuva munene, na a mu ha madanyi manyingi, nokumwamehidza ku iprovinse ya Babuloni, nokuva munene ku avandu avageeri va Babuloni. 49Na Danyeli ya saava mwami, na ya vika Shadaraka, na Meshaka, na Abedinego, va ve ku makuva ga iprovinse ya Babuloni: navutswa Danyeli mwe ne ya li mu kiribwa kyomwami.
Currently Selected:
Danyeli 2: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
