2 Samweli 2
2
1Na ga duka inyima wa yaga, Daudi ya teva Yahova, na a vola, Nzanegire kwingira mu lilala ku madala ga Yuda? Na Yahova ya mu volera, Wanegire. Na Daudi ye teva, Nzanegire kutsia haliha? Naye ya vola, U tsie Hebironi. 2Ma Daudi yanegira kutsia yo, navakali veve vaviri vanegira halala naye, Ahinoam Mujezireeli, na Abigaili wa li muka Nabali Mukarimeli. 3Navandu veve ava li halala naye, ya va leta, sa mulala navandu venyumba yeye: nfivo va menya mmadala ga Hebironi. 4Navandu va Yuda va tsia, ni va vakira yo Daudi maguta, a ve mwami ku inyumba ya Yuda. Na va volera Daudi, ni va vola, Avandu va Jabeshgileadi nivo ava ta Saulo. 5Na Daudi ya tuma avatumwa ku avandu va Jabeshgileadi, nokuvola, Yahova a gasidze mwinye, kigira mwa vera munene wenyu tsimbabasi, uyu Saulo, na mwa mu ta. 6Na kalunu Yahova a kolere mwinye tsimbabasi nageligali: na inze kandi nda mu tunga tsimbabasi yitsi, kigira mu koli inkuva yiyi. 7Kunangwa kalunu makono genyu ga ve netsingulu, nomu ve avaluviriri; kigira Saulo, munene wenyu u kudzi, navenyumba ya Yuda va mbaki maguta mbe mwami kuvo.
8Na Abineri mwana wa Neri, wa li munene welihe lya Saulo, w a vugula Ishboshethu mwana wa Saulo, na a mwambukidza na a mu leta Mahanaim; 9na a mwamehidza a ve mwami ku Gileadi, noku Vaashuru, noku Jezireeli, noku Efiraim, noku Benjamini, noku Israeli vosi. 10Ishboshethu, mwana wa Saulo, ya li na a duki mihiga makumi gane lwa ya tanga kwameha ku Israeli, na yameha mihiga gyiviri. Navutswa avenyumba ya Yuda va londa Daudi. 11Na inyinga ya Daudi ya li mwami mu Hebironi ku inyumba ya Yuda gya li mihiga gyitano na gyiviri nemyeli gyitano na mulala.
12Na Abineri mwana wa Neri, navatumekiri va Ishboshethu mwana wa Saulo, va twula Mahanaim kutsia Gibeon. 13Na Joabu mwana wa Zeruia, navatumekiri va Daudi, va twula ni va vugana navo himbi nelidavalia lya Gibeon; na vikala, yava ku luvega yilu lwelidavalia, na yava ku luvega lundi. 14Na Abineri ya volera Joabu, Mwadza, leka avasoleli yava va singire va kine imbiri wetu. Na Joabu ya vola, Va singire. 15Hene yaho va singira ni va tsia ku luvega lundi ku livalidzwa lyavo: likumi na vaviri ku Benjamini, ku Ishboshethu mwana wa Saulo, na likumi na vaviri ku vatumekiri va Daudi. 16Navo va gumirana sa mulala ya gumira wakye mutwe, nokutumita kivavi kikye mu mbalu mwawakye; ni ndiyo va gwa hasi halala: kigira yaga, ha zana ha langwa Helikathuhazurim, niho ha veye mu Gibeon. 17Nobulwani bwa li budinyu ligali lidiku yilyo; na Abineri ya guutwa, navandu va Israeli, imbiri wavatumekiri va Daudi.
18Navana vavaka va Zeruia va li ha zana, Joabu, na Abishai, na Asaheli: na Asaheli ya li wetsimbiru kuli imbongo. 19Na Asaheli ya londerera Abineri; na mu litsia lilye si ya girunkana ku luvega lyomukono mulungi kinga mukono mosi ku lilonderera Abineri. 20Ma Abineri yekevuka, na a teva, Ive u veye Asaheli? Naye ya bugirira, Yee, ninze. 21Na Abineri ya mu volera, Girunkana u tsie ku luvega lwomukono gugwo mulungi, kinga ku luvega lwomukono gugwo mmosi, na u gumire mulala ku vasoleli, u vugule vindu vivye vyobulwani. Navutswa Asaheli si ya bugirira kugirunkana nokuleka limulonderera. 22Ma Abineri ya volera Asaheli kandi, Girunkana u leke kunonda: kigira ki inze nduke kukukuya hasi ku lirova? Kunangwa nda nyala ndi kuginga mmoni mwange kuhenza amwavo wowo Joabu? 23Navutswa ya sula kugirunkana: kigira yaga Abineri ya mu tumita mmunda nesililini lyelitimu lilye, nelitimu zana lya twulira mugongo; naye ya gwa ha zana yaho, na a kudzira ho: na ga duka, ku yavo vosi ava duka ha zana ha Asaheli ya gwa na a kudza, va singira ho.
24Navutswa Joabu na Abishai va londerera Abineri: liuva lya yera lwa va duka ku kigulu kya Ama, ki henza ku Gia, ku inzira ya migendanyama lya Gibeom 25Navana va Benjamini va vugana halala inyima wa Abineri, navo va li kiduma kilala, ni va singira ku kigulu kilala. 26Hene yaho Abineri ya langa Joabu, na a mu volera, Kivavi yikyo ki la mira madiku gosi? Si u manya bu la va ubululu ku kiheri? I la duka inyinga ki nu u laga avandu kuleka kulonoda avamwavo vavo? 27Na Joabu ya vola, Kuli Nyasaye a veye mwoyo, ive u vula kuvola, ngano avandu yavo va tsiye mugamba, kinga ngano si va londi sa mulala amwavo wewe mba. 28Na Joabu ya kupa kisiliva; navandu vosi va singira, navo si va londerera Israeli kandi mba, kandi si va lwana mba. 29Na Abineri navandu veve va genda budiku bei mu kireremu; na vambuka Yordani, navo va vitira hagati ha Bithiron, ni va duka Mahanaim.
30Na Joabu yirana kutwula kulonderera Abineri, na lwa ya mala kuvungidza avandu vosi halala, va geha ku avatumekiri va Daudi avandu likumi na vatano na vane na Asaheli. 31Navutswa avatumekiri va Daudi va li ni va kuyi ku avandu va Benjamini, navandu va Abineri, tsimia tsivaka na makumi gatano na iilala va kudze. 32Na va vugula Asaheli, ni va mu ta mu kilindwa kyadada wewe, kya li mu Bethlehemu. Na Joabu navandu veve va genda budiku bei, nomugamba bwa kyera kuvo ha Hebironi.
©Bible Society of Kenya, 1967