2 Samweli 16
16
1Na Daudi lwa ya vita hakekeke ku kereremu kyekyanegiru, he nza, Ziba mutumekiri wa Mefiboshe thu ya vugana naye, naye ya li netsisukiri tsiviri tsya ya vika ku vyo kwikala ku, na kutsyo tsi veye ku tsimango tsyobukima tsimia tsiviri visakanyi vya mazabibu mia, nama kuyu mia genyinga yoluya, nemuya yewaini. 2Nomwami ya volera Ziba, Kigira ki u ndetera vindu yivi? Na Ziba ya vola, Tsisukiri yitsi tsi veye tsya avandu venyumba yomwami va duke kuninaku; nobukima yibu namakuyu genyinga yoluya vi veye vya avasoleli va duke kulia; ne waini, ni i va avandu va gehi tsingulu mu kyangalangwi va duke kunwa. 3Nomwami ya teva, Mwana wo munene wowo a veye haliha? Na Ziba ya volera mwami, Henza, a me nyanga Yerusalemi; kigira ya vola, Lero ndi inyumba ya Israeli i la mba ubwami bwa dada wange. 4Hene yaho mwami ya volera Ziba, Henza vyosi vi veye vya Mefiboshethu vi veye vivyo. Na Ziba ya vola, Inze nsigamiranga; nduke kunyola tsimba basi imbiri wetsimoni tsitsyo, munene wange, O mwami.
5Na lwa Daudi ya duka Bahurim henza, ya twula yo mundu mwiko wenyumba ya Saulo, ya langwa lieta lilye Shimei mwana wa Gera; ya twula, naye ya hongera kunyega na a genda. 6Naye ya lasa Daudi magina, navatumekiri vosi vomwami Daudi ya va lasa magina: navandu vosi navetsingulu vosi va li ku luvega lwomukono mulungi gwigwe, noku luvega lwomukono mmosi. 7Na Shimei lwa ya nyega ya vola yaga, Tsia, tsia, ive mundu wekisahi, ive mundu mudamano: 8Yahova u mali kwirannya ku ive masahi gosi genyumba ya Saulo, wa wamehanga mbugono bwibwe; na Yahova u viki ubwami zana mmukono gwomwana w owo Abisalom; na henza, ive u gumeyui mbudamano bubwo mwene kigira u veye umundu we kisahi.
9Hene yaho Abishai mwana wa Zeruia ya volera mwami, Kigira ki imbwa inkudzu yiyi i nyeganga mu nene wange mwami? Mwadza, mbe munwa, nyambuke mmu twulidze mutwe gwigwe 10Nomwami ya vola, Mbeye na ki ku mwinye, avana va Zeruia? Kigira uyu na a nyega, kigira Yahova u mu voleye, Nyega Daudi; kunangwa ni bwaha a la vola, Kigira ki ive u kola ndi? 11Na Daudi ya volera Abishai, navatumekiri veve vosi, Henza, mwana wange, wa twula munda mwange yenyanga livamwoyo lyange: nasindi uyu Mubenjamini a la vula ndi kukola ligali kuvita yaga? U mu leke, u mu leke a nyege; kigira Yahova u mu lagi. 12Namusia Yahova a la henza ubudamano yibu bwa nkola ngwa, namusia Yahova a la ntunga ubulahi kigira linyega lilye lero. 13Ma Daudi navandu veve va londa inzira; na Shimei ya vita ku luvega lwekigulu kuhenza ku Daudi, naye ya genda na a nyega, nokulasa mwami magina, nokwuha lugukyi. 14Nomwami, navandu vosi a li halala naye, va duka na va luha ligali; na a sosa yo.
15Na Abisalom, navandu vosi, avasatsa va Israeli, va duka Yerusalemi, na Ahithofeli ya li halala naye. 16Na ga duka, lwa Hushai Muariki, mulina wa Daudi, ya duka ku Abi salom, Hushai ya volera Abisalom, Mwami a hindira, mwami a hindira. 17Na Abisalom ya volera Hushai, Yibu nibwo bulahi bwo u koleranga mulina wowo? Kigira ki si u tsitsanga halala nomulina wowo? 18Na Hushai ya volera Abisalom, Auwa; navutswa uyu wa Yahova, navandu veve, navasatsa vosi va Tsraeli va tovola, inze nda va wa uyu, na nda menya halala na uyu. 19Kandi ga ndukira kutumekira bwaha? Si ga ndukiranga kutumika imbiri womwana wewe? Kuli nda tumika imbiri wadada wowo, ni ndiyo nda va imbiri wetsimoni tsitsyo.
20Hene yaho Abisalom ya volera Ahithofeli, U ku he livola lilyo lya ku kola. 21Na Ahithofeli ya volera Abisalom, Ingira ku vasuria va dada wowo, ava ya leka va lindeinyumba; na Israeli vosi va la hulira dada wowo a vihirirangwa ive: hene yaho ama kono ga vosi ava veye halala nive ga la va netsingulu. 22Ma va singeridzira Abisalom lihema ku inyumba igulu; na Abisalom yingira ku vasuria va dada wewe imbiri wetsimoni tsya Israeli vosi. 23Na madiku yago livola lya Ahithofeli lya li kuli mundu wokuteva likuva lya Nyasaye: ni ndiyo livola lyosi lya Ahithofeli halala na Daudi na halala na Abisalom.
©Bible Society of Kenya, 1967