1 Samweli 3
3
1Nomwana Samweli ya tumekira Yahova imbiri wa Eli. Noku madiku yago amakuva ga Yahova si ga nyolekanga mba, navutswa ku budinyu; si ha li nelivuula habulavu. 2Na ga duka inyinga yeyo, lwa Eli ya gona mu bugono bwibwe (tsimoni tsitsye tsya li ni tsi tangi ku vakula, si a nyala kulola bulahi), 3netaya ya Nyasaye ya li nekikiri kusima, na Samweli na a mali kugorla, mu litempeli lya Yahova, helisanduku lya Nyasaye lya li; 4inyinga yeyo Yahova ya langa Samweli: naye ya vola, Mbeye hano. 5Naye ya tsia ku Eli bwangu, na a vola, Mbeye hano; kigira wa nanga. Na Eli ya mu volera, Si nku langi mba; u gone kandi. Naye ya tsia na a gona kandi. 6Na Yahova ya langa kandi hali kaviri, Samweli. Na Samweli ya vuka na a tsia ku Eli, na a vola, Mbeye hano; kigira wa nanga. Na Eli ya tivula, Inze si nku langi mba, mwana wange; u gone kandi. 7Na Samweli ya li na a kikiri kumanya Yahova kinga likuva lya Yahova lya li li kikiri kulang'aminywa kuye. 8Na Yahova ya langa Samweli hali kavaka. Naye ya vuka na a tsia ku Eli, na a vola, Mbeye hano; kigira wa nanga. Kunangwa Eli ya manya ni Yahova u langanga mwana. 9Kigira yaga Eli ya volera Samweli, U tsie kugona: na ga la va, na a ku langa, hene yaho u la vola, Vola, Yahova; kigira mutumekiri wowo a huliranga. Ma Samweli ya tsia na a gona ha bugono bwibwe.
10Na Yahova yadza, na a singira, na a langa kuli ya langa ku matsya mbiri, Samweli, Samweli. Hene yaho Samweli ya vola, Vola; kigira mutumekiri wowo a huliranga. 11Na Yahova ya volera Samweli, Henza, nda kola kindu mu Israeli, ku vosi u hulira kindu yikyo amatu gege gombi ga la lutsirira. 12Mu lidiku yilyo, vindu yivi vyosi vya nda vola ku Eli ku makuva genyumba yeye, nda vi dukidza, kutwula ku litanga lyavyo nokuduka ku kiheri kyavyo. 13Kigira mmu voleye nda kalagira inyumba yeye mihiga nemihiga, kigira ubudamano bwa ya manya, kigira avana veve va letera lilaamwa kuvo, naye si ya vigalira. 14Kunangwa, mmali kwisuhira inyumba ya Eli, ubudamano bwenyumba ya Eli si bu la twulidzwa netsisadaka kinga visyuviriru kuduka mihigi nemihiga.
15Na Samweli ya gona kuduka mugamba, ma yigula miliango gyenyumba ya Yahova. Na Samweli ya tia kuvolera Eli amakuva ga malola. 16Hene yaho Eli ya langa Samweli, na a vola, Samweli, mwana wange. Na ya vola, Mbeye hano. 17Naye ya mu teva, Ni likuva ki lya Yahova ya volera ive? Nku goonya, u ta mbisa likuva zana mba: Nyasaye a ku kolere ndiyo, nokuvita, nu u va nu u mbisa kindu ku vyosi vya ya volera ive. 18Ma Samweli ya mu volera sa kilala, si ya mu visa kindu mba. Naye ya vola, Ni Yahova: a kole aga veye malahi kuye.
19Na Samweli ya viruka, na yahova ya li halala naye, na si a leka kindu kali kilala ku makuva gege kugwa hasi. 20Na Israeli vosi kutwula Dan kuduka Beeri-sheba va manya Samweli u singeridzeywi kuva muprofeti wa Yahova. 21Na Yahova yelangaminya kandi ha Shilo: kigira Yahova yelolekidza ku Samweli ha Shilo mu likuva lya Yahova.
©Bible Society of Kenya, 1967