Vikolwa 18
18
1Inyima wevindu yivi, ya twula Athene na a duka Korintho. 2Ya nyola yo Muyuda mulala wa langwa Akula, wivulwa mu Ponto, a duki kutwula Italia, halala nomukali wewe Prisila kigira Klaudio ya laga Avayuda vosi va twule mu kivala kya Romi: ya tsia kuvo. 3Kandi kigira va li nomuyinzi mulala ya menya navo, ni va kola miyinzi; kigira miyinzi gyavo va li avasidza vamahema. 4Ya vola mu lisomero masabato gosi na a girunkannya myoyo gya Vayuda na Vagreki.
5Navutswa Sila na Timoteo lwa va duka kutwula Makedonia, Paulo ya tsuvwa mu mwoyo nelikuva na a lolekidzira Avayuda, Yesu a veye Kristo. 6Lwa va hangalidzana naye ni va nyega, ya sung'usa ingubo yeye na a va volera, Masahi genyu ga ve ku mitwe gyenyu avene; inze ntigaye museredze: kutwula kalunu ntsitsa ku Tsihiri. 7Ya twula ho ni yingira mu inyumba yomundu mulala wa langwa Tito Yusito, mundu wa sigamira Nyasaye; we nyumba yeye ya hambana nelisomero. 8Kandi Krispo, munene welisomero, ya suuvira Mwami, halala navenyumba yeye vosi; kandi avanyingi ku Vakorintho va hulira ni va suuvira, ni va batidzwa. 9Kandi Mwami ya volera Paulo mu maloto mu budiku, U ta tia, navutswa u vole u ta kiring'ana mba: 10kigira mbeye nive halala, si ha veye nomundu u lidza ku ive kukwononnya: kigira mbeye navandu vanyingi mu lidala yili. 11Kandi ya menva ho muhiga mulala nemyeli gyitanu na mulala, ni yegidza likuva lya Nyasaye kuvo.
12Navutswa lwa Galio ya li mwamehi wa Akaiya, Avayuda va twulira Paulo nomwoyo mulala ni va mu leta imbiri wekisako kyekyina, 13ni va vola, Mundu uyu a goonya avandu va sigamire Nyasaye ku lugano lu ta li kuli lilaga. 14Na vutswa Paulo lwa yenya kukunula munwa gwigwe, Galio ya volera Avayuda, Ni ga va amakuva gekirage kinga ubwoni budamano, mwinye Avayuda, nkano nda ka mu hulira: 15navutswa ni ga va amahangali gamakuva ku ameta noku malago genyu, mwinye avene mu henze ku; inze si nyenya kuva mukalagi wamakuva ku yaga. 16Na a va kunga va twule ku kisako kyekyina. 17Kandi vosi va gumira Sosithene munene welivugana, ni va mu kuya imbiri wekisako kyekyina. Kandi Galio si ya lola vindu yivi kuva vinene.
18Inyima wa yaga, Paulo ya menya madiku manyingi, na a siivula avamitu, na a nina mu bwato kutsia Siria, kandi Prisila na Akula ra tsia halala naye. Ya vegera mutwe mu Kenkerea; kigira ya li na a mali kweyama. 19Va duka Efeso, na a va leka ho: navutswa mwene yingira mu lisomero, na a volerana na Vayuda. 20Kandi lwa va mwenya a menye madiku gandi, si ya bugirira mba; 21navutswa ya siivulana navo, na a vola, Ndirana ku mwinye kandi, Nyasaye na a va na a yanza. Ya nina mu bwato na a twula Efeso.
22Kandi lwa ya mala kwika Kaisaria, yanegira na a chelidza livugana, na a tsia Antiokia. 23Lwa ya mala yo inyinga i duki, ya twula na a vita kivala kya Galatia na Frigia madala namadala, na a dinyeridza avegidzwi vosi mwoyo.
24Muyuda mulala wa langwa Apolo, wivulwa Alekisanderia, kandi mulongoli, ya duka Efeso; kandi mgulu ku mang'oda. 25Mundu uyu ya li na a mali kwegidzwa inzira yo Mwami; ya li nomwoyo muholo, ya vola ni yegidza bulungi amakuva ga Yesu, navutswa ya li ni ya manya libatidza Iva Yohana lyeng'ine. 26Kandi ya tanga kuvola mu lisomero nobuluviriri. Navutswa Prisila na Akula lwa va mu hulira, va mu vugula ni va mu vuulira bulahi kuvita inzira ya Nyasaye. 27Kandi lwa yenya kutsia Akaiya, avamitu va mu tsuva, ni va ng'odera avegidzwi va mu bugirire. Kandi lwa ya duka, va va konya ligali ava suuvira netsimbahasi; 28kigira va guuta Vayuda ligali imbiri wavandu, na a va mannya namang'oda, Yesu a veye Kristo.
Currently Selected:
Vikolwa 18: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
