1 Samweli 4
4
1Namakuva ga Samweli ga duka ku Israeli vosi. Na Israeli vosi va tsia kulwana na Vafilisiti, na va singeridza mahema gavo himbi Ebenezeri: na Vafilisiti va singeridza mahema gavo ha Afeku. 2Na Vafilisiti va lomba lihe lyavo ku Israeli: na lwa va lwana, Israeli va kuywa imbiri wa Vafilisiti; na viita avandu mu lihe lya li mwigendanyama kuli tsielfu tsine vasatsa. 3Na lwa avandu va galuka mu hokusosa, avakulundu va Israeli va teva, Kigira ki Yahova a kuyi kwinye lero ndi imbiri va Vafilisiti? Gendi ku tsie kuvugula lisanduku lyelilagana lya Yahova kutwula Shilo ku tsie nalyo, li duke kwingira hagati hetu, noku kuhonnya ku makono gavasigu vetu. 4Kunangwa avandu yavo va tuma avandu kuduka Shilo; na va li leta kutwula yo, lisanduku lyelilagana lya Yahova wa mahe, wikalanga igulu ha vakerubi: navana vaviri va Eli, Hofini na Finehasi, va li halala nelisanduku lyelilagana lya Nyasaye.
5Nelisanduku lyelilagana lya Yahova lwa lya duka mu hokusosa, Israeli vosi va kupa isango nomwoyo munene, kuduka lirova lya langirira. 6Na lwa Vafilisiti va hulira isango yemyoyo, va teva, Isango yemyoyo minene yigyo i veye kigira ki mu hokusosa ha Vahebraina? Ma va manya lisanduku lya Yahova li duki mu hokusosa. 7Na Vafilisiti va tia, kigira va vola, Nyasaye u duki mu hokusosa. Kandi va vola, Vayaye ku kwinye kigira kutwula yaho inkuva kuli yiyi i kikiri kuva ho. 8Vayaye ku kwinye bwaha u nyala kukuhonnya ku makono gavanyasaye yava avobunyali? Avanyasaye yava nivo ava kuya Vaegepeti namaduya tsing'ano tsinyingi lugano lugano mwigendanyama. 9Mu ve avanyala, mu ve avasatsa, mwinye Vafilisiti, mu vule kuva avatugwa ku Vahebraina, kuli lwa va li avatugwa venyu: mu ve avasatsa, mu lwane. 10Na Vafilisiti va lwana, na Israeli va kuywa, ni viruka sa mulala ku lihema lilye: na ha li neliitwa linene ligali; ni va gwa mu Israeli avasatsa tsielfu makumi gavaka. 11Nelisanduku lya Nyasaye lya vugulwa; navana vaviri va Eli, Hofini ne Finehasi, viitwa.
12Nomulala ku Benjamini ya nyagula kutwula mu lihe, na a duka Shilo lidiku zana yilyo, naye ya tandula tsingubo tsitsye, na a vika budohi ku mutwe gwigwe. 13Na lwa ya duka, henza, Eli ya li ni yikaye ku intebe yeye ku luginga lwenzira na a lindanga; kigira mwoyo gwigwe gwa li ni gu degeranga kigira lisanduku lya Nyasaye. Na lwa mundu uyu ya duka mu lidala, ya twulidza makuva, nelidala lyosi lya kupa lwanga. 14Na lwa Eli ya hulira lioga lyelilira, ya teva, Lioga lyomuliviti yigu li veye kigira ki? Nomundu uyo ya nyagula na a tsia kuvolera Eli. 15Inyinga yeyo Eli ya li na a veye wemihiga makumi gatano na gane, na gyitano na gyivaka; tsimoni tsitsye tsya li tsyavakuye, si a nyala kulola. 16Nomundu zana ya volera Eli, Ni inze wa twula mu lihe, na nziruki lero kutwula mu lihe. Eli ya mu teva, Ga genda ndi, mwana wange? 17Naye wa leta amakuva ya tivula na a mu volera, Israeli viruki imbiri wa Vafilisiti, kandi ha li neliitwa ligali hagati ha avandu, navana vovo, Hofini na Finehasi, va kudzi, nelisanduku lya Nyasaye li vuguywi. 18Na ga duka, lwa ya tala lisanduku lya Nyasaye, Eli ya gwa kutwula ku intebe yeye ku luvega lwemugongo himbi ku kiliango; neligoti lilye lya kalika, na ya kudza: kigira ya li musakulu ligali nomuliduhu. Naye ya li mukalagi wa Israeli mihiga makumi gane.
19Navizala wa Eli, muka Finehasi, ya li inda inyinga yeyo, himbi kwivula: na lwa ya hulira lisanduku lya Nyasaye li vuguywi, kandi navizala wewe nomusatsa wewe vombi va kudzi, yeyinaminya mwene ni yivula; kigira lilumwa lilye lya duka kuye. 20Na inyinga yelikudza lilye avakali va singira himbi va mu volera, U ta tia mba; kigira wivuye mwana muyai. Navutswa si ya tivula kindu, kandi si ya kola kuli ya hulira. 21Naye ya gulika mwana Ikabodu, na a vola, Ubukumi bu twuli ku Israeli; kigira lisanduku lya Nyasaye lya vugulwa, na kigira navizala wewe nomusatsa wewe. 22Naye ya vola, Ubukumi bu twuli ku Israeli; kigira lisanduku lya Nyasaye lya vugulwa.
©Bible Society of Kenya, 1967