Vikolwa 26
26
1Agiripa ya volera Paulo, U veye nomunwa kuvola amakuva gogo mwene. Hene yaho Paulo ya nyira mukono gwigwe na a vola amakuva gege.
2Mbola mbeye nobugasu, mwami Agiripa, kigira lero nyala kutwulidza tsinkingiru tsyange imbiri wowo ku vindu vyosi vya Vayuda va nzalira: 3ligali kigira ive u manya miima gyosi namateva gosi ga Vayuda va veye nago: yiki ni kigira nku goonya wizodze u mbulire. 4Miima gyange kutwula inyinga nda li muyai ku matsyambiri gya li mu ihiri yange nomu Yerusalemi, Avayuda vosi va manya; 5ni va mmanya ku matsyambiri, ni venya kulolekidza, va nyala kuvola inze ku lyahuka lidinyu lyemiluka gyetu nda li Mufarisayo 6Kandi kalunu nsingira hano kukalagirwa ku lisuuvira lya Nyasaye ya suuviridza avaguga vetu; 7ku yili tsihiri tsyetu likumi na tsiviri, tsi tumekira Nyasaye netsingulu ubudiku nombasu, va geridza kuduka. Ku lisuuvira yili Avayuda va nzalira, O mwami 8Nyasaye na a va na a simugukidza avakudzi, kigira ki mu vola ni kindu ki ta nyala kubu girirwa? 9Inze ligali nda ganagana mwene, nobulahi nda kola vindu vinyingi vya hing'ana nelieta lya Yesu wa Nazareti. 10Na yaga kandi nda kola mu Yerusalemi: nda boha vanyingi ku vatakatifu tsinyumba tsyavahambe, nda nyola tsingulu ku vasalisi vanene, kandi inyinga viitwa nda bugirira. 11Nda va ha amageli tsinyinga tsinyingi mu masomero gosi, ni ngeridza kuvakola va nyege; kandi ndizula ubutima ligali, nda va dambidza kali kuduka mu madala ga vandi. 12Ku makuva yaga nda li ni ntsitsa Damasko netsingulu nebaruwa yavasalisi vanene. 13Mbasu hagati, O mwami, nda lola ubulavu bwa twula mu ligulu, bwa vita ubulavu bweliuva, bwa ng'ereng'ana ku tsimbega tsyange tsyosi navo ava genda halala ninze. 14Lwa kwa gwa hasi kwosi, nda hulira mwoyo gu mbolera mu lulimi lwa Vahebraina; Saulo, Saulo kigira ki u ndambidza? Nu budinyu ku ive kulasa luvasi ku kivambo. 15Kandi inze nda vola, U veye ibwaha, Mwami? Kandi Mwami ya vola, Inze ni Yesu wa u dambidza. 16Navutswa vuka, u singire nevirenge vivyo: kigira inze mmali ku loleka ku ive ku yaga, nku kole mutumekiri wange nomulolekidzi wevindu vya u loli ku inze, nevya u li manywa ninze; 17ni nku honnya ku vandu noku Tsihiri, ava nku tuma kuvo, 18kuvakunula tsimoni tsyavo va twule mu kisundi va yeke ku buiavu, kandi va twule ku tsingulu tsya Setani va yeke ku Nyasaye, ni va nyola lisamefwa lyobwoni va vugule miyandu halala navo ava takaswa nelisuuvira li veye mu inze. 19Hene yaho, O mwami Agiripa, si nda sula kulonda kiloleki kyegulu: 20navutswa ku matsyambiri ndilwadza ku va Damasko, kandi mu Yerusalemi nomu kivala kyosi kya Buyuda kyosi, kandi ku vandu ve Tsihiri, veganire, va yeke ku Nyasaye nokukola miyinzi gyi dukana nobweganiri. 21Kigira yaga Avayuda va ngumira mu litempeli ni venya kunziita. 22Navutswa kigira nda nyola ubuhonnyi bwa twula ku Nyasaye, nsingira hano kuduka kali lero nokulolekidzira avakekeke navanene, kandi si mbola kindu, geng'ine ga vyavaprofeti na Musa va vola vi ladza; 23kuli ga dukira Kristo a saliridzwe, kandi kuli mwene a la tanga kusimugukidzwa mu vakudzi, nokwilwadza ubulavu ku vandu noku Tsihiri.
24Lwa ya li ni ikinga ndiyo, Festo ya vola nomwoyo munene, Paulo, u laluki, lisoma lilyo linyingi li ku lalukidza. 25Navutswa Paulo ya vola, Si mbeye nobulalu, Festo mulahi; navutswa mbola amakuva geligali na gobugeeri. 26Kigira mwami wa mbolera nobuluviriri, a manya amakuva gevindu yivi; kigira mbola, vindu yivi si vi viswa kuye kali kilala, kigira yivi si vya kolwa mu king'oze mba. 27Mwami Agiripa, u suuvira avaprofeti ? Mmanya u suuvira. 28Agiripa ya volera Paulo, Nobugoonyi bukekeke vutswa u ganagana kunkola Mukristayo. 29Paulo ya vola, Nsaala Nyasaye, ni bu va bukekeke kinga ubunene, si a li ive weng'ine navutswa vosi ava mbulira lero, va ve kuli inze ligali, ni li ta li libofwa yili.
30Mwami ya singira, nomwami mukekeke, na Berinike navo avikala navo: 31lwa va twula va volerana ni va vola, Mundu uyu si a veye nekindu ki duka a kudze kinga a bofwe. 32Naye Agiripa ya volera Festo, Mundu uyu a vula kwanira ku Kaisari nkano u boholeywi.
Currently Selected:
Vikolwa 26: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
