Danyeli 1
1
1Ku muhiga gwegyivaka gwelyameha lya Jehoiakim mwami wa Vayuda, Nebukadinezaru mwami wa Babuloni yadza Yerusalemi, na a li kumbiridza. 2Na Yahova ya vika Jehoiakim mwami wa Vayuda mu mukono gwigwe, halala nekidieli kyeviju vyenyumba ya Nyasaye; naye ya vi vugula na a tsia navyo kuduka mu kivala kya Shinaru mu inyumba yomunyasaye wewe; na a vika viju zana mu inyumba yakiba yomunyasaye wewe. 3Na mwami ya volera Ashipenazu wa li munyampara wevitsiri vivye, a lete avana vayai avalala ku avana va Israeli, ku avenyumba yobwami noku avanene; 4avasoleli ava ta li nembala, navutswa aveligondo lilahi, avasidza mu bugeeri bwosi, kandi avelimanya, navahuliri velimanya, na avetsingulu kusingira mu inyumba yomwami; kandi ya mu volera a vegidze megidzo nolulimi lwa Vakalidei. 5Kandi mwami ya va lagira vyokulia vilahi vyobwami kazozo, kandi iwaini yomwene a nwedza ku, kandi ya laga va lageridzwe ndiyo mihiga gyivaka; inyima wagyo va duke kusingira imbiri womwami. 6Kunangwa ku yava, ku avana va Yuda, va li Danyeli, na Hanania, na Mishaeli, na Azaria. 7Na munene we vitsiri ya va gulika ameta: ya langa Danyeli, Beliteshazaru; na Hanania, ya langa Shadaraka, na Mishaeli ya langa Meshaka; na Azaria ya langa Abed-nego.
8Navutswa Danyeli ya saavira mu mwoyo gwigwe a vule kwivika mu budamano bwevyokulia vilahi bwomwami, kinga bwewaini ya ya nwedza: kunangwa ya saava munene wevitsiri a vule kwivika mu budamano. 9Kunangwa Nyasaye ya kola Danyeli a nyole liverwa netsimbabasi imbiri womunene wevitsiri. 10Na munene wevitsiri ya volera Danyeli, Ntidza munene wange mwami, wa lagira mwinye vyokulia vyenyu, na vyokunwa vyenyu: kigira ki mwami a la lola mmoni mwenyu, mu vule kuva mulahi kuli mwavasoleli avelikula lilala nemwinye? Na ndiyo mu la vika mutwe gwange mu buhimwa imbiri womwami. 11Kunangwa Danyeli ya volera mulindi wo munene wevitsiri ya vika ku Danyeli, na Hanania na Mishaeli, na Azaria: 12Mwadza u geridze kwinye avatumekiri vovo madiku likumi; va ku he tsingutsa ku lie, na amadzi ku nwe. 13Inyima wa yaga mumoni mwetu mu henzwe imbiri wowo, na mumoni mwavasoleli ava litsanga vyokulia vilahi vyomwami; na kuli u lola, u la kola ku vatumekiri vovo.
14Kunangwa ya va hulira ku likuva yili, na ya va geridza madiku likumi. 15Na inyima wa madiku likumi mumoni mwavo mwa loleka kuva mulahi kuvita, na va li avakomeru, kuvita avasoleli vosi ava litsanga vyokulia vilahi vyomwami. 16Kunangwa mulindi ya twulidza vyokulia vyavo, newaini ya ga va dukira kunwa, na a va ha tsingutsa.
17Kunangwa ku makuva ga avasoleli vane yava, Nyasaye ya va ha limanya nobusidza mmegidzo gosi nomu bugeeri bwosi: kandi Danyeli ya li nelihulira mu malola gosi momu maloto. 18Na inyima wamadiku agomwami ya laga va letwe yimu, munene wevitsiri ya va leta imbiri wa Nebukadinezaru. 19Na mwami ya volerana navo; na kuvo si va nyoleka ava leng'ana na Danyeli, na Hanania, na Mishaeli, na Azaria: kunangwa va singira imbiri womwami. 20Kandi mu makuva gosi gobugeeri na agelimanya, agomwami ya va teva ku, ya va lola kuva avalahi kuvita hali likumi, avakumu vosi na avasegetiri ava li mu bwami bwibwe bwosi. 21Kandi Danyeli ya hindira kuduka muhiga gwokutanga gwomwami Kiru.
Currently Selected:
Danyeli 1: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
